《台灣之愛：盧俊義牧會筆記》

| | | 轉寄

想beh hō͘人尊重就ài先自立起來

作者 盧俊義 2006.02.26

台北有一間專門teh關心「街友」ê活水泉教會，有一位因為信耶穌了後受洗而決心將酒戒掉ê「街友」，確實真值得紹介hō͘大家認識。

因為該教會每禮拜二kap四有提供眾「街友」洗澡、食燒泡麵、麵包等，因此，「街友」tī chitê時間到教會來ê也會比較khahchē。Chit位戒酒ê兄弟有一工到教會去參加聚會，tú行入去ê時，就聽tio̍h有人tī浴室大聲喊叫講：「無燒水lah」，伊一聽tio̍h就馬上回應講：「忍耐一下，我來叫」。伊馬上khà電話hō͘桶裝瓦斯店，請趕緊送一桶瓦斯過來。

賣桶裝瓦斯ê老闆對活水泉教會真熟練，送去ê時tú好傳道「小吳」去買物件無tīteh。瓦斯店ê老闆對教會內ê「街友」講，另工chiah來向「小吳」收錢就好。但chit位戒酒ê兄弟隨時kā老闆講︰「m̄免lah，我hō͘你。」老闆一看是「街友」，就回答講︰「無關係，m̄免急，我另工chiah來向小吳收to̍h好。」但chit位兄弟一再表示有錢thang支付，m̄免等另工，伊一面kā老闆講，一面tùi lak袋á中gîm出一大把銅板，有一元、五元、十元等硬幣，一個一個teh算，然後雙手捧硬幣hō͘老闆。Chit位瓦斯店ê老闆真受感動，一再多謝chit位兄弟。

Chit種ê情形發生過kúināpái，以後瓦斯店ê老闆看tio̍h chit位「街友」兄弟，lóng用非常客氣而且尊敬ê語氣kap伊開講，而且每pái收伊hō͘伊錢ê時，也是立正khiāteh雙手承(sîn)伊所hō͘伊ê瓦斯錢。

原來chit位兄弟信耶穌了後，決心beh做ê第一件事，就是戒酒。伊認為只有ánne，chiah ē tàng hō͘家己自立起來。因為無厝或所在thang khǹg拾tio̍h ê厚紙板，因此，只ē tàng每pái揀幾張厚紙板就the̍h去賣，或是暗時當作床鋪、被蓋，天光了後，就將chiahê厚紙板the̍h去賣hō͘回收商。每pái得tio̍h五元、十元、二十元不等。伊tī家己lak袋á中親手縫製了一個特殊lak袋á，成做「袋中袋」，將賣厚紙板所得tio̍h ê銅板一個一個塞入袋中。每pái tú tio̍h「無燒水lah」聲音出現時，伊lóng會將身上「袋中袋」裡所有ê存錢捐出來。

舊年十二月廿五日下晡，活水泉教會為chiahê「街友」舉辦慶祝聖誕節活動聚會ê時，chit位戒酒兄弟也志願擔任義工，tī帶領小組ê時用真誠懇ê語氣對tio̍h仝款是「街友」ê兄弟姊妹講︰「咱若beh ài別人尊重咱，tio̍h家己先自立起來。m̄ thang定beh看人ê施捨kap目色。M̄ thang koh再lim酒，酒bē幫助咱，先戒酒，咱就會有法度khiā起來。只要咱若自立khiā起來，雖然一元、兩元、五元、十元無jōachē，慢慢拾(khioh)，加減儉，也會有夠用，就無需要伸手向人討，ánne chiah會hō͘人尊敬咱。」

伊講到嘴瀾kho̍kkho̍k飛，但一聽內容卻條條有理，kohkhah重要ê是家己真正立下好榜樣。伊親自體會tio̍h自立起來所得tio̍h ê生命尊嚴，以及tùi別人回應hō͘伊ê尊重。因此，苦勸來勸勉「街友」眾同伴也tio̍h家己khiā起來。Hit工坐tī chit位兄弟身邊，聽伊用hit種激昂ê語氣teh對其他兄姊講話，我感受tio̍h一股強烈ê暖流tī身上teh 振動。Chit位兄弟現在m̄ nā每工去四界拾厚紙板去賣，伊也chhōe機會去phah臨時工，只要有人需要，伊就去。然後將所得tio̍h ê錢非常小心保存tī伊ê「袋中袋」中，伊講︰「Ánne，萬一若有需要ê時，咱就m̄免óa靠別人ah﹗」

一個已經真sànchhiah ê人，iáu知影家己ē tàng kap別人分享家己所擁有ê；一個已經非常匱乏ê「街友」，卻會主動伸手hō͘仝款需要扶持ê同伴，而kohkhah令我感動ê是，伊勸勉家己ê眾同伴tio̍h「自立」起來，ánne chiah ē tàng得tio̍h別人ê尊敬。伊雖然是一個無厝thang定居落來ê「街友」，也無受過甚麼高等教育，但tī伊身上我卻看tio̍h生命堅韌ê另外一個面貌，chit位「街友」兄弟遠比hiahê已經真富有，卻iáu一直急beh累積財富而心內卻對社會ê苦難、貧困者非常少有憐憫之心ê人，伊實在是kohkhah值得咱尊敬。

一個人ánne，一個社會也是ánne，一個國家tī國際社會kohkhah是需要ánne﹗（原載於自由時報2004年2月8日第15頁）

盧俊義牧師的個人網站。