《台灣之愛：盧俊義牧會筆記》

| | | 轉寄

愛台灣，àn榮譽心kap見笑感開始

作者 盧俊義 2006.03.05

第二次世界大戰期間，美國tī全國各地徵召青年加入軍隊，特別是當珍珠港hō͘日本偷襲了後，tī美國thang講全國人民lóng顯露仝心對付共同敵人ê意志，少年人相招入伍，希望ē tàng為國家盡一份力量，真chē父母因為gín'á入軍隊參戰感覺相當光榮。

有十二個仝故鄉ê少年人聽講空降部隊是訓練siōngkài嚴格、mā是戰爭中第一危險ê部隊。He tio̍hài nǹg過敵人ê防空砲火降落tī敵人ê佔領區，是死亡率siōngkoân，卻是siōng有法度hō͘敵人ê根據點ná水崩山ê一種戰術。chiahê青年認為in應該揀siōngkài困難、危險ê兵種來做，in ánne想︰只要in包攬chit項ná槌kòng鐵ê任務，其他ê部隊就thang安穩去攻擊敵人，ē tàng hō͘家己ê同胞損失減到最低。空降部隊需要接受嚴格訓練ê關係，勇壯ê身體成做第一個必要條件，嚴格ê體檢是過挑兵á非常重要ê環節。

Chit十二個少年ê同鄉相招往徵兵處報到，接受相連續嚴格ê體檢了後，其中一個青年hông thai掉，原因是體格無合規定，徵兵處ê人建議伊去別ê軍種應徵，in仝故鄉ê lóng chiâⁿ替伊可惜，有幾個甚至行去醫官hia替chit位同伴講情，總是lóng無成功，因為che是關係tio̍h生命安全ê問題，bē tàng hô͘hàm。但是chitê青年是感覺真chhìn心，tńg來到家己ê厝，兩工後竟然吊tāu自殺。伊留一封遺書寫幾chōa字講︰「我感覺相當見笑，當國家有難，我連beh參與去分擔困難也無法度照心願；kohkhah hō͘我感覺真見笑ê是︰一直到國家有難ê時，我chiah發現家己ê身體是hiahnih lám身﹗」

chitê青年因為身體無符合入空降部隊ê資格，感覺見笑，m̄ nā是因為國家有難ê時家己無法度照心願加入眾人公認siōngkài ngē chúi ê兵種，mā為tio̍h體檢不合標準，chiah發現家己ê體格竟然是hiahni̍h'á lám，伊感覺是極大ê恥辱，無面thang見鄉親。Che oânnā是美國chitê文化真多元、意見紛雜ê大國，每pái tú tio̍h外國惹khang、威脅ê時，in全國人民lóng會無顧一切排除個人之見，一切以國家利益為重，原因就tī in對家己ê人民、土地有極koân ê認同感kap榮譽感。

第二次世界大戰前ê日本，若有青年會titthang入軍校，in ê序大行tī街á lóng會舢板搖，厝邊隔壁ê人看tio̍h in lóng會舉指頭拇kā in肯定kap oló。若chiahê青年tùi軍校tńg到厝探親，就會有真chē庄裡ê人相咬尾過門來探訪，in ê母校會請in去對在校生演講，因為he是母校ê光榮，更加是kui庄頭ê榮耀。差不多全國人民lóng有一個共識︰有青年子弟thang進入軍校，就是最大ê榮光， 因為in是為tio̍h國家行去最前線。日本出兵侵略他國固然不可取，m̄ koh in kā最優秀ê青年送入軍校受訓，青年也以ē tàng進入軍校感覺光榮，che mā是in有法度以一個像chhèngchí細kai粒á ê國家，有能力養成最精練有力ê軍隊，tùi戰敗了後ê廢墟之中快速重khiā起，koh ē tàng tī國際政治kap經濟舞台頂撼動全世界，其中最大ê因素，是對家己ê國家有高度ê榮譽心kap見笑感所致。

咱台灣自第二次大戰了後，siōng不堪入目ê，就是五十冬外來政權愚民教育ê結果，hō͘國人ê榮譽心kap見笑感喪失了盡。貪污事件bē soah mài講，有ê人to hông chang tio̍h貪瀆ah，soah iáu無感覺見笑，甚至有集體A錢ê koh敢吐大話講處罰siuⁿ重﹗受高等教育ê知識份子設法走閃做兵ê有一大堆，tùi高官子弟到一般學生，經常利用各種關係，kap所學ê智識設法取tio̍h免做兵ê證明，koh連一絲á ê見笑感to無，che就莫怪每pái咱國家遭遇大難ê時，就會看tio̍h一大堆人紛紛設法逃離，àn in身軀頂咱實在看bē出有啥榮譽心kap見笑感，che chiah是咱台灣最大ê悲哀﹗

大家lóng講愛台灣，m̄ koh beh愛台灣就應該先tùi培養榮譽心、建立見笑感開始，che mā是咱今後ê教育工作最需要重建ê內涵之一，缺少chit兩項，即使經濟發展了kohkhah好，mā是枉然，因為當一個人無榮譽心ê時，就bē有見笑感，chit種人就算有真chē響亮ê高等學歷，以及官場經歷，也kanta會開嘴講白賊、做tāichì腳手無清氣，到尾koh是凌辱國家尊嚴、製造社會動亂ê高手niâ。
（原文刊tī自由時報2004年3月初7第15頁）

盧俊義牧師的個人網站。