《台灣之愛：盧俊義牧會筆記》

| | | 轉寄

Ná親像夢中ê國家

作者 盧俊義 2006.05.14

1980年4月中旬，我tùi瑞士ê北部大城蘇黎世搭火車beh去首都伯恩附近ê一個小鎮，因為我bē曉講德語、也bē曉法語á是義大利語，kanta會siókhóa ê英語。接待我ê家庭已經聯絡了「白冷差會」ê神父到車站去接我，要我上車了後問一下坐邊á ê人就好。上了車了後，就the̍h tio̍h車票向邊á ê人用簡單ê英語加上比手劃腳ê方式，請in tī車來到hitê小鎮時，kā我講一聲。我也m̄知in是m̄是聽有我he破爛ê英語，á是lóng無文法ê手語，kantaⁿ見in一直對我微笑tìm頭、也彼此互相tìm頭，我就kā背包khng leh，安心坐落來。

因為前一晚kap接待我ê家庭主人談到真晚chiah睏，上車後沒jōa久真緊to̍h tùku補眠。

等到我醒過來了後，chiah發覺邊á ê人都換ah，我淡薄緊張。就tī hit時，車掌先生來了，伊ê衫褲上kap 一塊牌á，頂面寫tio̍h伊會「德語、法語、義大利語、英語」等四種語言。我ná親像看tio̍h救兵來了仝款，趕緊khiā起來the̍h出車票問伊我beh去ê所在beh koh過幾站chiah到。車掌先生一看我ê車票，馬上kap我講︰「先生，真失禮，túchiah停ê那一站就是。你是bē記得落車？」伊可能看tio̍h我ê表情真pháiⁿ看ê款，隨時koh補上一句︰「你是m̄是第一pái來瑞士？」我講：「是」。伊馬上跟我講︰「真失禮，hō͘你坐過了車站。但是免緊張，hō͘我來想看māi。」就ánne，伊離開到別個車廂去。無jōa久，伊快快行過來ài我準備落車，kā我講後一個車頭ê站務員會幫我解決這個問題。

車停tī後一個車頭ê時，月台頂已經有一位站務員teh等我，一落車，hit位先生馬上chhōa我到車頭外面，有一台車teh聽候。站務員kā我講講︰「先生，真失禮，阮無kā tāichì做好，chiah hō͘你第一pái來瑞士就坐過頭。現在阮用小車載你tńg去到你原來想去ê hitê車頭，你ê朋友已經tī hia等你。你m̄免緊張，希望你tī瑞士sńg得愉快。」

就ánne，in用車載我tńg來到原本要落車ê小車站，「白冷差會」ê貝神父已經tī hia聽候一kóa時間，也接tio̍h車站ê工作人員通知，講伊beh等ê朋友因為坐過頭，現在tī tńg來路nih。當我落車問駕駛先生需要hō͘伊gōa chē錢，伊竟然講︰「這是阮應該做ê事，真失禮，浪費了你真chē寶貴ê時間。希望下次你koh來瑞士chhitthô。」我想家己聽m̄ tioh，koh看tio̍h貝神父，伊笑笑leh kā我講︰「這是應該ê。」

1991年2月，我到澳洲首都坎培拉開會。旅館有國際線公用電話，我投入一把銀角á khà電話tńg來台灣hō͘厝裡ê人。無想tio̍h電話不但接bē通，聽筒掛上了了後，卻連一個銀角á也無退出來。我就去櫃臺kap服務員講這款情形；in聽我ê講了，馬上khà電話hō͘電話公司，kap in講我所tú tio̍h ê情景。結果服務台ê人問我投入gōa chē ê銀角á？我老實kā in講，櫃枱服務人員就照我所講ê全部hō͘我。我問伊為什麼ánne做？伊講電信局ê人ài in先付，in會派人來修理hit支電話，也會kap櫃枱算所付hō͘我ê錢。

這是兩個無仝ê地方，一個是tī北pêng，一個tī南pêng， lóng是一個真講究人性尊嚴ê國家。你ē tàng想像會tio̍h，hit時我ê心內感受是什麼？若換成是你，我相信你一定會跟我仝款，認為chiahê國家是怎樣ánne對待旅客ê？是怎樣會chiahnih人性化處理旅客ê問題？怎樣會ánne為別人設想？我深信，對一個黃膚色外國ê旅客lóng會ánne善待，in對家己ê人民一定kohkhah是體貼，這m̄ nā是kap in ê教育有關係，也kap in ê宗教教育對人性尊嚴之肯定有極密切關連。

Tī瑞士這個國家，in看誠實ná親像是一個人ê第二個生命，tùi細漢時學習認bat這個世界開始，父母就教in知影︰對別人誠實，就是kap重視家己生命ê尊嚴仝款。Ài得tio̍h別人尊敬，就是tùi家己誠實做起，無誠實ê人，會thún踏別人ê生命，這種人最具體ê表現就是講白chhat，這種人無論有jōachē錢、有什麼學經歷，都bē得tio̍h別人尊重。這種家教tú好是咱台灣siōng缺乏ê家庭kap學校教育ê內涵。

（原刊tī自由時報2004年8月15日第15頁）

盧俊義牧師的個人網站。