《台灣之愛：盧俊義牧會筆記》

 | | | 轉寄

台灣就是台灣

作者 盧俊義 2006.09.10

有一個家庭舊年tùi國外tńg來，將gín'á送去附近ê國小插班入學讀四年級，因為gín'á是tī美國出生，kanta會聽華語、講台語，以及非常美式ê英語、文。對tī中文ê認識差不多等於零，因此，讀起中文書來ē sái講是字字生份，根本就看m̄ bat。

對chit位插班入來ê新同學，班上同學lóng抱tio̍h好奇ê心，班級導師紹介hō͘全班同學，ài大家lóng愛護伊、幫助伊，thang hō͘伊真緊ē tàng jiok tio̍h進度。而同學一聽tio̍h是tùi美國tńg來ê，mā lóng抱tio̍h「關愛ê眼神」看伊。因為伊ê英語、文好，真chē同學kha̍pbē tio̍h就kap伊「哈囉」東、「模稜」（早安）西ê。

開學後上課，真chē時間lóng是上華語課。伊tī聽ê方面並無問題，對伊來講，siōng困難ê是tī寫字。伊無法度理解為甚麼中文是ánne ê寫法︰為甚麼一定ài由左而右、由上往下畫，伊認為應該也thang以由左往右畫、由下往上拉，tùi ánne，伊就用家己感覺siōng緊ê筆法畫字。原來伊是將老師寫tī烏板頂ê字，lóng當作kahná是學「素描」ê畫仝款teh「畫」字。級任導師知影伊ê特殊情況，體諒伊，也鼓勵伊。但有kóa科任老師就m̄是ánne；in有時故意講真緊、並且叫伊起來回答問題，hō͘伊感覺壓力相當大。 有一pái上歷史課。老師叫伊起來問講︰「知影世界上siōng偉大ê國家是toh一個？」伊一屑á to無加思考就回答講︰「美國。」全班同學聽了後，lóng笑起來。老師問講︰「為甚麼？」伊真緊回答講︰「因為he是我ê國家。」同學聽了kohkhah是笑kah呼呼大叫。老師認為伊是故意作怪，就回一句話︰「你是美國人mah？bē見笑，咱是中國人，是中華民國ê國民，為甚麼tio̍h講家己是美國人？你hiahni̍h愛做美國人，就tńg去美國，chhòng啥iáu teh chia？」聽老師ánne一講，全班同學lóng突然間感覺真無對tâng，瞬間就停止了原有ê笑聲，有真chē為chit位lóng受委屈ê同學投以關懷kap難過ê眼光。Chit時有位同學舉手講︰「老師，伊tú tùi美國tńg來。」老師kahná並無接受學生ê提醒。Chit位學生隱忍tehbeh滴落來ê目屎，ûnûn'á回應老師一句話講︰「我是美國人，但我ê爸爸kap媽媽lóng是台灣人，我ê阿公、阿媽lóng是台灣人，只有我kap小妹是美國人。」

伊tú講完，隨時有一個同學替伊講話︰「老師，伊真正是tú tùi美國tńg來ê，伊ê爸爸tī XX大學教冊。所以華語無jōa會曉講。」

老師kahná氣iáu teh心頭，聽了就續落來講︰「爸爸tī大學教冊有什麼了不起？咱就是中國人，為甚麼tio̍h講美國偉大？」

有一位同學聽了後，真不服講︰「老師，我是台灣人，阮老父爸kap媽媽lóng是台灣人，阮全家lóng是台灣人，m̄是中國人﹗」

另外一位父親過去bat參加過社運ê同學接口講︰「老師，你講你是中國人，為甚麼m̄ tńg去中國？我bat kap爸爸參加過『Say No to China』，我chiah m̄是中國人。」聽tio̍h chitê學生一講，班上真chē同學紛紛細語講︰「是ah，我也是台灣人，m̄是中國人﹗」聲音jú來jú大，chia起hia落，大家議論紛紛。差不多班上ê學生lóng teh講家己就是台灣人，跟tòe有kúinā位同學也異口同聲講︰「Say No to China。」一聽tio̍h chit句話，chit位美國tńg來ê小學生，kahná聽tio̍h家己ê語言一般，真是興奮舉起掠ânân ê拳頭拇ê正手，大聲一呼︰「Yes, Say No to China﹗」tùi ánne，全班同學lóng跟tòe伊大聲tehhoah講︰「Yes, Say No to China﹗」

Chit位老師看tio̍h chitê情景，chhoah一跳(tiô)，心內一直teh想「怎樣會變成ánne」？另外一方面又koh驚學生tńg到厝了後會kā父母講來引起無必要ê困擾。無想tio̍h教冊kiōngbeh二十年a，竟然會tú tio̍h chiahni̍h「硬」ê班級學生，而且想也想bē通chiah只有小學四年級ê gín'á，十一歲左右ê年齡，怎樣會變kah hiahni̍h「政治」？jú想心就jú bē平衡，tùi ánne大聲講︰「台灣就是中華民國，tio̍hm̄ tio̍h？」無想tio̍h chit位iáu khiāteh ê同學會曉續落來講︰「No, Taiwan is Taiwan﹗」老師驚學生又koh跟tòe起hoahhiu來大hoah chit句話，就趕緊講「今á日提早下課」，也無等待班長hoah「起立，敬禮」，就匆匆pōngpōng行(kiâⁿ)出教室。（原華文載tī自由時報2004年10月10日第15頁）

盧俊義牧師的個人網站。