《台灣之愛：盧俊義牧會筆記》

| | | 轉寄

小事看陳定南先生

作者 盧俊義 2006.11.19

陳定南先生離開loh，伊行完人生ê旅途，年紀kantaⁿ六十三歲。最近媒體lóng一再oló伊，á執政ê民進黨kap在野ê國民黨、親民黨等，大家mā lóng異口同聲歌頌伊，講伊非常清廉，也講伊對bó͘kiáⁿ相當柔情、體貼。但若是將過去在野ê立法委員kap地方民意代表tī各種場合講ê話，the̍h來對照一下，就ē tàng看出in是jōani̍h'á虛偽，chhōe bē tio̍h真實ê話thang講，這就是台灣ê政治人物！

一九九四年七月，陳定南先生正式代表民進黨出來kap宋楚瑜競選台灣第一屆省長，hit年我tī嘉義西門教會牧會，教會有一位陳炳炎兄，就是我多次提起過全身紋身、出身烏道，出獄後洗手歸正ê兄弟，後來koh受洗歸屬耶穌。伊hit時擔任民進黨嘉義市黨部評議委員會召集人，當伊知影陳定南先生得tio̍h黨部提名選省長，就將輔選ê責任一肩phāiⁿ落來。伊全心、全力協助，四界邀請人替陳定南選舉ê演講場造勢。陳定南先生幾pái到嘉義市來，知影陳炳炎兄忠心推動選務，一直記憶tī心頭。可惜hitpái選舉失利。

隔年（一九九五）年初，陳炳炎兄因為無閒選舉過度，hō͘原本就有問題ê肝病因此復發soah tī二月六日去世。二月十五日告別禮拜hit工，有tùi各界來ê人士聚集tī嘉義西門教會參加追思，我也接tio̍h通知講「陳定南先生會來」。Tī我主持下ê告別禮拜，基本上是無所謂官場樣式禮儀ê，我堅持任何人踏入禮拜堂敬拜上帝，大家lóng是仝款平大。因此，雖然hit工有人the̍h紙條傳hō͘我，講有某某民進黨要員、立法委員、市長等政界代表出席，但禮拜iáu是依照既定時間、程序進行，bē安插任何禮拜程序中所無ê節目。但直到禮拜結束ê時，大家iáu teh耳語講：「聽講陳定南先生beh來參加，怎樣iáu無看tio̍h伊？伊有講beh來參加ê。」

禮拜後，beh送到山頂ê人就tī教會門口同齊坐車，直接往嘉義市郊區ê基督教十字園納骨塔去。當阮舉行完安置骨灰ê禮拜，tú當準備beh落山ê時，chit時chūn看tio̍h一台車急急駛過來，有一個人tùi車內出來，原來是陳定南先生。伊因為tī高速公路上塞車，無法度tī告別禮拜ê時間內來到，因此，特別趕到墓園向炳炎嫂表示歉意，同時也表示由衷ê謝意，過去tī選省長期間，炳炎兄hō͘ in ê全力支持。伊一面teh講，一面陪炳炎嫂ûnûn'á行一小段山坡路，一直行到家屬ê車邊，送行家屬了後，伊chiah上車離開。

Hitpái hō͘我ê印象相當深刻，因為當時到山頂墓園去ê人並無chē，只有炳炎兄siōng親近ê厝人kap幾個好友而已，但陳定南先生——一個人人尊敬ê民主運動者，雖然已經名號真響à，卻無bē記得一個bat替伊扛(kng)過轎ê市井小民，kohkhah可貴ê所在是，即使到了會場禮拜已經結束，人潮lóng散去à，伊iáu是向人詢問前往墓園ê路徑，趕緊開車趕到墓園去向喪家表示慰問之意。這就是陳定南先生hō͘人尊敬ê所在，伊無看重大富大貴ê人家，kohkhah無看輕一個地方小黨員為伊競選所做ê事。

另外一項hō͘我深深感覺敬佩ê事，就是tī伊第二任縣長任內（一九八六到一九九○），伊公開宣佈電影院播放電影，m̄免先放映國歌，也通知所有縣內國中、小學，m̄免舉行升降旗。Chit種ê決定hō͘當時chiah tú宣佈解嚴無久、戒嚴氣氛iáukú濃厚ê時代，真自然to̍h引起非常劇烈ê輿論討伐，各式各樣ê「思想帽子」lóng kā伊套起lih。但伊iáu是無為所動，堅持抱tio̍h beh hō͘宜蘭人享受看電影免tī聽國歌ê罰khiā，gín'á去學校讀冊、放學lóng m̄免koh再接受升降旗ê軍人教育，伊ài kā宜蘭人tùi chit種「假性愛國」ê思想枷鎖中釋放出來。

Beh做上述兩項宣告，iáu m̄是hiah容易neh，我tī一九九八年來台北了後，去國家音樂廳，lóng iáu會先聽tio̍h「請來賓起立，唱國歌」ê報幕。現在全國各地電影院已經無koh播放國歌loh，若無觀眾一看tio̍h現任ê總統影像出來，電影院ê銀幕無遭遇tio̍h染紅chiah怪哩！

Siōng令我感觸真深ê是二○○五年底，伊tńg去宜蘭選縣長。真chē人bē了解伊為甚麼想tio̍h beh tńg去？包括我在內lóng感覺無應該是伊tńg去，因為這表示宜蘭無人才thang接棒，chiah需要老將[回巢去築窩]，對kuiê民主運動來講並m̄是一件好事，ná親像嘉義市也是ánne，這並m̄是健康ê作法，應該是代代有新人出來接棒，ánne chiah ē tàng表示有栽培人才thang延續並擴大縣政理想。我想tio̍h伊任滿了後，游錫堃接棒；游錫堃了後劉守城接續執政。可惜ê是了後卻因後繼無人á需要伊chit位老將重moa戰袍參與選舉，這也講出了台灣tī民主運動ê工作上，栽培後進之熱力ê不足。 看tio̍h最近所有媒體、政界領袖lóng tī歌頌陳定南先生ê時，hō͘咱kohkhah清楚看tio̍h chiahê政治人物ê嘴面；看伊tī法務部長任內，怎樣被立法委員修理ê？當舊年伊tńg去宜蘭參加縣長選舉ê時，國民黨主席馬英九怎樣罵伊ê？講伊「賄選」、「無清氣」等各種污衊ê話lóng出來。現在伊去世loh，chiahê罵伊ê人lóng iáu專程走去弔唁，這iáu無啥要緊，竟然敢tī電子媒體鏡頭前公開歌頌講：陳定南先生是台灣siōng清廉ê一位政治人物。有時我iáu真未清楚chiahê人到底是teh講些甚麼？一年前罵伊，一年後歌頌伊；一年前講伊真lahsap，一年後講伊過去到現在lóng真清氣！kám講一年前teh罵伊ê時chūn是chheⁿmê，若無就是目睭內有沙粒，看錯了眼？

陳定南先生siōng hō͘人震撼ê一件事，就是伊以一個小縣縣長ê力量，阻擋了全國siōng大財團、台塑王永慶想beh tī宜蘭利澤開設六輕工業區ê計劃，兩人iáu因此tī媒體公開對chhiâng。但tùi鏡頭中thang看出陳定南先生[不卑不吭]、相當堅定ê態度，相對ê，卻hō͘咱看tio̍h王永慶一副財大氣粗ê架勢。就是因為無hō͘利澤成做六輕工業區，chiah有今á日世界出名ê宜蘭「世界童玩節」，以及hō͘人嚮往水波清澈見底、幽靜ê冬山河，kap各縣市紛紛學習建造ê「運動公園」。仝款是民進黨所執政ê縣市，卻無一個人ē tàng kap伊仝款，ē tàng將一個偏遠ê小縣，治理kap連台北市lóng大嘆不如。

如今伊去loh，我講得kohkhah chē，也只是淪為插花á、加kóa嘴pho而已，但我iáu是beh記落來chiahê事，是因為真心期待台灣加kóa kap陳定南先生仝款ê政治人物，若ánne，台灣to̍h有福loh！

盧俊義牧師的個人網站。