《台灣之愛：盧俊義牧會筆記》

| | | 轉寄

In真值得咱尊敬

作者 盧俊義 2007.05.06

　　昨（四月廿八）下晡二點，衛生署假tī台北市政府親子劇場，舉行醫療貢獻獎頒發典禮。Chitpái頒獎，台東關山天主教聖十字架寶血會ê養護中心得tio̍h醫療奉獻團體獎，chit ê養護中心ê裴彩雲修女（奧地利籍）得tio̍h個人醫療奉獻獎。Tī四月十八èchaia，當in接tio̍h衛生署通知chit條消息了後，隨khà電話來hō͘我，ài我將chitê消息kap ta̍k家分享。關山養護中心ê修女in，包括馬修女、饒修女，kap裴修女等人mā約我kap淑英，tī昨下晡一點半，to̍h是頒獎chìn前，先有一ê見面開講ê時間。

　　舊年到今年初，佛教慈濟ê大愛電視台phah一部影集，就是以關山鎮ê慈濟分院做背景，其中有一段是演chit位裴彩雲修女ê故事。四年前，當「SARS」侵襲台灣ê時，有未濟醫護人員m̄敢繼續tī醫院值班、做照顧病患ê si̍t頭，所以關山天主教病院養護中心ê修女就主動去慈濟關山分院協助chit項工作。養護中心有一位替代役青年，伊騎機車載裴修女beh去醫院ê途中，hō͘一隻hiônghiông chông來ê大卡車迎面撞tio̍h，替代役青年差一點á hō͘卡車káu死，事發到taⁿ已經四tang，hit位青年猶koh le做復健。若是裴修女，伊經過kúināpái 開刀、補皮等外科手術，落尾才將伊hit支差不多beh殘廢ê倒手救tńg來。裴修女已經來台灣三十幾tang，東元tī國中畢業hit年，bat去養護中心做義工兩個月，hit時就是親身chhōa領服事病患ê工作ê就是裴修女。

　　其實，阮一家夥tī關山十tang ê牧會工作當中，kap chit群來自瑞士聖十字架寶血會ê修女in非常親近。Tùi瑞士來養護中心協助ê醫師kap家庭，是由我kap淑英協助參與「關懷」，成做醫師家庭ê朋友，thang hō͘醫師tī關山一、兩thang ê時間當中，ē tàng有一ê朋友thang開講。我mā bat教過一位梅修女學台語，課本是採用天主教台中馬利諾會出版ê台語教材。Kap chiahê修女，以及來自瑞士白冷差會ê神父in，阮確實有真好ê朋友關係。悅文tī前年結束tī瑞士Geneva（日內瓦）ê工作tńg來台灣chìn前，去過Zurich（蘇黎世）拜訪bat來關山三tang ê George Hess（喬治•赫斯）先生，目前伊tī瑞士擔任精神科醫師。

　　每一年阮lóng會去關山探望chiahê修女，印象相當深刻ê是五tang前，阮一家夥去看in，離開chìn前，我對in講：「請m̄免細jī，若是有需要我鬥saⁿ工ê所在，請kā我講。」裴修女回答我講：「盧牧師，請hō͘阮修女。」我hit時一聽tio̍h，kuiê人lóng gônggia̍h去。我na̍h可能hō͘ in修女neh？但是伊chit句話已經講出一ê重要事實：願意獻身做修女ê人，已經jú來jú少lo̍h。

　　五十二tang前，mā就是一九五五年，chit群來自瑞士ê修女tī台東khiā起，續來tī關山開一間有二十床ê病院，而且tī台東成功鎮開診所，tī大武鄉尚武村開辦「救星教養院」（目前已經soa到台東康樂，oa台東機場），專門收容腦性麻痺ê gín'á。五十二tang前，chit群來自全世界siōng美麗ê國家ê瑞士籍修女，ta̍k位看來lóng真美麗吸引人，in ê面不時掛tio̍h笑容。In kā醫院整理清氣ka無半點la̍tsa̍p，每一ê拜六lóng是teh大拼掃。In mā親自訓練原住民女青年做各種工作，包括醫護kap灶腳、病房ê si̍t頭，ta̍k項lóng是親手去做。

　　Chiahê修女in lóng是訓練有素ê醫療工作者，但是每工透早in lóng會到對面ê天主教堂去祈禱，mā tī病院內設有一間小小教堂，作為tiàm靜祈禱之用。In特別關心原住民，對in ê醫藥收費真低，三十三tang前，阮chhōa gín'á去看病ê時，the̍h一禮拜ê感冒、嗽藥a，kanta ái十箍銀nia。所以，到chit間病院看病ê人，原住民算多數，平地人非常少。原因是修女in從來m̄ bat chhínchhái 注射，除非確實有必要。Hit時台灣庄腳ê私人診所，lóng kha̍pbōe tio̍h就kap人吊大tâng，kahná平地人真愛吊大tâng ê款。一般ê病，lóng是修女in teh看，若是in認為嚴重ê，chiah轉hō͘醫生看。一ê醫生一工（tùi echái九點到下晡四點）siōng多bōe看超過二十ê病人，原因是醫師看一ê病人大約需要半點鐘以上（時間包括透過一位邱修女將醫師ê話tùi德語翻譯做華語、台語在內）。

　　五十二tang當中，in有ê人已經過身，mā有ê人因為年歲真大無法度koh繼續做si̍t，才tńg去瑞士修院終老。到taⁿ留落來而且kap阮真好ê，iáu有葛修女、布修女（tī台東成功鎮診所），in兩人目前lóng偏重做居家看護ê khangkhōe。Tī關山養護中心ê有馬修女、饒修女、裴修女、高修女（伊是原住民布農族人，目前做養護中心ê院長）等。只要小khóa算一lè，tùi少年到chi̍tchūn，in tī台灣至少已經超過四十二tang以上ê時間，當年來台灣可能kanta二十幾、三十外歲，chi̍tmá soah已經是六十幾、七十外歲ê老修女loh。我ta̍k年tńg去一chōa看in，心境ná親像去「朝聖」仝款。看in用不變ê心志將一生奉獻tī醫療傳道工作上，lóng會hō͘我真chè鼓勵，而且kohkhah堅定我獻身ê使命感。

　　過去十tang，in當中有kúinā位已經得tio̍h政府頒發ê醫療奉獻獎，但是mā有kúinā位婉轉拒絕政府ê好意，布修女就是其中ê一ê。我問伊為怎樣無beh接受chit ê嘉獎？伊講已經有人得tio̍h就好。我聽了kohkhah感動。

　　Chiahê修女以前lóng無希望有新聞媒體來公開報導in，原因是in一直感覺ánne真無符合聖經ê教示。但是真chè tāichì ê發展總是非常趣味，jú無想beh hō͘人知影ê善行，總是有hō͘人廣傳ê時chūn。Chit幾年來，有jú來jú chè有關chit陣修女ê報導出來。In ná來自比利時ê石仁愛修女將一生奉獻hō͘馬祖居民仝款，石修女是tī一九六六年來到台灣，一九七四年tī金門金城醫院服務，續來tī一九七六年來到馬祖了後，就無koh再離開過，一生為馬祖婦女接生êⁿa，mā為民眾看病。Koh親像因為經過我ê紹介了後，hō͘陳水扁總統特別去澎湖探訪躺tī病床頂ê白寶珠姑娘仝款，伊kā澎湖所有thaikoh病患醫治ká非常好，hō͘外界評鑑做台灣thaikoh病治療siōng成功ê專家。Chiahê宣教師lóng是用盡一生奉獻tī chit塊土地kap人民身上。In lóng m̄無受tiōh媒體ê關愛，卻lóng是當地人民眼中ê生命ê「守護者」。

　　我不時teh想一件tāichí：為怎樣in kap真chē神父仝款，到一ê宣教區去了後，就願意kā一生ê生命放tī hit ê所在？除非差會有意見，將in調離，若無，in kanta會深耕落去。為怎樣會ánne？這是我時常tī思考ê問題；mā tùi chia，啟發我teh想chitê問題：一間anchóaⁿ ê教會會hō͘傳道者願意kā一生ê生命就tī當地奉獻落去？另外，我mā一再思考一ê課題：教會ái怎樣幫贊傳道者維持獻身ê使命感？

　　有一pái我kap鄭仰恩牧師交談，伊講每pái畢業生要離開學校，伊lóng會提醒in，mài tī一、兩tang了後tńg來，hō͘伊看tio̍h in ê時chūn，發覺jú來jú生份loh，koh經過幾tang了後，又koh tú tio̍h in ê時，竟然感覺無熟sai in loh！當然，伊所講ê「熟sai」、「生份」，意思是指畢業去做傳道了後，竟然變成另外一ê人，無koh像kha早學生時代hit種純樸、可愛、天真、有理想、有使命感loh。我聽了以後，感觸真深。鄭仰恩牧師ánne講，是teh強調學校kā學生教ka好好，soah tī in畢業了後到教會去工作ê時，往往因為牧會ê環境、中會傳道者同工ê生態，hō͘真chè taⁿ畢業ê學生真緊to̍h改變loh。若是ánne ê看法是正確ê，ánne，除了教會本身有問題以外，可能iáu有另外一ê原因，就是神學訓練ê過程無夠謹慎，講白一kóa，就是「品管」可能需要加強。當然，這只是我ê淺見，需要kohkhah chè ê研究來kā伊探討。

　　過去每pái聽tio̍h chiahê修女in得tio̍h衛生署ê獎賞ê時，我lóng會聽tio̍h chit款ê聲音：「怎樣lóng是外國人？而且差不多lóng是宣教師？」其實，這是一ê無解ê問題，但是我知影in chiah是影響我siōng深遠ê信仰同伴。

盧俊義牧師的個人網站。