《台灣之愛：盧俊義牧會筆記》

| | | 轉寄

咱長老教會是真有實力ê

作者 盧俊義 2007.07.01

Chitpái「南與北」出版社出兩本冊，一是《天天經歷復活的喜悅》，另外一本《活像耶穌》。Chit兩本lóng是tùi德國聖本篤修會ê古倫神父（Anselm Grün）之作品翻譯過來ê；前一本冊ê翻譯者是我以前tī教會公報社e同工范瑞薇姊妹，á負責促成chitê出版社ê，mā是我以前ê同工吳信如老師（阮辦公室lóng ánne稱呼伊，因為伊bat來咱東門學苑授過課）。

吳信如老師ài創辦出版社，有真chē理想，伊chhōe我談chìn前，就已經先kap瑞薇談過lah。伊希望我ē tàng幫忙，除chhōe資金協助以外，mā幫忙思考怎樣將冊推廣出去ê問題。我kā伊講一個siōng基本ê認識：只要ē tàng phah通咱長老教會ê讀冊風氣，hō͘大家知影這是好冊，ánne就有夠loh。我答應in幫忙chhōe資金，同時mā明明白白來提醒伊，chiahê贊助ê資金無可能永遠不斷來支持落去，因此，出版社必須朝向自立更生ê途徑發展。我ê經驗是只要一刷有二千本ē tàng出盡，就bē一直虧損落去，ánne chiah是基本生存之道。另外，我ē tàng chhōe tio̍h支持舉辦特別講座ê經費，但基本上，若是出版社維持bē落去，辦講座mā是無jōa大意義。

會ánne kā伊講，是因為我發現年輕一代ê朋友真有意思，總是tī iáu無開始動手做事chìn前，就先講一大堆，連冊ē tàng賣得出去無lóng iáu m̄知，就teh談boeh聘請作者來開講ê事，這未免講了siuⁿ遠lah。吳信如老師是一個真有理想ê青年（其實，kap我同工過ê青年總是會有chit種ê毛病，應該是受tio̍h我ê影響pah），一直認為基督教信仰ê書籍應該朝向社會大眾化ê方向去努力，ē tàng hō͘社會大眾lóng接受ê冊，chiah會是真正ê好冊。這hō͘我想起日本文學家遠藤周作所寫ê冊，ná親像是《沉默》、《深河》等，我同意chit種ê思維，但這並m̄是一件容易ê事。伊真熱心來講述家己過去有kúinā年時間，tī出版界工作ê各種經驗，á我則是一再提醒伊，我對現有基督教會生態ê認知，若是beh突破，有toh幾位空間是thang努力開發ê。

就ánne，tùi出版社ê命名開始思想，最後決定用「南與北」。Chitê命名ê過程真有趣味：一是咱長老教會tùi宣教之初，就有「南部」kap「北部」ê分界線，直到現在lóng iáu看會出「南神」kap「北神」（現在kā伊稱做「台神」）之間ê無仝形象。但mā因此，hō͘ kuiê咱台灣長老教會tī事工ê推動上，總感覺有一個「溝」tīteh。選總會幹部就是一個真典型ê例子，每年lóng會依循「一南一北」模式推選，過去iáu bat為tio̍h beh「卡位」而討論過「南與北」ê定義，講破mā只是想beh tī總會幹部位階上有份。另外一方面，台灣kuiê社會mā是仝款，南kap北之間差距真大，而且有日漸giú大差距ê現象。若是將眼光放大來看，kuiê世界mā是有「南」kap「北」發展上ê差距。Tùi ánne，將chitê出版社取名為「南與北」，mā是有意說明這是一個跨越地理、歷史ê文字事工，所出版ê冊，無論是南或是北，咱確信lóng是值得大家詳細一讀ê好冊。

開始之初，我mā kā吳信如老師講，只要將咱長老教會掠tiâu，就算無經過一般冊房、冊商批發協助，只要咱長老教會ê傳道者歡喜讀冊，而且願意紹介，加上神學院願意配合推介hō͘神學生，ánne就有夠。這是我過去tī教會公報社工作ê經歷，並m̄是教會公報無內容，kohkhah m̄是教會公報有甚麼問題，卻是教會ê牧長無願意幫忙推介，ná親像「新使者」出版聖誕書卡ê經驗仝款，真chē長老教會ê傳道者連看都m̄看，kohkhah免講beh期待in推薦hō͘信徒購買，用來當作傳福音ê媒介。若是每間教會lóng像咱教會ánne，大力支持聖誕書卡ê出版，而且樂意購買來捐贈hō͘更生團契轉送hō͘受刑人，m̄ nā ē tàng得tio̍h傳福音ê效果，對總會teh推動ê文字事工，kohkhah是一大鼓勵，hō͘ kohkhah chē青年朋友得tio̍h信心，會繼續開發新ê、kohkhah好ê文字刊物。

阮三個人經過開會討論取得共識了後，吳信如老師kap范瑞薇姊妹，就分別去chhōe神學院ê牧長，mā去拜訪天主教會ê神父，甚至tī冊出版了後，iáu寄去送hō͘教會牧長看，請in推薦hō͘信徒閱讀，並且到各地教會去作chit兩本冊ê簡報。結果，無想tio̍h chit兩本冊一出來，銷售ê情形超過預期ê好，特別hō͘人欣慰ê是，連天主教會lóng相當積極teh推薦chit兩本冊，chit點ē sái講是siōng hō͘咱振奮ê事。

我tú tio̍h永望出版社頭家姜寶慶兄弟，伊kā我講，從來無像chitpái出版chit兩本冊tùi教會得tio̍h相當好ê評價，伊講反應lóng是正面ê，而且真chē教會lóng是用來當作小組聚會研讀ê教材，聽起來就真安慰。

吳信如老師kā我講，總會年會期間，副議長林宗正牧師甚至大力推薦chit兩本冊，結果tī開會ê第二工，隸屬總會ê「使徒冊房」就無冊lah，趕緊進冊以補足眾議員ê需要。這mā是我kap吳信如老師講ê，只要咱長老教會ê傳道者有警覺、意識tio̍h家己教會ê重要kap動力，beh推動事工是真容易ê。為甚麼總是beh kap他教派ê人起舞？我到現在lóng iáu bē清楚，這到底是怎樣一回事，特別是tī真chē方面，帶有聖經神學觀念上ê差異，尚且等待對話。因此，若是ē tàng先穩固咱長老教會對自身認同感ê提升，我深信幾年後，咱長老教會tī台灣ê教勢一定會大幅成長。

最近吳信如老師kā我講，已經邀請tio̍h古倫神父明年初來台灣演講，而且伊已答應到咱教會來主日禮拜講道，到時koh來辦一個作者簽名會，ná親像舊年（二○○六）十二月邀請日本ê精神醫學專家─《神聖ê愚者》一冊ê作者樋口和彥牧師tī咱教會講道，並且tī講道了後有一個簽名會仝款。我mā計劃tī咱教會為古倫神父辦兩場專題演講，ánne一定會真有意思，一方面thang hō͘咱教會kap神學教育合作之外，mā hō͘咱教會有能力舉辦類似「信徒神學」學術演講ê機會。假使該演講會辦得成功，我相信這對咱教會來講，可能會出現另外一種新ê異象kap願景。

Tùi chia我想tio̍h台灣教會公報chit份古老刊物ê演變，並對伊最近改版ê方式、內容，我只ē tàng講祝福伊ē tàng成功。久長以來，我一直堅持一個理念：教會公報m̄是只teh討好、取悅讀者，伊並m̄是為tio̍h營利而存在，伊有一個非常重要ê角色kap使命，就是beh替咱長老教會kap社會之間ê關係，留落來歷史資料，同時iáu tio̍h擔起教育信徒ê使命。若是失去chit種了解，教會公報ê存在就會失去伊存在ê意義，就算發行量超過一萬、二萬、三萬，甚至五萬或kohkhah chē，mā無甚麼意義thang講。

早期咱台灣社會傳播媒體非常缺乏ê時chūn，教會公報tī信徒ê家庭發行量相當廣闊，原因無甚麼，就是因為傳道者真鼓勵信徒閱讀，一則thang幫助信徒認識聖經信息，二則thang幫助信徒學習羅馬拼音。因為有傳道者努力推介，教會公報tī siōng艱難ê時空下，一直維持相當高ê訂閱普及率。雖然伊bat有過被日本政府勒令停刊，mā bat有過真長一段時間，被國民黨政府透過郵局攔截、沒收。但因為傳道者想盡辦法beh維護chit份刊物，m̄ nā hō͘伊生存落來，一直到今á日iáu是台灣歷史siōng久長ê報紙刊物。現在我siōng擔心ê一點：只tī發行量。Ánne，真自然就會在乎讀者ê口味，而為tio̍h beh討讀者喜樂，可能有一工，伊有存在á無，將無koh是眾信徒所關注ê了。



傳道者mā是ánne，如果一個傳道者只致意取悅信徒所愛，講信徒所想beh聽ê，有一工，傳道者會失去伊獻身ê使命感，á該教會kohkhah bē有甚麼異象thang講，因為大家lóng活tī「你儂、我儂」ê氣氛中，chit種ê教會，chit種信仰團契，是bē有甚麼生命力ê。傳道者ê講道應該有一份堅持，就是beh對聖經忠實，並且知影用之來教育信徒。但beh持守chit份堅持，並m̄是一件簡單ê tāichì。

我bat ánne講過，鼓勵一個人去辦雜誌刊物或做出版ê工作，等於是teh害chitê人仝款。因為tī一個無歡喜讀冊，或是kā讀教科冊當作讀冊ê社會，這確實是一件食力不討好ê事。因此，「南與北」出版社ê誕生，而且開始ê第一步就行得真穩健，這固然是件thang喜ê事，但怎樣hō͘伊行得kohkhah好，就必須堅持只出好冊，若無就無生命ê意義thang講。

盧俊義牧師的個人網站。