《台灣之愛：盧俊義牧會筆記》

| | | 轉寄

受邀請去密西根訪問

作者 盧俊義 2007.12.25

九月一日中晝，阮由巴西倒tńg到舊金山，tī當地停留幾工歇睏、整理衣物了後，九月五日暗時，我臨時應聖荷西台美教會ê邀請，去做一場演講。隔工六日上午，我自己搭西北航空班機前往底特律，hō͘淑英留tī舊金山歇睏。由舊金山到底特律機場，需要飛四個半小時之久，但是美國國內航線並無供應餐點，只有提供飲料，這kap亞洲航線，雖罔由台北飛琉球chiah一個半小時，iáu是有供應餐點ê服務大無相仝。

游信源kap藍冊璇chit對少年夫婦早to̍h tī機場thèng候，chitpái受邀去密西根台灣人安雅堡教會（Aⁿ Arbor）演講，mā是in向教會建議所安排ê。游信源目前tī密西根大學生命科學研究所讀博士課程，冊璇已經得tio̍h哥倫比亞大學碩士學位，目前teh工作。2006年出國前，伊bat來咱教會協助暑假兒童營，伊kap信源lóng是社青查經班ê朋友。

Tī當地牧會ê是李昱平牧師；伊tī美國成長、受教育，mā tī美國做過senglí，後來決定獻身傳道才tńg台神讀冊。台神畢業後bat tī中壢kap台中忠孝路牧會。像伊chit種ê條件非常適合tī美國ê台灣人教會牧會，一則語言無障礙，二則較了解台灣教會生態kap台灣社會ê習性。

六日暗時，我kap李牧師夫婦、信源、冊璇等人針對「同志」議題有一kóa無仝觀點ê分享kap意見交換；mā tùi in嘴中，知影一kóa留學生ê概況，hit暗我tòa tī信源in租來ê厝。

七日上午，信源去研究室，冊璇去上班，李牧師送牧師娘去機場（參加北歐旅行）後，開車來chhōa我去密西根大學繞校園一kho͘'á。這是一間歷史悠久而且出名世界ê大學，kuiê密西根市就是一座大學城。我看tio̍h校園內有兩座禮拜堂，而安雅堡教會就是借用「第一長老教會」副堂聚會ê。李牧師kā我講目前「第一長老教會」有一千gōa人tī聚會，這對tī美國ê長老教會來講，是間規模不小ê教會。該教會非常關心台灣人教會，也bat向李牧師提議將安雅堡教會納入該教會ê肢體之一。我向李牧師表示這是非常好ê意見，應該ē tàng認真思考。我mā分享咱教會將原住民聚會納入咱教會肢體ê經驗。伊講伊bat向教會幹部、同工表達過，大家kahná心理上iáu未準備好。

Hit工暗時tī安雅堡教會舉行一場專題演講。地點是tī「第一長老教會」供hō͘安雅堡教會聚會ê副堂，約thang容納一百五十人。Hit暗出席大約有四十人，其中有十人是來自一小時車程之外ê「車城」台灣人教會會友。我講台灣ê故事，大家tī會後向我反應講，in從來無聽過，mā m̄知影台灣有chiahni̍hchē感動人ê事蹟。

Tī chia，我tú tio̍h以前bat tī咱教會參加過查經班kap主日禮拜ê鄭瑞澤教授夫婦；鄭教授是tùi政大退休，而夫人陳須姬教授是tùi師大退休，兩人tī四年前移居來美國kap gín'á作伙。In當年來咱東門教會，是透過王芬芳姊ê紹介kap引chhōa，目前已經受洗，而且每禮拜lóng參加安雅堡教會ê聚會。In講非常想念tī東門聚會ê hit段日子，in感覺東門教會是hō͘ in ê信仰得tio̍h啟蒙ê「母會」。In特別ài我向王芬芳姊、廖恩賜長老夫婦、郭榮彬長老等人請安。當in問kap江陳阿香姊近況，而知影已安息時，感覺非常ê不捨，因為in夫婦bat參加過日語聚會，當時lóng受阿香姊ê關心。

Tī異鄉tú tio̍h家己ê會友，心中非常喜樂，lóng是有講bē盡ê話題；tī chitpái出國訪問、演講中，lóng tú tio̍h有tī聽咱教會查經班kap主日講道的錄音CD ê兄姊，tī安雅堡教會mā不例外，有一位廖江滄兄就是。Bat有一位姊妹the̍h我ê查經班錄音CD hō͘伊聽，伊講：「別人聽完，chiah換我聽；我聽完，koh再換別人聽。」我kā伊講講：「lín ē tàng自行copy ah，m̄免等chiahni̍h久。只要是我ê查經、講道，lóng sī teh傳福音；傳福音，就無版權thang講。儘管copy無要緊。」這是九月八日上午，tī intau裡舉行青年幹部聚會後，我kā伊講ê話。我mā kā伊講，tńg來台灣後，我會直接寄錄音CD hō͘伊。 安雅堡教會會友無chē，平時大約有五十人聚會，有時會加一點á；教會裡有幾個長輩家庭，in lóng是早期來美國讀冊後，定居落來ê；mā有tī chit所在工作而後定居落來ê。In參與tī協助李牧師關心留學生ê信仰事工中，甘願奉獻一切為少年留學生服務。因此若tio̍h講基督ê愛，tī chit群留學生嘴中ê「長輩」身上便thang看會出來，像廖江滄夫婦，大家稱in「廖爸爸」、「廖媽媽」；而黃邦男兄、謝淑卿姊chit對夫婦，kohkhah是對留學生奉獻所有，真感心。關於in真chē感動人ê故事，lóng是信源、冊璇kā我講ê。 九月八日下晡五點半，tī信源、冊璇租居ê社區交誼廳舉行迎接新留學生ê聚餐活動，會友們大家同齊出力協助，準備ê故鄉ê菜餚，mā設法聯繫所有ê留學生來參加。就tī chit場約四十餘名台灣學生參加ê聚會中，我tú tio̍h東元以前tī佛羅里達大學ê室友雅倫君；伊講一年gōa前由佛大tńg來此攻讀「資訊工程」；mā tú tio̍h紀盈長老ê學生京美，伊tī密西根大學專攻作曲ê博士學位。Chit場聚會由教會青年帶動唱，信源帶大家sńg彼此認bat ê「賓果」遊戲，最後由我紹介基督教信仰。李牧師真用心，伊向「第一長老教會」借用人力，協助chiahê留學生得tio̍h至少一禮拜thang多一pái學聽、講英語ê機會。 我lóng是teh想：若是ē tàng好好á規劃，用些心思，一定ē tàng hō͘ chiahê撒tī留學生身上ê福音種子，得tio̍h豐碩ê果實。這是我所想tio̍h ê，但應該怎樣做？我是真外行。送行所有學生i後，我kap信源、冊璇tńg來到in厝內，一直kap in聊到深暝，話題lóng是離bōe開學生生活kap福音事工。真chē時chūn我lóng會ánne想：一間教會ài認真做福音事工，真正做不完，m̄ nā是關係到財力問題，kohkhah有人力上ê困難，ná親像咱教會tī三義、七美等教會協助兒童事工仝款。這mā hō͘我想起摩門教tī組織上ê嚴格規律：每一個家庭lóng必須負起家己子女到外地傳福音工作兩年ê經費；mā因為ánne，摩門教tī這五十年來，已tī世界各地建立介大ê基礎。 禮拜日（九月九日）上午，阮同齊搭李牧師ê車去「車城」長老教會（tī底特律），由我講道。Tī chia，我tú tio̍h久仰ê張晃家牧師夫婦。張晃家牧師是東海大學畢業後獻身進入南神就讀，南神畢業後受派到台東關山教會牧會；了後，伊響應當時教育廳ê徵召，帶一位教會劉姓青年去開創「蘭嶼國中」，那真正是「校長兼敲鐘」ê時期，伊以牧會ê方式去經營國中。經過伊幾年ê用心後，蘭嶼國中成立起來，但教育廳卻隨時派人去接收落來。伊無講第二句話，便回台東更生教會牧會。一九七四年，我去關山牧會，就聽會友述講伊ê故事。後來伊移民美國，也bat tī俄亥俄ê哥倫巴斯（Columbus）牧會，咱教會莊路德夫婦、方耀群等人lóng bat kap張晃家牧師同工過。目前伊已退休，夫婦兩人lóng tī「車城」教會禮拜。這間教會約有四十名兄姊聚會，無傳道人。無傳道人牧養ê教會，表現ê是會友tī信仰kap信心上會漸漸冷淡，無向心力。

「車城」教會túteh聘牧中，已經有人選，chit點顛倒是hō͘人欣慰。如同在南美看tio̍h ê台灣人教會，tī北美mā仝款，各地lóng欠缺傳道人。我來美國時，便聽講林瑞隆牧師tehbeh受聘來北美地區牧會，我卻期待伊會留tī台灣，因為北美不欠神學素養高ê牧者，若林牧師離開台灣，實在是台灣教會ê損失，因為伊是一位真棒ê神學教育工作者。

「車城」教會是tī十點半聚會，了後大家同齊享用愛餐，阮tī十二點半離開，快速tńg來到密西根ê安雅堡教會，hia是下晡兩點禮拜，hit工mā是由我講道。

來密西根，看tio̍h廣大校園，經過設立tī校園內、出名世界ê「輝瑞藥廠」（Pfizer）之研發中心。李牧師kā我講：該藥廠tehbeh關閉，有多達二千名員工失業，連帶ê是房價重挫，處處lóng是藥廠員工boeh ài tio̍h出賣 in ê厝。Chit幾年來，美國經濟不景氣，koh加上phah伊拉克戰爭，一直無法度如布希總統之心願順利終結，ta̍k工lóng有美國兵傷亡事件之報導。Tī密西根地區，不時會看tio̍h加油站或sī其它地方有降半旗ê鏡頭，李牧師kā我講，he是因為有該地出身ê軍人tī伊拉克戰亡之故。戰爭，雖然hō͘美國軍事工業興旺，但是卻加添人民稅賦ê負擔，民生問題就相對日日嚴重。譬如一位美國兵陣亡或傷殘，政府就必須撫養chit位兵ah年老ê父母kap bó͘kiáⁿ，直到年老者往生，或幼細漢gín'á長大成人；chiahê lóng會加重全體人民稅金ê負擔。Koh加上中國產品叩關，特別日用品、農產品等，迫使美國人ê工廠關門，失業者日日增加，影響ê lóng是低層民眾ê生存空間kap生活需要。Chiahê問題lóng m̄ nā是像我所講ê chiahni̍h簡單，其中牽連了真chē利益交換kap國際政治利弊ê問題，我只是將隨手想tio̍h寫落來chiahê筆記。

九月十日上午，信源趕去學校，伊tī上午十點有考試，冊璇因身軀無爽快tī厝歇睏。十點，李牧師準時開車來載我去機場，我順利tńg去舊金山。續落來，我tī舊金山有演講，時間是安排tī九月十四、十五日，而十六日tī迦南教會演講後，就bóe結束所有ê行程。

盧俊義牧師的個人網站。