《台灣另類牧師．醫師─謝緯》

 | | | 轉寄

303 決心報考日本醫專

作者 陳金興 2011.08.07

做醫生是謝緯 ê 願望， tī 醫治病人 ê 同時， mā ē thang 傳道理，四界去宣揚福音。 Chit 款醫病方式 ê 自由傳道， kohkhah 是伊自頭到尾所期待 ê。但是， tī 伊 chìn 前，無一個台灣人是 lia̍h 「醫療宣教」做一生職志 ê ， mā 就是講 chit 種做法並「無例可循」，致使青年謝緯一直處於 tiûtû (猶豫)、困惑、無助，以及 m̄ 知如何是好 ê 中間。 M̄ koh ， tī 神學校研讀神學二年了後，謝緯無 hō͘ 厝裡 ê 人知影 ê 狀況下，開始「偷偷 á」動手準備考醫學院 ê 課程。

伊 tī 1936 年 4 月 20 日 ê 日記上按呢寫，講： 「Tùi chit 學期開始，需要準備畢業了後 ê 升學考試 lah ，目標是醫學院。但 chitê tāichì 除了 tī chia ê 朋友以外， lóng未 (boē) hō͘ 人知影。過去我有二擺(高校考試)痛苦失敗 ê 經驗， chitpái 絕對 bē tàng koh 重覆失敗，想 beh 好好 á 打拚用功， iáubeh 將家己用功 ê 份量，每工 kā 記錄落來。忠實 kā 記落來 ê 話，可能就 bē pîntoāⁿ lah！」

事實上，謝緯心中 mā 為 tio̍h 神學校畢業了後 tio̍h 先做傳道師，或是 (he̍ksī) 到日本讀醫學校 teh pehpak 。1936 年 5 月初 2 到初 9，中國佈道家宋尚節 (19011944) 博士 tī 台南神學校操場，搭竹棚仔作為會場，舉行「奮興佈道大會」，聚集了大約 5千人。正當心頭拿 (lia̍h) boē 定， khiātī 十字路口徘徊、操煩 ê 謝緯， mā tī 人群中央 (tiongng)。聽了宋尚節博士 ê 一 koá 話了後，伊 hit 粒困惑 ê 心， chiah 得 tio̍h tháu 放。 Tī 明白上帝 ê 旨意了後，伊 kohkhah 堅定家己 ê 方向。





● 宋尚節博士1936年來台舉行佈道大會。








伊 tī 日記頂面按呢寫： 「我想宋尚節博士 ê 話，已經 hō͘ 我確定家己 ê 生活方針 lah。當我因為是 m̄ 是 thang 進入醫學院 á 陷入苦悶 ê 時，聽了宋博士 ê 一 koá 話，原本內心 ê 自責竟然奇妙消失。 M̄ nā 按呢 nātiaⁿ ，就 tī hit 瞬間 (sùnkan) ，我已經堅信我所做 ê 決定是正確 ê 。就 ná 準宋博士所講 ê ，或做傳道師，或做醫生， lóng 是為上帝 teh 工作。因為 chit 句話，我 ê 內心有非常清楚 ê 感動。同時， ùi chit 時了後，我立志無因為名譽心（虛榮心） iôchoah ， tùi 按呢 beh 受純然 ê 聖化，做上帝 ê 器具來活動。若 ē tàng 堅強向 chit ê 目標邁進，我 ê 名譽心就會消除。上帝 ah！ 我將家己獻 hō͘ 祢，做祢 ê 器具，請祢歡喜接納。

Tī 宋尚節 ê「奮興佈道大會」了後，神學校 mā 組一 ê 佈道團，前往附近去佈道， 5 月 15 日這一工，是謝緯第一 pái tī 街頭佈道，地點是 tī 現今新豐鎮公所前 ê 廣場。神學校畢業 ê 前一年， 1937 年 4 月 25 日 ê 日記上 koh 看 tio̍h 謝緯內心 ê 爭戰： 「我迷路 la̍h 。一年了後我 ài 怎樣行？去日本內地就讀？ á 是照別人 ê 推薦，冒險渡洋(去美國)？去日本是照家己 ê 計畫，渡洋有真大 ê 吸引力……Aih，beh 選擇 to̍h 一邊 chiah 好？有人講渡洋 mā 是另外一種選擇，不過 soà 破壞了我 ê 計畫……tio̍h 怎樣處理卡好？」