|
謝緯tī1916年(日本時代)出世，tī台灣讀公學校、中學以及神學院。1938年去日本讀醫學，1945年kap楊瓊英醫師結婚，1946年回台。1951年去美國進修三年，1955年開始他tī台灣ê醫療宣教事工，直到1970年6月17日受主揀召。
|
|
Beh 按怎辦理謝緯 ê 告別式，真 chē單位 lóng 極力 teh 爭取， siochiⁿ 真久。為 tio̍h 和平解決 chit 層代誌，最後由謝緯胞弟謝綸出面協調，以「體會故人生前做人心意」─ 處理代誌以「圓滿」為原則，來讓步 hō͘ 總會。 Tùi 按呢以「總會葬」儀式來送別謝緯。
|
|
1970年6月17日下晡1點55分，謝緯開車經過名間鄉，急 beh 往二林為患者開刀，意外車禍身亡。他 ê 牽手楊瓊英 tī 車禍現場 the̍h 手巾 á 出來， chhit 謝緯 ê 面，家己 mā 目屎流、目屎滴，一面哭、一面吐大氣，講：「Ah……你……真可憐，真可憐啊！一點點 á to 無歇睏......。」楊瓊英心內憂傷痛苦，giōng beh 死......
|
|
謝緯講：「我必須二點到二林。我若慢一分鐘到病院，病患就加痛苦一分鐘，我 bē sái hō͘ 病人加受一分鐘ê痛苦。若是我ē tàng khah早到，甚至ē tàng加救一條生命！」講息，m̄ 願勞煩別人 ê 謝緯，一 ê 人親身開車前往二林。
|
|
謝緯有時身體 siāntauhtauh，beh出門ê時，關心ê牽手lóng會問他：「為什麼無愛加歇睏一下？」謝緯ìn講：「死，就ē tàng歇睏。」謝緯夫人bat感慨按呢講：「莫怪他會thiám kah倒落去，就算是鐵phah ê身體，mā bē堪得這呢久長ê精力透支ah！」
|
|
謝緯tī他有生之年，維護了長老教會ê主權kap尊嚴，mā用他堅定ê信仰立場，保tiâu台灣基督長老教會總會tī WCC 組織ê席位。但是，總會無法度忍受政府ê壓力，tī謝緯1970年6月過往了後，猶原被迫退出了WCC。直到10年後 (1980) chiah重返 WCC。
|
|
六○年代，國民黨政權認為「普世教會協會」(WCC)是「容共團體」，並要求長老教會退出chit種組織。擔任總會議長ê謝緯，猶原勇敢面對所有挑戰，希望ē tàng「圓滿」解決chitê 事件，同時mā ē tàng捍衛長老教會ê主體性。
|
|
謝緯擔任台中中會議長(1966)，總會副議長(1968)以及總會議長(1969)攏是tī無出席會議ê情形之下，被選出來。thang講是去hō͘ 人強sak出來ê。雖然m̄是出tī本身ê意願，謝緯為tio̍h beh hō͘ 代誌「khah圓滿khah好」，他路尾亦是出來擔任chiahê 職務。
|
|
雖然m̄是出tī本身ê意願，1966年謝緯受選擔任台中中會議長，koh tī未出席會議ê情形之下，1969年被推選做台灣基督長老教會總會議長。他除了日暝tī山地kap沿海之間來來去去，從事醫療救人ê工作以外，koh tio̍h處理教會事務，tùi中會到總會，致使他ê工作kohkhah繁重。
|
|
因為瑪喜樂有照顧小兒麻痺患者chit方面ê經驗，所以當謝緯tī二基病院beh成立「附設小兒麻痺保育院」ê 時，頭一個想tio̍h ê siōng適當人選，就是她。
|
|
謝緯去美國進修tehbeh tńg來台灣chìn前，1954年7月tī加州舊金山「柏克萊第一長老教會」ê祈禱會中，講述台灣現今ê醫療狀況，以及他計劃tī tńg來台灣了後ê宣教工作kap醫療理想時，感動了mā去參加祈禱會ê瑪喜樂太太。
|
|
1970年6月謝緯受主揀召，過無joā久，二基病院業務開始萎縮，收入無法度維持營運，員工續落來陸續離職，院務漸漸荒廢。吳震春看tio̍h chit種情形，禁bē tiâu心中一chūn悲哀，認為「二林基督教病院ê荒廢，是基督徒ê見笑代」。因此，伊開始積極二基ê「復原」工作。
|
|
雖bóng tùi南投去二林 ê 路途真遙遠，謝緯猶原 kā 病院 ê 員工講：「無論 tang 時病人需要我，我會隨時來。」
|
|
謝緯認為做醫生ê，應該抱tio̍h救人第一為宗旨，絕對m̄是kanta為tio̍h thàn錢nātiāⁿ，因為，救人所得tio̍h ê快樂，時常贏過金錢。伊講：「做醫生ê快樂，m̄是得tio̍h金錢，是得tio̍h患者ê sìnnāi。」
|
|
中中醫療團tī台中kap彰化沿海地區巡迴醫療3年了後，謝緯選定二林鎮來創設基督教病院。1964年11月初3 tī當時人口數5萬6千goā人ê二林鎮成立「基督教沿海巡迴醫療病院」。這是第一間由台灣人所獨力創辦ê教會病院，是台灣人ê驕傲，mā顯出台灣人ê尊嚴。
|
|
謝緯tùi 1961年起，積極投入tī差不多得bē tio̍h任何醫療援助ê中部沿海地區ê教會醫療服務 ─ 「台中中會醫療服務團」。1964年創辦了第一間不靠外資，由台灣人家己興建ê基督教病院 ─「二林基督教病院」。當時長老教會各中會陸續成立醫療團，最後將醫療團發展成設立基督教病院ê，只有台中中會醫療團。二林基督教病院ê設立，以及二林喜樂保育院ê創辦，是醫療團tī彰化沿海地區「意外」ê成果，mā tī台灣醫療史內面，留落基督徒醫生tī偏遠地區美好ê腳跡。
|
|
謝緯寫信hō͘ 孫理蓮，表示家己已經kap王金河談過相關ê問題。伊感覺有chit koá tāichì必須ài說明清楚，chiah ē tàng化解in二人之間ê誤會。謝緯講：「人生ná親像一盤棋，有輸mā有贏，咱mài計較輸贏，只要專心、認真，抱tio̍h喜樂ê心情，盡本分去做就好lah。」
|
|
有一 pái，因為西德藥廠贈送一批藥劑 ê 關稅問題，hō͘ 王金河 kap孫理蓮中間產生誤會，「憐憫之門」mā 差一點 á 遭遇 tio̍h 停辦 ê 命運。經過謝緯 tī 王金河 kap 孫理蓮二人中間進行溝通 kap 了解了後，chiah hō͘ 真相大白。
|
|
1970年5月23日，謝緯 kap 夫人楊瓊英同齊前往北門，參加免費診所創辦10週年感恩禮拜，並以「為主甘願做戇人」為題證道。
|
|
包括謝綸kap助手劉敬成等醫護人員，早起10點 goā kap謝緯同齊坐計程車tùi南投鎮出發，接近下晡2點chiah來到，開始謝緯接續落來ê診療工作，tńg來到南投，已經是暗時10點40分。
|
|
謝緯看tio̍h chit種情形，心內真m̄ kam，隨時就答應孫理蓮ê邀請，決定beh到當地義診。1960年5月23日正式成立「北門憐憫之門免費診所」，由孫理蓮、王金河、謝緯負起醫治烏腳病患者ê責任。
|
|
王金河帶孫理蓮一陣人到烏腳病患ê厝內探訪，深入了解病患ê症狀以及生活狀況了後，tī台灣各地已經從事社會慈善事業真多年ê孫理蓮，心中出現了欲按怎進一步幫助烏腳病患ê念頭，烏腳病患者ê醫治，總算顯露出一道希望ê曙光。
|
|
1960年謝緯koh接受一項特別ê任務kap挑戰，就是將伊ê醫療觸角延伸到海邊，用伊hit雙非常有價值ê雙手，tī台南縣北門鄉替貧苦無助、痛苦無依ê烏腳病患者進行截肢手術。
|
|
等開刀息，謝緯叫in入去伊ê辦公室，對in講：「病人tī咱ê手中，任何ê動作lóng bē sái têngtâⁿ ê……chit項事bē tàng hònghòng。一旦入去開刀房，病人寶貴ê生命就掌握tī咱ê手裡，設使tī開刀ê過程我若有疏忽ê所在，lín護理人員mā有責任提醒醫生，因為，咱ê工作lóng仝款重要。」這是謝緯尊重生命ê態度。
|
|
孫理蓮bat講：「謝緯ê手實在太有價值lah」。伊講chit句話ê意思，表明謝緯ê手是beh為病人開刀， m̄是用來駛車ê。所以，為tio̍h無欲hō͘ 謝緯過頭操勞，tī伊41歲生日ê 1957年3月2日hit工，病院特別買一台紅色ê吉普仔車hō͘ 病院kap伊使用，mā聘請一位司機。
|
|
1955年，tī謝緯興建肺病療養院ê同時，mā同齊kap孫理蓮tī埔里鎮中山路起一間「基督教山地中心診所」(埔里基督教醫院前身)。這間診所tī仝年10月建設完成，1956年正月16舉行開幕典禮，第一位主治醫師是盧昆山，黃玉端是第一位護士，謝緯受邀請義務看診koh兼任第一任院長。
|
|
無偌久，孫理蓮tī埔里鎮內所起ê「基督教山地中心診所」，原住民患者jú來jú chē，所在不夠使用，孫理蓮就向謝緯借用設tī鎮郊鯉魚潭畔，tú 起好ê肺病療養院，來hō͘ 原住民患者使用。為tio̍h按呢，謝緯只好tī肺病療養院無偌遠ê所在，家己另外出錢koh再買八分地來起另外一間療養院。
|
|
1953年12月，孫理蓮親身去到美國水牛城探望謝緯，koh邀請伊tńg來台灣了後ē tàng同齊tī埔里地區起病院，為原住民服務。謝緯期待真久ê「基督教肺病療養院」，tī 1956年正月26日開幕。
|
|
1954年tú tùi美國進修回台ê謝緯，tú學tio̍h siōng新ê醫學技術，尤其是伊身兼醫生kap牧師兩種專業角色，tī當時ê台灣社會，thang講是不可多得ê人才。根據謝緯ê小學同學，tī南投開業ê葉國慶醫師轉述，當時台北馬偕紀念病院bat內定謝緯為hitê病院ê院長，謝緯kā伊婉拒，隨時全心投入醫療宣教ê事業。
|
|
謝緯tī美國前後三年ê外科進修，告一段落。1954年7月離開美國東部，沿途tī真chē場合說明伊來美國ê目的，以及tńg去台灣了後所beh進行ê醫療計畫來募款。到舊金山ê時，瑪喜樂太太（Mrs. Joyce Meredith McMillan）受tio̍h謝緯ê精神感動，當場就奉獻美金325元。8月底tńg來到故鄉南投，開始展開伊ê醫療宣教事業。
|
|
鮑伯‧馮雷醫師問謝緯，需要joāchē錢chiah ē tàng開始起一間療養院？謝緯回答講，差不多美金五千元。兩個人khêngkhêng 咧，身軀頂只有美金五kho͘ gîn。鮑伯笑笑á講：「這是一個好ê開始，你kā收起來，然後到我連絡ê教會去，kā咱所看tio̍h ê異象kāin講。」Tùi美金五kho͘ gîn ê信心開始，謝緯kap鮑伯‧馮雷分頭設法募款，以完成謝緯回台了後，tī埔里設立肺病療養院ê心願。
|
|
1953年3月，謝緯kā太太講，有一間神經外科病院同意伊去hitpêng進修。M̄ kú，院方kā伊講，若beh tīhia研究腦神經外科，至少tio̍h需要5年ê時間。原本伊計劃tī美國進修一、二年就beh回國，chit時koh聽講beh多留5年，伊一時m̄知如何是好，伊koh問太太ê意見。
|
|
1952年ê 2月初，因為tú到美國無偌久，語言kap文化mā tú仔teh學習kap適應，病院卻tī無事先通知ê情形下，將謝緯解聘，理由是因為伊ê英語無偌好 ..............
|
|
有一工，孫理蓮問謝緯是m̄是願意到美國去做進一步研習？伊講：「若按呢你就kohkhah ē tàng充實家己來為上帝做工，替病人服務。」對謝緯來講，這是另外一種挑戰，伊同意beh去美國。因此，謝緯離開門諾會山地醫療團ê工作，tī 1951年秋天前往美國進修外科手術。
|
|
有一工謝緯遇tio̍h孫理蓮教士，伊kā謝緯講，伊對山地同胞中間染病kap性命kiôngbeh無去ê人，內心有一種極大ê負擔。Tī將近一年ê工作中間，謝緯注意tio̍h 散赤ê原住民同胞。M̄ nā ánne，謝緯有kohkhah chē ê 心得：美國人比咱kohkhah拚(piàⁿ)；犧牲m̄是折磨、痛苦，顛倒是快樂。
|
|
In將一台美國軍用卡車，改裝做載運醫藥品kap罐頭、牛奶等補給品路用ê醫療專車，koh用peh山潦水ê方式，進入偏遠山區替原住民看病，這是台灣醫療史上第一批由外國宣教師 kap本地ê醫護人員、傳道者、翻譯人員所組成ê專業醫療團。
|
|
二次戰後台灣當時ê社會處境，衛生環境無好，民眾染tio̍h肺病ê人真chē，家境又sànchhiah，這種情形koh是山地鄉上（siōng）嚴重，是極需要社會援助ê 弱勢團體之一。真chē外國民間組織kap教會團體積極投入救濟ê行列，一方面協助政府從事戰後ê救援工作。仝這ê時陣，謝緯mā開始進行伊ê 醫療kap宣教事業。
|
|
當時設tī南投縣名間鄉ê赤水基督長老教會，已經二年無牧師牧會。陳辛修長老前往南投教會拜託吳天賜牧師與謝緯接洽，看會thang紹介伊去赤水鬥相共否(tàusaⁿkāng bò͘ )？
|
|
1945年8月15日，日本無條件投降。戰爭既然已經結束，謝緯帶tio̍h新婚5 kò goā月ê牽手，tī 1946年4月24日tńg來到台灣。 彼當時(hittongsî) 轉來到故鄉南投ê謝緯，已經完成神學kap醫學教育，伊無koh逃避，隨時開始伊ê傳道kap醫療事工。
|
|
1942年左右，tī留日家族ê聚會裡，楊瓊英kap謝緯koh相tú。楊瓊英對謝緯ê印象真好，因為伊真會曉照顧 kha̍h oàⁿ 到日本讀書 ê表兄弟姐妹，而且受過牧師養成教育ê謝緯，講話真實在，所以楊瓊英感覺謝緯是一個真有愛心koh真有責任感ê人。
|
|
對tī謝緯來講，1945年是伊生涯關鍵ê一年，mā是人生ê轉斡(tńgoat)點。大戰tehbeh結束ê前幾kògoā月，mā度過一段逃難ê日子。後來謝緯停止腳步，用平靜ê心思考：「我是teh逃避什麼leh？當然m̄是上帝。我若是teh逃避人，ánne我beh按怎ē tàng幫贊in leh？」
|
|
謝緯tī神學院一面讀書，一面準備醫學院ê課程，mā積極籌備前往日本ê代誌。M̄ koh因為擔心日本政府會攪擾(kiáujiáu)牧師ê生活以及壓制教會ê活動，伊bat想 tio̍h欲去東京ê一間大學研究文學。但是，謝緯koh意識tio̍h家己iáu有醫療傳道ê理想，所以當太平洋戰爭爆發ê時chūn， 伊iáu 是進入日本ê醫學院。
|
|
謝緯因為著急beh去日本讀醫學院，考完畢業考了後，無參加學校ê畢業典禮。Chit點引起院長滿雄才ê無歡喜，楊士養牧師極力為謝緯講情。滿院長chiah同意koh「破例」一pái，頒發畢業證書hō͘ chit位「遲到早退」ê學生。
|
|
謝緯講：ùi chit 時了後，我立志無因為名譽心（虛榮心） iôchoah ， tùi 按呢 beh 受純然 ê 聖化，做上帝 ê 器具來活動。若 ē tàng 堅強向 chit ê 目標邁進，我 ê 名譽心就會消除。上帝 ah！ 我將家己獻 hō͘ 祢，做祢 ê 器具，請祢歡喜接納。
|
|
謝緯時常 tī 下課了後就到滿雄才牧師 ê 宿舍，研究音樂、練習鋼琴、小提琴， kohkhah 將才華伸長到作曲方面。伊 koh 真愛聲樂，伊認為 tī 悲傷抑是孤單 ê 時,唱歌 ē tàng hō͘ 情緒放輕鬆，得 tio̍h 內心 ê 清靜，慢慢仔 kā 世俗 ê 各種下賤現實 ê 一面 pàng bē kì。
|
|
謝緯無逃避讀神學校，因為這只不過 kap 家己原來 ê 「生涯規劃」順序倒反 (tòpéng) nātiāⁿ 。吳天賜 chhoā 謝緯去台南神學校，院長滿雄才kap 謝緯面談了後，感覺真滿意， tō 同意 chit 位 「遲到」 (oàⁿkàu ) ê 學生入學。
|
|
原來就對文學真有趣味ê謝緯， tī 中學四年級 ê 時 mā 去 kap lâng 參加高校考試，但是， soah 考 bôtiâu 。中學五年畢業了後，伊 koh 再赴考，猶原是落榜。老母要求伊隨時去讀台南神學院。 Hit 時台南神學校已經開學一個 goā 月。
|
|
謝經、謝緯、謝綸三 ê 兄弟同齊 tī 同一間學校(台中一中)讀書。In 每禮拜日攏到台中柳原教會做禮拜，謝緯同時參加聖歌隊， koh tī 教會司琴，並擔任主日學教員。中學時期謝緯就認為傳福音無應該 kanta tī 禮拜堂內底講道，是tio̍ h 進入社會，接觸 kohkhah chē ê 人群。
|
|
因為一擺 ê 意外事件，徹底改變了謝緯 ê 一生。 Tùi ánne，伊願意獻 hō͘ 主用，到死為止。
|
|
Hiohjoa̍h ê 時，阿緯 mā kap 其他 ê 小朋友 tī 教會排演「聖誕劇」。吳天賜牧師 iáu 會 tùi 真 chē 戲劇中間，選幾齣 á khah 好 ê，帶 in chit ê 小「劇團」到附近 ê 教會去「公演」...
|
|
謝緯 ê 老母，吳上忍，是吳葛 ê 第三 chabó͘kiáⁿ。謝緯 ê 老父，謝斌 tī 南投鎮上開設「大同醫院」。原來是信仰台灣民間宗教 ê 謝斌，27 歲娶吳上忍 choè 某，通過家後 ê 引 chhoā 來成做基督徒。
|
|
故事中 ê 主角，有充滿傳奇 ê 一生，伊感性 ê 另外一面，tsitsut'á to 無掩蓋 (khàm) 透露出真性情。謝緯 ná 親像就 tī我 ê 身邊，伊同時 kap 我 tī 星空下對話；夢中，伊 tùi 我微微 á 笑。記憶， tńg 去到以前；回憶， tī 不知不覺中，說明 tio̍h 「是舊，猶久永新」 (Sī kū, iáukú éng sin) ê 故事。
|
|
這本書ê作者無嫌艱難與辛苦向多方面收集有關資料，費心整理，用樸素淺現通俗快明，無加裝飾(chngthāⁿ) ê文筆，將謝緯ê「歷史」、心路歷程、奉獻生涯等等，緩緩仔(ûnûn'á)寫出來，忠實交代於大家面前。
|
|
tī久長ê年代中，謝緯，這位台灣基督教史上bē tàng欠缺ê牧師，我無印象；謝緯，這位為著救人ê性命煞犧牲家己ê醫師，我也無印象。直到九○年代，因為王金河醫師對烏腳病ê貢獻，纔(chiah)知謝緯這个名，也開始刻tiâut tī我ê頭腦內。
|
|
本書以《台灣另類牧師‧醫師—謝緯》為題，我感覺非常貼切。 但願本冊ê出版，ē tàng 使 kohkhah 多人認識謝緯這位台灣另類牧師‧醫師，也使謝緯彼款深刻豐富ê人格及生命特質影響、感染kohkhah 多ê台灣人。
|
|
謝緯tī上帝面前所立ê約，是伊一生ê目標，也是伊一定會遵守ê。伊ê一切，屬tī上帝，所以上帝若差伊tī甚麼所在事奉，伊就非常歡喜，歡喜tī彼个所在為需要ê人服務。
|
|
甘願做戆人的謝緯
|
