《台灣另類牧師．醫師─謝緯》

 | | | 轉寄

604 五kho͘ gîn美金ê信心

作者 陳金興 2011.11.06

Chit一年中間，謝緯除了研究醫學以外，伊mā chhoē時間tī美國ê教會kap救世軍（The Salvation Army）社團紹介台灣ê醫療現況。Tī真無閒、艱辛而且緊張ê外科訓練生活中，謝緯mā感受tio̍h bē少ê工作壓力。但是，伊kā 楊瓊英講，有一ê聲音kā家己講，chit條路一定ài行落去，最後一年ê研究無論koh khah怎樣辛苦，mā ài忍耐。因為che對tī伊所從事ê醫療工作，有極大ê幫贊，希望得tio̍h太太ê體諒kap了解，謝緯mā強調，厝裡若有甚麼變化，伊ē tàng提早tńg來台灣。

Tī謝緯赴美進修ê chit段期間，對岸ê「共匪」喝聲攪擾到真厲害，伊bat寫phe hō͘ 呂春長講：「若台灣有什麼危機，請你馬上通知，我boeh隨時tńg去國內，因為老母、bó͘ kiáⁿ、兄弟姐妹kap朋友lóng tī台灣，我應該kap in共患難。」

半年了後ê 1953年12月中，建議謝緯赴美進修外科ê孫理蓮，親身來到美國水牛城探望伊。看tio̍h 2年goā無見面ê老朋友，滿腹充滿他鄉遇故知ê喜樂之情，充分顯露tī兩人ê笑容，而且相談甚歡。Teh言談ê中間，知影孫理蓮想beh tī南投縣埔里地區設一個包括病院ê基督教中心（Christian Center），費用大約tio̍h美金一萬二千元，伊問謝緯將來tńg去台灣了後，有意願到埔里ê病院為山地人服務bò͘ ？謝緯聽伊ê話意，已經意識tio̍h孫理蓮期待伊ē tàng tī埔里kap伊同工。

Tùi ánne，謝緯寫信kā楊瓊英講chitchân tāichì，並表示當孫理蓮tī台灣ê工作需要鬥腳手ê時chūn，伊感覺家己應該ē tàng出淡薄á力來kā伊支持。而且若是chitê 計劃ē tàng順利進行，謝緯按算半個月tī埔里，半個月tī南投，雖然心中已開始teh想，伊iáu 是tio̍h問太太ê意見，因為伊非常致意koh 尊重太太ê想法kap意見。

隔tńg年1954年4月18日，謝緯利用二禮拜ê休假時間，重遊舊地費城，koh一pái tú tio̍h鮑伯‧馮雷醫師。謝緯心內想tio̍h當時台灣ê肺癆猶原真chē，koh無較好ê療養院（sanatorium），tùi ánne向鮑伯‧馮雷請教有關改善之方法等問題。伊問謝緯，需要joāchē錢chiah ē tàng開始起一間療養院？謝緯回答講，差不多美金五千元。

鮑伯聽完了後，就提議講：「好！咱來替in起一間病院！」謝緯聽了，隨時問講：「咱去toh位找錢 ？ 」鮑伯想了就ìn伊講：「咱ē tàng tùi chit所在開始，kā咱所有ê lóng捐出去。」兩個人khêngkhêng 咧，身軀頂只有美金五kho͘ gîn。鮑伯笑笑á講：「這是一個好ê開始，你kā收起來，然後到我連絡ê教會去，kā咱所看tio̍h ê異象kāin講。」

Tùi美金五kho͘ gîn ê信心開始，謝緯kap鮑伯‧馮雷分頭設法募款，以完成謝緯回台了後，tī埔里設立肺病療養院ê心願。但是，chit時已經染 tio̍h肺病十goā年ê大兄卻寫phe hō͘ 謝緯， ài伊tī美國專心研究肺結核病ê適當療法就好，m̄免去教會或是其他團體去kā人募款。

M̄ kú，謝緯認為家己已經無時間koh再去研究肺病治療法，伊認為tī無特效藥治療chìn前，隔離kap療養是siōng要緊ê代誌。事實上，tī謝緯收tio̍h大兄ê 信 (phe) chìn前，就已經透過馮雷醫師ê紹介，到各地募款，其中tī費城ê一間高中募tio̍h美金25 kho͘，mā有一 位醫師答應beh捐一台氣胸術ê機器hō͘ 伊。