《台灣另類牧師．醫師─謝緯》

 | | | 轉寄

806 孫理蓮 kap 王金河中間 ê 誤會

作者 陳金興 2012.02.05

因為孫理蓮人 tī 台北，所以將免費診所 ê 行政 kap 財務管理 lóng 交 hō͘ 王金河負責。有一 pái，因為西德藥廠贈送一批藥劑 ê關稅問題，hō͘ 王金河 kap 孫理蓮中間產生誤會，「憐憫之門」mā 差一點 á 遭遇 tio̍h 停辦 ê 命運。

1966年6月初1，孫理蓮雄雄khà電話hō͘ 謝緯，講北門免費診所ê工作beh停止，叫伊隔工m̄免去北門lah，理由有真chē，其中一項就是她kap王金河ê意見bē ha̍h。謝緯講完電話了後心想，chit二位lóng是為tio̍h上帝teh工作，現在卻為tio̍h一點á意見bē ha̍h，就beh中止chitê事工，伊感覺真可惜，認為免費診所ê工作敢採(kiámchhái)會當停止，但是hiahê患者ê病痛，卻是無辦法中止ê。

為tio̍h chit件事，伊khà電話kap董大成教授連絡，但無得tio̍h真好ê解決辦法。伊感覺tī北門chiahni̍h偏僻ê所在，iáu有chiahni̍hchē人欲去hia就診、手術，是一件真無簡單ê事，這表示免費診所ê服務，得tio̍h病患kap家屬ê信任。一旦chitê事工beh隨時取消，伊無辦法忍受。Tùi ánne，伊kā chit件tāichì khǹg tī祈禱ê中間，求上帝幫助，看有什麼辦法thang koh再繼續。

隔工，謝緯照常到北門，去為二個烏腳病患kap腳趾頭有癌症ê人動手術。而且伊決定，為tio̍h hō͘ chitê有意義ê工作ē tàng繼續落去，伊一定beh盡力做王金河kap孫理蓮之間ê和解者。

Tī北門ê王金河mā接tio̍h孫理蓮ê電話，孫理蓮真怒(siū)氣表示因為王金河侵占芥菜種會ê錢，所以beh將免費診所關起來，講完就掛斷電話。王金河為tio̍h beh清楚了解狀況，koh khà電話hō͘ 孫理蓮，卻lóng無人接聽。無故被指責，hit暗伊就坐夜快車去台北，等了兩工，孫理蓮á是無願意見伊。Tùi ánne，滿腹冤屈ê王金河就到南投kap謝緯訴苦。謝緯kā王金河講，伊相信這一定是一個誤會，ài王金河mài急，mài siū氣，tio̍h祈禱，一切信靠上帝。

經過謝緯tī王金河kap孫理蓮二人中間進行溝通kap了解了後，chiah hō͘ 真相大白。

原來，西德藥廠有生產一種用tī末梢血管擴張ê新藥（Complamin），並將chit種藥劑寄hō͘ 台大病院做人體試驗使用。台大病院認為chit種藥劑若hō͘ 烏腳病患使用，應該ē tàng減輕in ê痛苦，tùi ánne就原封不動交hō͘ 免費診所使用，這批藥劑ê關稅是台大病院負擔ê。

王金河感覺chit種藥劑ê效果真好，當這批藥劑已經使用完，就向台大病院koh再申請第二批藥劑，並建議由西德製造商直接寄到免費診所。M̄ kú ，這批藥劑是必須繳關稅chiah ē tàng提領，王金河就代先家己納稅了後，chiah向芥菜種會請款。但是，tī台北ê孫理蓮只知影台大病院bat贈送一批已經付完關稅ê藥劑，卻m̄知影有第二批藥劑ê事，就認為王金河ê請款是為tio̍h圖利家己，雖然她有派員到北門了解，但是，iáu未詳細查證就想beh關閉免費診所。