《台灣另類牧師．醫師─謝緯》

 | | | 轉寄

903 快樂來自患者ê sìnnāi

作者 陳金興 2012.03.04

由台灣人家己來設立基督教病院，是謝緯ê負擔kap理想，chitê願望tī 1964年達成。Tùi hit tia̍p開始一直到1970年伊不幸過往ê chit六年中間，謝緯kanta單純做一位外科醫生，義務為患者開刀。Chit段時間，他iáukoh兼任埔基院長，每禮拜一到埔里巡迴看診；拜四到台南縣北門免費診所為烏腳病患開刀；1966年被選做台中中會議長了後，時常tī拜二主持中會會議；1969年受推選做總會議長，增加kohkhah chē ê大小會議， koh ài主持真chē教會ê落成典禮以及牧師ê就任式。

雖然chiahnih無閒，謝緯猶原安排tī每禮拜三下晡到二林義診。一禮拜中間，來回tī五間病院（大同病院、埔基、肺病療養院、二基kap北門免費診所）四界看診，tùi南投縣ê偏遠山區到彰化縣ê海邊，甚至遠到台南縣ê鹽鄉地帶。患者愛伊，伊mā疼惜患者，醫、病之間ê感情昇華到「mài kā醫術當做算術」ê境界。因為，謝緯認為做醫生ê，應該抱tio̍h救人第一為宗旨，絕對m̄是kanta為tio̍h thàn錢nātiāⁿ，因為，救人所得tio̍h ê快樂，時常贏過金錢。

每pái伊義診ê chit一工，求診ê患者就特別多，甚至真chē患者講，看tio̍h謝緯，病就好一半。Chit幾年中間，伊只有三pái boē tàng前往二林看診，一pái是到日本去進修考察；另外一pái是因為工作siuⁿ無閒致使胃出血；最後一pái，就是伊車禍身亡。

Tùi南投到二林ê路途真tiàuoán，兩地交通不便。生性khînkhiām ê謝緯，通常tùi南投鎮坐巴士(公路局)出發，經由縣境名間鄉，koh再進入彰化縣二水鄉，最後來到終點站——二林鎮。

另外一條路線，是tùi南投坐省公路局ê公車到草屯，一路poâⁿchhia 到彰化、溪湖，koh再到二林。

← 五、六○年代ê「公路局」巴士。

謝緯tī 1965年8月20日hit工beh去二林ê時chūn，外面tú好teh落大雨，天頂koh teh tân雷公、sìⁿnà。牽手真擔心，對伊講：「chiahni̍h歹ê天氣，你就mài去lah，hitpêng可能bē有患者。」雖然天氣是ánne，謝緯卻認為，若有一個患者前來就診，ánne就算伊冒tio̍h風雨ê危險前去，mā是有價值，而且伊iáu beh對hitê患者kohkhah親切。Tī伊ê堅持之下，楊瓊英就hō͘ 伊出門。謝緯hit工chhiàⁿ一台計程車，tùi南投出發，經過彰化到溪湖，想tī 溪湖換坐客運到二林。但是因為路面淹水，客運停駛，伊只好koh再tùi溪湖坐計程車去二林。當謝緯來到病院ê時，hia已經有八個患者teh thènghāu，其中有一位是需要動手術ê。

謝緯講：「做醫生ê快樂，m̄是得tio̍h金錢，是得tio̍h患者ê sìnnāi。」