《台灣另類牧師．醫師─謝緯》

 | | | 轉寄

1001 荊棘中ê蘆葦

作者 陳金興 2012.04.08

本來就對政治 (包括教會政治)無感覺興趣ê謝緯bat講：「第一戇就是選舉」。他tī擔任總會議長chìn前一年（1968），地方人士kap真chē縣民bat有意思beh giâ(拱)他出來競選南投縣長。In認為，以謝緯ê聲望，尤其tī埔里為原住民ê服務kap貢獻，票源真豐富，絕對會當選。當時ê國民黨縣長候選人林洋港亦親自登門拜訪謝緯，請教他ê參選意願。

對tī chiahê政治人物ê造訪，他一點仔mā bē感覺歡喜。謝緯攏是用：「我已經做牧師kap醫生， ná有閒工koh再做縣長。」chit句話來謝絕眾人ê好意。謝緯認是選舉會消磨真chē物質kap精神，he是真戇ê行為。伊m̄知影chiahê人是為tio̍h什麼，hiahni̍h phah拚teh選舉？但是，謝緯明白家己應該行什麼款ê路。所以，他就專心去行他醫療傳道ê路。因為，他確信他所行ê，一定是khah有價值，而且是正直ê路。所以，當周圍ê人鼓吹ài他出來參加選舉ê時，他lóng會無躊躇就kā in拒絕。





謝緯牧師祝禱。






1964年1月20日chit一工，台中中會開會，beh選舉議長kap副議長。依一般慣例，議長通常ài有做過副議長ê經歷，所以，台中中會有意hō͘ 謝緯擔任下一屆議長，以辦理隔年ê「設教百週年」活動。所以，前hit年tio̍h選他先做副議長。Tī開會前，聽tio̍h風聲ê謝緯，以四點理由慎重表示他博唉bôài做副議長，來kā in婉拒：第一，他無時間；第二，他無政治才能；第三，伊bôài hō͘ 別人lia̍h做是他得tio̍h「大頭病」；第四，伊想kā有限ê才能 kap時間集中tī醫療傳道。但是，hiahê中會代表並無接納他ê理由。所以，謝緯就決定開會hit天bôài去參加會議，用缺席ê方式來表達家己ê心意。

會議hit工，發覺謝緯無出現tī會場，眾代表就隨時到南投kā謝緯「請」入計程車內。Tī‘形勢比人強’ê情形之下，謝緯mā只好kap in同齊去參加會議。Tī大會投票表決ê時，伊得tio̍h siōng高票，因此，他當選了第34屆台中中會副議長。

了後，伊開始參與中會ê事務，mā時常代表中會主持新任牧師ê就任典禮。隔年，謝緯照他所願，無擔任議長。但是，到1966年1月12日，伊iáu是被選做第36屆台中中會議長。Tī當選議長了後，謝緯心裡想，為tio̍h上帝kap hiahê支持家己ê眾代表，他一定會好好á擔起做議長責任。