《台灣另類牧師．醫師─謝緯》

 | | | 轉寄

1003 長老教會被迫退出WCC事件

作者 陳金興 2012.04.22

「普世教會協會」（World Council of Churches ,WCC）是全世界siōng大ê基督教組織，tī 1948年成立，當時已經有五億ê基督徒成員。台灣基督長老教會認同普世教協ê神學觀點，1951年加入成做會員，mā是台灣唯一ê會員。因為普世教協規定，信徒五萬人以上ê教會組織，chiah有資格入會。當時，除了長老教會，台灣並無其他教派ê人數超過五萬人。

六○年代了後，中國共產黨漸漸得tio̍h中國人民ê支持，並成做軍事強國。WCC認為，一個國家人口chiahni̍hchē，武力koh chiahni̍h強，無應該被排除tī國際社會之外，若無將它納入聯合國，以國際規則約束，將對世界ê公義kap和平，造成負面ê影響kap極大ê威脅。因此，WCC建議聯合國，許可中國入會。

國民黨政權對這點感覺十分不滿，而且指責WCC「容共」，並要求長老教會退出chit種「容共團體」。當時，tī以「殺朱拔毛、反攻大陸」為基本國策ê時代，in透過報紙等種種媒體，講WCC是容共、擁共，長老教會是WCC會員，mā是容共、擁共，形同叛亂團體。國民黨政府利用媒體，發動攻擊，來壓迫長老教會退出WCC組織。但是長老教會認為，全世界ê基督徒攏是一體ê，有ê生活tī自由世界，有ê生活tī共產主義統治之下。教會關心所有受苦ê基督徒，mā關心中共統治下，受壓迫ê基督徒。長老教會一再向國民黨政府解釋立場，但是in拒絕接受。

面對一連串政府壓迫長老教會退出WCC ê事件，擔任長老教會總會議長ê謝緯，以一貫「甘願做戇人」ê精神，繼續kap政府周旋、協商，去做無人願意做，但是koh siōng需要有人去做ê代誌。事實上，面對國民黨政府對長老教會一再ê施壓，強烈要求總會退出WCC chit件事，確實hō͘ 身為議長ê謝緯，陷入天人交戰ê情境中間，也thang講是他一生中siōng挫折kap無奈ê時刻。

1969年7月31日，擔任議長iáuboē半年ê謝緯，tī他ê日記頂面按呢寫：「最近真正感覺家己ê能力、生命ê界限、人ê一生，是上帝所安排ê，hō͘ 咱無法度預測。M̄知影是什麼原因，hō͘ 我感覺我ê人生終點，一工一工迫近tī目chiu前。」

謝緯感覺若無WCC事件hō͘ 他操煩，他就ē tàng非常自由、快樂前往各地從事他ê醫療救人工作。Mā就是講，toh位有急診，他就ē tàng隨時行動，甚至改變原來ê既定行程，因為，「救人第一」是他ê基本原則。

雖然ánne，謝緯並無逃避他ê議長責任，他猶原勇敢面對所有挑戰，以堅決ê意志，溫柔ê態度，希望ē tàng「圓滿」解決chitê 事件，同時mā ē tàng捍衛長老教會ê主體性。雖然對政治無興趣，但是考慮tio̍h kuiê台灣教會ê前途，他開始kap政府官員互動。為tio̍h做好教會kap政府之間ê溝通橋樑，謝緯時常自我反省，而且不斷祈禱。