《台灣諺語鹹酸甜》

 | | | 轉寄

一雷，天下響

作者 蕭平治 2006.06.18

br> 「台灣俗語鹹酸甜」第一冊，選tī 母親節ê 前一工來出冊，有伊特別ê 意義，因為chit 本冊是真真正正用正港台灣Hōló 人ê Hō ló 話，寫出台灣人ê 聲影，透過講故事、笑談，用散文、詩歌、囡á古kap 日常生活 對談，將台灣俗語ê 含意表達出來，有鹹酸苦chiáⁿ ê 人生，有勸人做好代ê 善言，mā有批評無合時機ê 語言，用真白話koh通俗ê HōLó 話來開講ê 一本冊。

Chit 本冊會tàng出版kap 讀者見面，tio̍hài 感謝賴許柔文教基金會ê 贊助，賴許柔文教基金會ê 董事長賴憲平先生，是一位有孝序大，疼惜家己土地台灣ê 事業家，為著感謝老母ê chhiâⁿ 教，chiah 來成立這ê 基金會，已經七年外，chit 擺是為著會館ê 開張，kap 做一kóa愛護鄉土，疼惜台灣ê 工課，來慶祝母親節，而且出版chit 本用母語書寫ê 冊，實在有意義。

冊一下出，朋友才看著蕭平治ê 名，連連喝聲：蕭老師，你chitmái 「一雷，天下響」à neh ！害Siau Lahjih 連連喝m̄ 敢，出一本冊，ná有hiahni̍h大名聲。

有一位老同窗kā 我講，你寫he 啥物碗糕，我看lóng無。隨時唸一chhiám hō͘ 同窗 ê聽，聽了伊soah oló 講你ná會chiahni̍h gâu ，唸ê kap 咱講 ê chiah 親像。m̄ kú 你寫he ABC 美國字，人敢看有？

我講he abc m̄ 是美國字，ài 叫做白話字，mā號做羅馬字，伊會tàng表達咱ê 台灣話，老兄弟有學過，m̄ chiah 會曉寫出咱ê 話。

原來是按呢生，會記得國校時代，蘇忠治in 兄弟，leh 唸聖經kap 唱聖詩，lóng是hitlō 美國字，到 taⁿ chiah 知是羅馬字，實在了不起，老兄弟，老同窗，你chitmái 有影「一雷，天下響」，想bē 到你m̄ 是教友，ná會學chit 步，有影khiàng to tio̍h。

老兄弟taⁿ 免oló mā免pòng 聲，啥物「一雷，天下響」，無hiahni̍h gâu lah 。嘴是ánni講，不過心內ê 歡喜是無teh 講，外歡喜你敢知？好佳哉無笑出來，若無可能會落下頦，he 是無得確。

歡喜án怎？歡喜家己ê 作品會見眾？歡喜人會稱呼你是作家？歡喜蕭平治ê 名聲已經響？實在m̄ thang 相創治，若beh siàu 想chit 款ê 眠夢，a̍h bē 曉來去做別項。

箍á內ê 人lóng知影，台文chit 項工課，是一種向望，向望咱ê 台灣話，無論客語、HōLó 抑原住民，lóng會成做咱國ê 官方語言，koh會tàng書寫，可惜ê 是關心ê 人無濟，潦落去做ê 人kohkhah少，會tàng用母語書寫出冊ê 人mā無幾個，今仔日chit 本「台灣俗語鹹酸甜」來出世，上希望ê 就是台文ê 推sak 會tàng「一雷，天下響」，hō͘ ta̍k家lóng知影chit 項工課ê 重要性，因為母語若滅，啥物是台灣文化？想著會驚。

【註解】： 1.開張：khaitiang。2.khiàng ：gâu ，厲害。3.pòng 聲：[講話誇張]。4.會見眾：[見得了檯面]。5.siàu 想：[非分之想]。6.箍仔內ê 人：[圈內人]。