《台灣諺語鹹酸甜》

 | | | 轉寄

南路鷹，一萬死九千。（鷹揚八卦）

作者 Lahjih 2007.07.01

「各位房長，各位兄弟：ta̍kke koh勞煩巡巡看看leh！看有tòe無著陣、身苦病痛、傷過thiám頭ê無？一路飛來chiâⁿ勞苦，taⁿ已經來到中部地界，下面就是出名ê濁水溪，濁水溪過去就小chhèng卡koân淡薄à，借著春天ê風勢，然後放hō͘伊輕鬆仔飛，像『滑翔機』『三角翼』按呢慢慢仔chhu落去，liâmpiⁿ就到半線地頭。八卦山脈ê地形位置掠hō͘好，掠hō͘準，遐有一仙大佛為記，m̄ thang bē記得。

Aéng！你做頭前趕去八卦山頂探一下，看有啥物動靜無？是m̄是有鳥á踏，抑是天羅地網，趕緊轉來報告。」

「Êngà叔公！我知影，阮隨時就來去！」負責探路顧安全ê Aéng隨時chhōa五六個兄弟，向北一直衝，負責ê精神hō͘總領隊Aêngā感覺真放心。

無一tah久仔，探路先鋒Aéng in已經oat倒tńg來：「報告Êngà叔公！天氣chiâⁿ好，風chiâⁿ順，八卦山頂好光景，今á日koh是禮拜日，有足chē人來tī大佛邊附近leh散步chhitthô看景緻，ta̍kke lóng笑微微，歡歡喜喜，無啥物thang掛慮，而且樹林內無看著鳥仔踏kap鳥網á，做lán放心kā紮營無問題。報告完畢！」

「猶有其他koh樣ê狀況無？」

「有人ê所在真鬧熱，無人ê樹林內kannā有一 kóa鳥隻tī遐chhichhi chhūchhū,唱歌la̍h曲、phōngchhiak跳舞，快樂ê心情比人無卡輸。」想bē到Aéng觀察chiah入心chiah詳細。 「各位房長，各位兄弟：ta̍kke注意聽，紮營ê營地八卦山tihbeh到，大佛tī頭前遐有看著hò͘ⁿ，各房隊長隊伍小整理一下，chhōe卡iapthiap ê樹林內紮營，m̄ thang óa車路邊，車路邊人chē、車chē chiâⁿ危險，而且傷chhapcha̍p siuⁿ鬧熱會hō͘ gín'á驚著，ánne知影hò͘ⁿ？準備紮營…」

一路飛來千外里，有夠thiám,Êngā想beh小歇睏一下，無，遐ê猴gín'á liâmpiⁿ又koh吵beh聽講古，就無thang歇喘lò͘。 「喂！慢且是lehlah！危險ò͘！各位隊長，趕緊叫ta̍kke koh飛koân，m̄ thang落基地，有聽矣無？危險啦…」開路先鋒Aéng hit五六個兄弟緊張kah chhìn汗一直流，喝kah giōngbeh sau聲：「Êngà叔公！卡緊khit來！你看he體育場東旁，遐ê人群是leh創啥？iioo,hán hán hoah hoah，亦有chhāi旗仔，亦有搭布篷á，有人提望遠鏡，有人kíkí tuh tuh，每粒頭殼lóng khiànthian khiànthian向ùi咱chia來，大概無好空ê款ō͘，看破趕緊oat方向，徙ùi別位來去！」

「張持(細膩)無蝕本，lín ê顧慮chiâⁿ著，m̄ kú taⁿ臨時臨iāu(lāu)beh徙去toeh?…小等一下，緊事khoaⁿ辦，mài急mài緊張，hō͘我斟酌看詳細，chiah做決定。」 「hò͘!」

Êngā有影是老經驗，總領隊就是總領隊，實在無簡單，看伊老神在在，飛tiàm半空中，thián開伊利劍劍ê鷹á目，巡視著八卦山頂每一跡，尤其是人chē ê所在，伊特別注意，特別注神tī人ê穿插kap面腔目神，看in ta̍kke穿kah súitangtang，m̄是「休閒服」，就是運動衫褲，面容像春天ê花蕾，歡頭喜面，不時都看對有鷹á ê所在，嘴笑目笑，比比指指(kíki2tuhtuh)；ah有ā！『鷹揚八卦』ê橫批隨風phia̍t來phia̍t去，ahhe是leh迎接阮來到chit啦！

是leh迎接阮，無m̄著！著！iáu有幾個á熟似面ē，著！he就是愛阮鳥á族ê『鳥盟』人士，ah!mā有外國人neh，lóng是leh迎接阮！Lóng是leh歡迎阮！莫怪chiahni̍h鬧熱，人chiahni̍h chē，比舊年有卡chē無卡少。

Êngā kuiê心肝頭開了了，心情做一個輕鬆khit來，taⁿ.免驚，kap舊年共一樣，有驚無危險：「Éngà！趕緊廣播，請ta̍kke免著驚，放心á安營，he是leh歡迎咱è，做您免驚，bē kā咱害啦！in chiahni̍h大陣人集合tī chia，就是等beh看咱ê風釆，beh欣賞咱ê技術，飛行ê美姿。

交代落去，叫ta̍kke慢且是歇睏，表演hō͘ in看，看咱鷹á族ê hiaupai，無論飛koân飛kē，孤一隻抑是掠相排，thián si̍t飛向天，抑是iap尾飛衝落地，se̍h圓箍á、車糞斗，若歡喜就做恁kiki吼，唱出歌聲hou7in聽，免客氣免驚惶，隨在lín chông，隨在lín kek khong,人客看了若爽，就無枉費咱來chitchoa̍h,來chia kā in chakchōlò͘！」

自ánne天頂kap地上做夥hihi hoahoa,hán hán hoah hoah，歡喜寫tī面像，天頂飛kah chhiângchhiâng滾，八卦山頂ê每一人lóng笑búnbún。Êngā叔公in鷹á族今á日上歡喜，台灣人ê面子今á日趁了上富裕，『鷹揚八卦』自ánne揚名國外。

「阿公！你今á日上蓋歡喜ho͘ⁿ！」欲暗á鷹á族安營好勢，八卦山頂回復恬靜，chhun遐ê細隻鷹仔猶leh無時閒，kiki kākā一直吵總領隊Êngā叔公tio̍hài講古hō͘ in聽：「定著有故事beh講予阮聽e，阿公！阿公！阮beh koh聽你講古啦！…逐家pho̍k'á聲扑hō͘響，阿公beh講古hō͘咱聽a！」 pho̍k！pho̍k！pho̍k！pho̍k！pho̍k'á聲扑無停…

「好！好！好啦！beh講就來講：古早古早，咱ê祖先tòatiàm北方真遠真遠ê所在，為著beh hō͘咱ê kia2nn孫有卡好ê生活環境，每年lóng tī秋天時ùi咱ê故鄉起程，飛向南旁beh去南洋度假，kā lín chia ê序細飼hō͘大隻koh健康，教lín生活ê才調，hō͘您家己會凍獨立，tī隔轉年ê春天，chiah koh chhōa lín轉去故鄉，kā lín完成婚事，生湠咱ê族群，保持咱灰面鵟鷹（Butasturindicus）ê傳統kap特質。

每一年tī落南抑是上北ê路上，lán lóng ài借台灣chit塊Formosa土地暫時歇睏，習慣上落南歇tī屏東恆春一帶，chiūⁿ北就歇tī咱chitmái歇睏ê八卦山頂。」

「阿公！阮卡愛歇tī彰化ê八卦山頂，無愛歇屏東kap恆春。」

「為啥物？」

「八卦山頂有人歡迎，好sńg好chhitthô，屏東恆春遐chiâⁿ危險，有鳥á tah，mā有網á會予阮bē tín動，有夠驚死人e5neh！」

「lín gín'á人m̄知影鳥á tah kap鳥網á有外厲害，kannā知影會hō͘恁be7tin2動，無thang sńg,無thang chhitthôniâ，he是behti8h咱ê生命，lín敢知？」

「有影ò͘！ahti7半線八卦山頂，哪會lóng無鳥仔tah kap鳥á網？koh有hiah chē人來欣賞咱ê飛行，按呢m̄ chiah有趣味好chhitthô。」

「是時代leh進步，人類已經有保育ê觀念，知影保護lán chia pháiⁿ命鳥，古早時代咱ê祖先就無chiahni8h好運，見若飛來到台灣停腳暫歇睏，就去hō͘ in剿kah giōngbeh斷種，lín敢知？南路鷹，一萬死九千…唉！」突然間，Êngā叔公煞目箍紅紅，目屎一大滴一大滴流落來…

「阿公！你哪leh流目屎？」

「想著祖先ê扑拼，為著生存，為著尊嚴，無惜生命，甘願犧牲認命，唉！攏是人ê無知，煞hō͘咱liânhôe歹命。

古早古早，咱ê祖先就教lán 愛隨節氣搬徙，寒天時，lán ê故鄉寒sihsih,chiâⁿ歹徛起，m̄ chiah隨人組隊，趁冬季猶未到ê秋天，千里迢迢飛過海洋到南洋度假，順紲教恁技藝，kā恁chhiâⁿ大漢，chiah koh趁熱人beh到晉前ê春天，搬徙轉來去故鄉，hō͘恁少年ê完婚生湠，che就是祖先留落來ê傳統，每一kái經過Formosa地界，就會去遇著「南路鷹，一萬死九千」ê災厄，mā是宿命無奈，好佳哉，chitmái ê台灣人已經覺醒，進入文明社會，有野生動物保育ê觀念，而且經過一 kóa有心ê愛鳥人kap彰化縣政府ê認真宣傳，得著國際保育界ê重視，m̄ chiah有chiahni8h鬧熱感心ê活動，向望明年、後年，一直到以後，咱ê後代囝孫，lóng會親像今á日ánne，平平安安，順順序序來過日，無驚惶，無死傷來經過Formosa chiahni8h súi ê地界，免歡迎無要緊，mài kā咱thâi，mài kā咱掠就真感謝。」

「阿公！哪會kā咱叫做南路鷹leh？」

「這是Formosa台灣人ê祖先，看lán逐年都ài飛向南洋去，m̄ chiah ánne kā咱稱呼，無pháiⁿ意啦！taⁿ chiâⁿ暗à,tòe阿公祈禱了後tio̍hài去睏，bîn'á早起tio̍hài koh上路，無，會peh bē khit來：感謝天！感謝上帝！賜hō͘咱平安，賜hō͘ lán 歡喜，過去ê mài koh鬱卒，未來ē，tio̍hài扑拼sèjī。感謝台灣人，感謝半線ê兄姊，lín ê仁慈，lín ê疼心，阮會記得，望beh lín嘛會凍平安快樂，免受恐嚇，免受壓霸，khioh回尊嚴，tio̍hài家己拚！感謝！感謝！感謝！」

【註解】：
1.八卦：engiông patkòa。2.thiám頭：疲勞。 3.chhèng卡koân：[衝高一點]。4.三角翼：三角翼。 5.鳥á踏：chiáu'átah。6.來去！：laih去，走，離開。 7.倒tńg：oa̍t倒tńg，越倒tńg（oa̍t倒轉）。8.紮營：chatiâⁿ。 9.chhu落去：[滑下去]。10.koh樣：[異樣]。 11.狀況：chōnghóng。12.唱歌la̍h曲：唱歌拉曲。 13.iapthiap：[隱密]。14.chhapcha̍p：參雜；混雜。 15.chhìn汗：chhìnkōaⁿ，冷汗。16.sau聲：破聲；聲音沙啞。 17.chhāi旗仔：[豎旗子]。18.kíkí指指：[比比指指](kíki2tuhtuh)。 19.khiànthian khiànthian：[看天張望]。20.無好空：m̄是好代誌。 21.張持：tiuⁿtî,斟酌，小心。22.khoaⁿ辦：免緊張，慢慢辦。 23.thián開：展開。24.穿插：[穿著]。 25.面腔目神：面容眼神。26.phia̍t：[晃動]。 27.hiaupai：驕傲。28.thián si8t：展翼。 29.iap尾：[縮尾]。30.chông：跑，衝。 31.kekkhong：[裝傻，賣弄傻相]。32.chakchō：[打攪]。 33.才調：能力。34上北：chiūⁿ北。 35.behti8h咱ê生命：[要我們的命]。36剿：châu，斬草除根。 37goingbeh：[快要]。38liânhôe：無停ê pháiⁿ命，苦ê輪迴。 39遇著：gū tio̍h，拄著。40災厄：chaieh。 41宿命：siokmiā。42peh bē khit來：[爬不起來]。 43khioh回：[拾回]。