《哈佛台語筆記》

 | | | 轉寄

戰到死ê勇士

作者 李勤岸 2007.10.21

咱ê戰友，台獨聯盟美國本部ê主席蔡正隆先生己經 tī 10月13早時十一點離開咱。

伊tī拜二ê時因為凝血塞tī腦部ê血管，緊急入院開刀，我接著這項消息有拍電話去in兜。蔡太太—明霞姊ka我講開刀真順利，叫我免煩惱。想buē到，正隆兄chiahnih緊就來離開咱……

正隆兄因為腰子無好，需要每二工洗一遍腎。但是伊從來都m̄ bat tī任何人面前hō͘人感覺伊身體無好，伊逐時都hō͘人感覺真有鬥志，為台獨運動四界奔走，嘛時常轉去台灣環島宣傳台獨ê理念。這幾年來，伊特別體會著台語文運動是台獨運動ê根本。所以伊家己ê演講稿攏用台文寫，聯盟內部ê通訊嘛攏使用台語文，會議記錄嘛是仝款。公論報ê社論用台文寫這項突破，伊hō͘阮上大ê支持，甚至嘛家己參與寫作，伊閣推動第一屆ê北美洲台語營。伊全力結合台語文運動團體推動台語文運動ê努力，雖然受著聯盟內部反動勢力非常大ê打擊，伊嘛一直攏無餒志。

7月18，台語營了後，我tī in兜過暝。我因為知影伊ê身體已經真無好，伊ê好朋友—吳木盛夫婦kap伊ê牽手明霞姊攏希望我會當khiā tī了朋友ê立場，苦勸伊辭掉聯盟主席ê工作，好好靜養。我kap伊講到半暝三點，伊一直攏kā我講伊ê身體無要緊，只是卡無方便，愛不時洗腎niâ。伊閣講伊若辭掉主席ê職務，阮beh tī聯盟內底推sak台語文運動就閣卡無可能ah。最後我只好kanna苦勸伊mài轉去台灣助選，因為助選真費體力，何況伊是一個每二日著愛洗一遍腎ê人。伊嘛是應講：應該無問題。伊是我看過上蓋堅強5鬥士！身體明明都無好勢，嘛是堅持戰鬥到最後。我從來m̄ bat聽過伊teh haiⁿ東haiⁿ西，逐時都充滿戰鬥ê意志。

做一個伊tī台獨聯盟ê戰友，伊ê離開hō͘我感覺真艱苦，嘛感覺對伊真虧欠。這遍有關台灣公論報社論是m̄是會使用台語文寫ê爭論，tī中委會內部意識形態ê「戰鬥」，我提早退出戰場，留伊一個人固關苦戰，到伊戰死。

伊是一個戰到死ê勇士