《哈佛台語筆記》

 | | | 轉寄

半爿天天半爿─歌謠俗諺中 ê 台灣女性

作者 李勤岸 2008.10.19

br> 壹、台灣女性 ê 兩个源頭
一、 平埔族母系社會 ê 女性
這是根據第一位駐台荷蘭牧師干治士（George Candidius， 15971647）ê 記錄（干治士 1627 年五月初四來到台灣），伊描寫 tī 嘉南平原生活 ê Siraya 平埔族：
查甫 ê：非常強壯，實際上差不多算是「巨人」。皮膚真烏、ná 像印度人。 熱人無穿衫仔褲。
查某 ê：矮小，真大 kho͘，強壯，皮膚咖啡色、黃色中間。小可穿「一點」仔衫仔褲。一工用溫水洗兩遍身軀，洗身軀 ê 時，若有查甫人經過、看著，無要緊（當時代 ê 中國漢人，hō͘ 人看著啥物就 ài kā hia 切除，若看著規身軀，一定 ài 嫁伊，若無，就自殺）。
友善、忠實、好客，bē 偷 the̍h ，khioh 著物件，一定物歸原主。
查某人做苦工，負責大部份 ê 農事。無 tī 田裡作穡 ê 時，坐竹簰仔去 lia̍h 毛蟹、蝦仔、蚵仔。當婦女做工 ê 時，查甫人 tī hia 閒，特別 17~24 歲強壯 ê 男人。40~60 ê 男人 chiah 會 tàng tòe 去田裡。In tī 田裡搭寮仔歇睏，過暝，兩個月無轉來村裡。
政治組織：長老議會制，選 12 个名聲真好 ê 長老（40 歲），兩年一任。 用討論、辯論 ê 方式來提議 hō͘ 村民參考。
一年有三月日無穿衫仔褲，這是法律，mā 是信仰，in 相信若無按呢做，神會 m̄ hō͘ in 雨水。（算是一種集體乞雨，馬英九 ài 學！）若是違犯，長老會沒收，長老坐 tiàm 路邊監視，若有人穿衫仔褲，就處罰。
節慶 ê 時，查某人會使打扮 súi súi，不過若是 siuⁿ 過分，長老會使當場 kā 衫仔褲 lia̍h hō͘ 破。
發現某討客兄，丈夫會使自行報復，會使去客兄 in 兜 lia̍h 兩、三隻豬仔報復。
查甫人 20、21 chiah 會使結婚。17 歲開始留長頭毛，頭毛若長，就會使開始交女朋友。
查某偌早結婚攏會使，in 若歡喜就好。若查甫 ê beh 求婚，ài 請 in 兜 ê 女性（女性朋友 mā 會使）去對方求親，ài chah 禮物去，好額 ê 送七、八條裙，三、四百个竹仔編 ê 手環，十、十二 kha 手指。對方若有 kah 意，禮物收起來，就算完婚，彼暝就會使做伙睏。不過，日時 ài 偷偷仔離開，轉去，然後暗時 chiah koh 偷偷仔來太太 ê 厝。Khiā tī 門口，太太允准 chiah 會使入來，若無允准，ài koh 轉去。
女性有田 ê 所有權。
女性 37 歲進前 bē 使生囝，若有身，攏 ài the̍h 掉，由尪姨仔處理。
丈夫到 50 歲 chiah 會使搬來 kap 某 tòa 。
離婚真容易：只要你無 koh 愛恁某就會使離開，不過若講 bē 出理由，就 ài kā 當初送來 ê 物件留落來，若有理由，比如講 hō͘ 某拍，就會使 kā 物件 chah 走。所以離婚 ê 次數，一冬有可能 chham 月份平濟。
一夫一妻制：bē 使同時娶兩个以上。不過會使偷食，太太 mā 仝款，只要 mài 公開做，對方攏假做 m̄ 知影。
二、漢人父權社會 ê 女性
儒家傳統 ê 漢人社會，是一个父權 ê 威權社會。女人只是男人 ê 財產，女性 ài 遵守三從四德，甚至「夫死」to̍h ài「從子」，因為「子」是查甫 ê。男女授受不親， the̍h 物件 hō͘ 查甫人 bē 使 kō 著手，無 to̍h ài tok 起來。
貳、母系社會女性 ê 情關及性觀
一、愛情：自由戀愛
平埔族女性 ê 情關 khah 自由，會使自由戀愛，無管查甫、查某攏會使採取主動。婚後雖然情關 khah ân ，不過 mā m̄ 是 ân kah bē 透氣。偷食 ê 自由猶有，只要有小可 chām 節就會使。離婚 mā 有相當 ê 自由，婚姻並無變做墳墓。
二、婚姻：牽手禮、一夫一妻
台灣人講家己 ê 某講是「牽手」，是 ùi 平埔族來 ê 。平埔族查甫 ê 看 kah 意查某 ê，抑是查某 ê 看 kah 意查甫 ê，就會使去牽對方 ê 手，表示 beh kap 對方成做夫妻，這叫做「牽手禮」。所以一開始，「牽手」無一定是指「某」，mā 會使指「翁」。翁仔某互相講對方是牽手。後來社會漢化，「牽手」這个 稱呼 soah 去 hō͘ 查甫人佔去。聽講平平講南島語 ê 菲律賓人到 tan 猶是有講「牽手」，不過是查某 ê 叫查甫 ê 牽手。當然咱 tī chia 講 ê 攏是語意移借，m̄ 是指語音。「牽手」當然是純漢語 ê 語音。
雖然戀愛自由、偷食方便，不過卻 ài 遵守一夫一妻 ê 制度。也就是講仝厝殼下腳 bē 使無成雙成對，「齊人之福」bē 通。一夫一妻 tī 西方 mā ài 到基督教文明普遍以後 chiah 開始成做普世 ê 觀念。就這點來講，平埔族誠進步。
三、性：性開放
平埔族 ê 性觀念相當「前衛」。猶未結婚，就會使有「婚前性行為」，而且是合法 ê「試婚」，tiàm 田邊搭寮仔先 tòa 做伙，會合，chiah 會使搬入去女方 ê 厝裡 tòa ，正式過門做「翁」。 婚外 ê 性行為並無親像漢人社會 ài kā 女性「沈江」、「落井」，抑是親像猶大人 ài kā 查某 ê 用石頭 tìm 到死。婚外性行為雖然無鼓勵，不過會 tàng 忍受，當做無看著就好，若是修養無 hiah 好，會使去對方 hia 算數，討兩隻豬準抵數。
這款社會應該真少情殺案件 chiah tio̍h。Mā 應該無「茶店仔4」。
參、父權社會女性 ê 情關及性觀
一、愛情：單戀、單相思
Tī 情關管制 chiahni̍h ân，會使講 ântòngtòng，腳擋掛手擋，chia 擋 hia 擋，男性可能猶無啥物大問題，因為查甫人「風流」被看做真 gâu。若是查某人只好單戀、單相思。這可能是按怎台語歌內底有 hiah 濟女性單戀的歌。Koh khah 趣味就是，hia ê 單戀歌作者 koh m̄ 是女性，koh 是查甫 ê。按呢會 tàng 講擋 kah 甚至單相思 ê 心聲 mā m̄ 敢講出來，需要透過男性替 in 講。按呢，敢無悲哀？
二、婚姻：指腹為婚、相親、做人、一夫多妻
女性 ê 婚姻是被決定 ê，被父權社會決定 ê，甚至 tī 腹肚內底就 hō͘ 人「指」定去，甚至是做「新婦仔5」，hō͘ 人飼大漢（通常是苦毒大漢）thang 做「新婦6」。若是 chham 人訂親講是已經「做人」，因為 beh 去開始替人「做人」。因為漢人社會是一夫多妻，會 tàng 嫁人做大某猶算好運，若是做細姨，就 khah 不幸，無管按怎，攏是 chham 人分無一半。這款社會，女性 ê 性生活實在真可憐。
Khah 近代 ê 漢人社會有 khah 進步，會 tàng 先對看，號做「相親」。若是自由戀愛 tī 漢人社會是經過「家庭革命」chiah 爭來 ê。台灣 ê 第一條創作民謠「桃花泣血記」，1932 年寫 ê，是一部仝名 ê 電影 ê 主題曲，伊 ê 主題就是爭取自由戀愛 ê 革命故事：
戀愛無分階級性，第一要緊是真情， 琳姑出世歹環境，親像桃花 hiah 薄命。 禮教束縛非現代，最好自由 ê 世界， 德恩老母無理解，雖然有錢都也害。
三、性：性封閉
相對平埔社會 ê 性開放，漢人社會是典型 ê 性封閉 ê 社會。女性 ê 性只是傳宗接代，換句話講女性不過是生囡仔 ê 工具。不但 bē 使享受性 ê 快樂，甚至 bē 使感覺有性高潮。台語內底 ê 「爽」，女性一般 hō͘ 人教講 bē 使講這字「爽」 ，無管偌爽 to bē 使 hoah 出來，按呢敢 bē 變做性 ê 自閉症？
肆、歌謠俗語中平埔族女性 ê 痕跡
我所謂 ê 歌謠是指兩項物件，褒歌及民謠。褒歌是台灣民間男女相褒對唱 ê 歌詩。內底有真濟相當性感 ê 詩，以女性主動，甚至是討客兄 ê 詩。這我相信是平埔族女性 ê 性細胞 ê 活動。民謠內底 mā 有一寡節奏非常樂天，內容性暗示十足，會 tàng 跳平埔族 ê 車鼓陣7 ê 搖腳 chhng 花 ê 舞 ê ，我相信 kantan 生性樂天 ê 南島語族 chiah 有法度產生 chia ê 歌謠。下面我舉幾个例，咱 thang 看出平埔女性熱情 ê 痕跡。若是鬥句 ê 俗諺實在是真濟漢人 ê 物仔，真 oh chhōe 著平埔 ê 痕跡 ：
一、褒歌
小妹 kap 哥
小妹 kap 哥 chiahni̍h 好， 望 beh 生囝親像哥。 Kiámchhái 哥仔若轉倒， 有時看囝那看哥。
這顯然無婚姻關係，不過有性行為，koh beh 生囝。
Kap 君約在
Kap 君約在後壁溝， 菅8尾拍結做號頭9。 夭壽啥人 kā 阮 tháu， 拍歹姻緣是無 gâu。
這是典型 ê「野合」。Outdoors ê 性生活，tī 漢人 ê 社會大約是不可思議 ê。
雙腳踏到
雙腳踏到哥房中， 雙手牽哥來參詳。 喚哥 m̄ thang 大聲嚷， 我是無翁姑不將。
這个查某 chiahni̍h sexoally agressive，不但牽手，koh 牽雙手，koh 叫查甫 ê m̄ thang 大細聲嚷，十足「是來也」（西拉雅）ê 風格。
嘴來相唚
嘴來相唚舌相交， 嘴瀾甜甜吞落喉。 好來在前 bái 在後， Pō͘pīn 分開目屎流。
到 chia 來就足「限制級」啊。French Kiss ê 描寫 chiahni̍h 明。一時分開就目屎四 lâm 垂。逐時 to 想 beh 相交，無 beh pak 開。
一尺枕頭
一尺枕頭睏三寸， 留七寸長等候君。 心肝咧想都真穩， 無料丈夫轉來巡。 看著丈夫驚又悶， 至驚拍罵我親君。
這是討客兄 ê 詩。不過伊驚 ê 是 in 翁「拍罵」 in 情人。Kantan 拍抑是罵 niātiāⁿ，m̄ 是 thâi，可見是真有肚量 ê 平埔族。
二、民謠
牛犁仔歌
…手牽著犁兄喂，行到水田頭… …我勸犁兄喂，m̄ thang 叫艱苦…
這是嘉南平原原住民樂觀進取 ê 歌，女性主動牽男性 ê 手，叫查甫人 m̄ thang hoah 艱苦，to̍h ài 拍拚犁「水田」。這條歌會 tàng 跳車鼓舞。
四季紅
…叨一項？敢猶有別項？ 肉文笑，目睭降…
Tī 四季如夏 ê 台灣，竟然會 tàng 產生歌頌四季 ê 歌，實在奇蹟。不過 khah 斟酌聽 leh ，是四季攏 teh 想「彼項」代誌 ê 調情歌。這條歌以前 bat hō͘ 國民黨禁，講號做「紅」是共產黨 ê 色。真正是%$#@*。M̄ koh 聽講有人 in 兜查某囡仔 bē 使唱，是 in 兜阿媽規定 ê，因為 siun 過 hiau510，規年透冬攏 teh 想彼項。
另外，這類 ê 歌猶 bē 少，比如「五更鼓」、「滿山春色」、「桃花鄉」等等，攏有表達平埔族女性熱情、快樂 ê 性格。
三、俗諺
聽某嘴，大富貴。 驚某大丈夫，拍某豬狗牛。 一个某 khah 好三个天公祖。
平埔族是女性社會，女人當家做主，女人有財產權，財產繼承權，聽某 ê 話是應該 ê，m̄ thang 可能 mā bē 使拍。若會 tàng 聽到無聽會驚 ê 地步 chiah 是「大丈夫」。某有財產，以後 koh 會 tàng kā 拐來變做家己 ê(漢人娶平埔就是按呢得著財產 ê ），這款某當然 khah 好天公祖。
伍、歌謠俗語中漢人女性 ê 痕跡
一、褒歌
半暝月娘
半暝月娘入紗窗， 偏偏照我守空房。 關窗將月緊緊送， 送去隔壁照別人。
這款守空房 ê 單相思 ê 艱苦，無愛 hō͘ 人看著，hō͘ 月娘看著 mā 無愛，叫伊去看別人 ê 單相思，mài 看我 ê 歹看相。
門口一欉
門口一欉相思欉， 相思病落 m̄ 知人。 先生來看講無望， 搭心11來看好當當。 單相思到會死人 ê 地步有影嚴重。不過，愛人仔看一下就好去，這欉相思仔實在無醫。
兄仔十八
兄仔十八娘廿三， m̄ 敢糞箕 thīn 盛籃。 Beh 倚哥身又 m̄ 敢， 害我舊年想到 tan。 愛著少年家，想規冬，m̄ 敢倚去倚身，可憐代。縛腳縛手 ê 儒家禮教，實在害死查某人。
二、民謠
望春風
孤夜無伴守燈下，清風對面吹， 十七八歲未出嫁，想著少年家， 果然標緻面肉白，啥家人子弟， 想 beh 問伊驚歹勢，心內彈琵琶。 想 beh 郎君做翁婿，意愛在心內， 等待何時君來採，青春花當開， 聽見外面有人來，開門 kā 看 māi ， 月娘笑阮戇大呆，hō͘ 風騙 m̄ 知。
這首逐人攏會曉哼會曉唱 ê 民謠，活跳跳寫出少女思春，等人來「採」ê 心聲，講起來是女性心肝芛仔內底上 kài 祕密 ê「性渴望」，大家攏唱 kah siuⁿ 熟，攏無啥知影 teh 唱啥物。真趣味 ê 是，連這款心聲，mā ài 透過男性來寫曲（鄧雨賢）、寫詞（李臨秋），漢人女性 ê「性壓抑」會使講真嚴重。
白牡丹
百牡丹笑 búnbún， 妖嬌含蕊等親君， 無憂愁，無怨恨， 單守花園一枝春。 敢真正無憂愁？敢真正無怨恨？ 白牡丹等君挽， 希望惜花頭一層， 無嫌早，無嫌慢， 甘願 hō͘ 君插花瓶。
敢真正無嫌 siuⁿ 早？敢真正無嫌 siuⁿ 慢？
六月茉莉
六月茉莉真正 súi，郎君生做 mā 真古錐， 好花難得成雙對，身邊無娘仔伊 to 上 khik 虧。 … 單身娘仔守空房，好花也著有人挽， 無人知影伊 to 氣死人。 郎君身邊閒閒真無采，單身姑娘仔身邊無郎君 thang kā「挽花」，實在有影造化作弄，氣死人。
三、俗諺
有真濟俗諺傳達傳統漢人社會女性 ê 悲哀，無管 tī 婚姻、tī 性、tī 感情生活攏是無奈，無家己 ê 自主性。
嫁雞隨雞飛，嫁狗隨狗走。 狗母若無搖獅，狗公呣敢來。 龍交龍，鳳交鳳，癮痀 ê 交 tòng 戇。 緊紡無好紗，緊嫁無好 ta 家。 Bái bái 翁，食 bē 空。 嫁人擔蔥賣菜翁，呣嫁人雙人一婿。 嫁著矮腳翁 燒香點火倩別人 嫁著青瞑翁 梳頭抹粉無采工 嫁著臭耳翁 講話無聽氣死人 嫁著 thâi 豬翁 無油煮菜也會芳 嫁著賣菜翁 三頓 m̄ 是菜就是蔥 嫁著讀冊翁 三日無食也輕鬆 嫁著生理翁 日日守空房 嫁著作穡翁 無閒 thang 好洗頭鬃 嫁著無厝翁 搬來搬去 khah 捌人
陸、結論
台灣女性有平埔族 ê 開放，mā 有漢族 ê 保守。該主動就主動，該被動就被動。若有漢人 ê 半个天，koh 有平埔族 ê 半个天，按呢就有完整女性 ê 一个天，一个上理想 ê 台灣女性圓圓圓 ê 天。