《哈佛台語筆記》

 | | | 轉寄

學術 kap 技術之間

作者 李勤岸 2007.04.29

今仔日中文組邀請 Princeton 大學 ê 周 C.P.教授來演講。雖然是週末，猶有Yale、Tufts、Swarthmore、MIT、麻大 (UM, Amherst) ê 漢語教師約三十人來參加。

伊ê題目是：『學術 kap 技術之間國外漢語教學 ê 困境』。

伊自74年來 Princeton到taⁿ 。已經有編漢語教學課本十外本。

伊 ê 演講主要是講 tī 美國 ê 華語教學抑是華語課本，二十冬來，攏 siuⁿ 過強調功能，攏teh講技術，所以一直hō͘學術界看無夠重。Chit款功能語言教學法，雖然mā強調語言教學bē當無講文化，不過in講ê文化tiāⁿtiāⁿ以偏概全、以古代今，而且siuⁿ過頭強化二個文化ê無仝。這是無必要，mā無合tī事實ê。伊編ê課本hō͘人批評siuⁿ過強調『祖國』ê負面，伊反駁講一般教科書攏siuⁿ過頭虛假，『隱惡揚善』，教一寡m̄是當今社會ê事實，顛倒是古早明清時代ê文化，講著中國人一定是穿長袍、戴小帽、縛頭鬃尾仔、娶細姨，中國音樂一定是古箏，按呢是teh滿足帝國主義ê『博物館心理』。

伊講話算是真坦白，真直接。有ê有淡薄仔道理，有ê真無常識。比論伊講中國ê文學家大多數是南方人，he是因為in m̄是寫真純正ê北京話，是南方人ê普通話，按呢顛倒有共通性，北京話寫ê siuⁿ純正，siuⁿ過特殊性，顛倒無人看有。所以伊反對廣東人寫廣東話，講he無前途。伊講若是有一工香港人無講廣東話，講華語，台灣人無講台灣話，講華語，按呢伊ē真歡喜。

我坐tī遐，練習我ê忍功。我bē使peh起來kap伊chèⁿ，孤鳥插人群，我若kap in辯起來穩當ē氣死。到時兩旁對tu，連台語課 to有可能hō͘人除掉。chhím來ê 時，系主任有kā我講，政治立場m̄通siuⁿ強，若chhòng無好勢，in中國人有可能mā會來抗議咱開台語課，頂回台灣ê外交部長田弘茂來哈佛演講，in嘛來抗議。東亞語文系系主任是白人，伊tī五月khà電話去花蓮kā我interview，參我tī電話中討論中國文化kap台灣文化ê問題，講beh兩點鐘，真了解我ê立場，伊上尾講：『希望你來以後，咱系mài裡有內戰 (civil war)！』。前幾工 chiah 知柏克萊大學八冬來爭取beh開正式學分ê 台語課攏hō͘中國學者阻礙，到 taⁿ kannā 會當由大學部學生用社團名義推展。我來哈佛 ê 任務 m̄ 是beh參in中國人正面衝突，是beh kā 台語課開 hō͘ 成功，先khiā hō͘ 在才講。由在伊去亂彈、臭彈。Tī學術kap技術之間，我ê學術需要倚靠忍耐 ê 技術。

伊若是講著中國人有時講『同胞』，講著中國，有時講『祖國』。我攏掠準伊是北京來ê ，是中國來 ê 中國人。結果 m̄ 是，伊是台灣來ê。會後食飯 ê 時，伊坐 tī 我邊仔，參我講話，問我 tī 台灣讀甚物？我講 tī 台灣是讀東海大學外文系，伊 chiah 講伊mā是東海畢業ê，是中文系。我一開始掠準是tī中國嘛有一間東海大學，伊講伊是台北人，台語嘛會通，我人煞gāng去。台灣教育出來ê『外省人』會當中國化到這個地步，tī美國教華語、編華語課本，做中國學者，演講兩、三點鐘，你嘛掠準伊是北京來ê。

2001/10/27

（Chit篇本底是《哈佛台語筆記》輯一 Journal•筆記－哈佛校園聽著台語ê鐘聲ê第四篇）