《《原鄉．夜合》 客語詩集》

 | | | 轉寄

假使美濃會起水庫 Ká sṳ̀ Mì Nùng voi hí súi khu

作者 曾貴海 白話字：邱淑華 2007.11.11

一條幾億噸ke水龍
Yit thiàu kí yi tún ke súi liùng
日日夜夜
Ngit ngit ya ya
想要衝下來吞殺歸庄人
Sióng oi chhûng hâ lòi thûn sat kûi chông ngìn
半夜醒來
Pan ya siáng lòi
會聽到河壩噭泣ke悲聲
Voi thâng tó hò pa keu chṳ̂ ke pî sâng

電鋸會鋸淨山頂ke樹林
Thien ki voi ki chhiang sân táng ke su lìm
變做一棟一棟高級洋樓
Pien cho yit tung yit tung kô khip yòng leù
山靈會走避深山
Sân lìn voi cheú piang chhṳ̂m sân
綠色ke靚山會失去青春ke光彩
Liu̍k set ke chiâng sân voi sṳt hi chhiâng chhûn ke kông chhái
田坵會變做大路屋仔
Thièn khiû voi pien cho thai lu vuk é


農民會穿上西裝
Nùng mìn voi chok sông sî chông
毋識麼介煙草禾仔
M̀ sṳt mak ke yân chhó vò é

街上沒人想講客話
Kiâi hong mò ngìn sióng kóng Hak fa
親切ke鄉音
Chhîn chhiet ke hiông yîm
只有對老夥房傳出來
Chṳ́ yû tui ló fó fòng chhòn chhut lòi

鄉親會賣田賣地
Hiông chhîn voi mai thièn mai thi
客家人會變成人客
Hak Kâ ngìn voi pien sṳ̀n ngìn hak
食飽後就要恬恬離開
Sṳ̍t páu heu chhiu oi tiâm tiâm lì khôi

祖先ke靈魂
Chú siên ke lìn fùn
會託夢安慰子孫
Voi thok mung ôn vi chṳ́ sûn
講這就係客家人命運ke原罪
Kóng yá chhiu he Hak Kâ ngìn miang yun ke ngiàn chhui


鍾理和會還魂
Chûng Lîfò voi vàn fùn
倚佇笠山頂
Khî thê lip sân táng
寫下生前沒完成ke
Siá hâ sâng chhièn mò vàn sṳ̀n ke
笠山悲歌
Lip sân pî kô

假使美濃會起水庫
Ká sṳ́ Mì Nùng voi hí súi khu
留下來ke客家人
Liù hâ lòi ke Hak Kâ ngìn
只好準備放火燒天
Chṳ́ yû chún phi piong fó seû thiên