《台語家庭》

 | | | 轉寄

父母是傳承母語ê使命者

作者 Teng Hongtin 2005.12.11

br>
父母是傳承母語ê使命者 家庭是母語教育成敗ê關鍵(21)

我是1970年出世tī彰化縣ê台灣女性，母語是台灣Hōló話(m̄ koh最近lú來lú發覺katī有Babuza番婆ê血源)，tī我讀小學ê時陣，講台灣話是「髒話」，愛罰錢、koh會hō͘人歧視；同時，kannā會曉講台灣話ê人就變成二等ê人種，hō͘人看bōe起。我mā bat lia̍hchún講「國語」chiah是正式、有禮貌、夠水準。M̄ koh我ê阿母，伊kannā會曉講台灣Hōló話。

等我讀大學liáuāu,台灣社會行向解嚴後ê 多元社會，我開始會曉katī讀冊、自我批判，liáuāu,我chiah清醒過來，而且有一段時間，感覺對katī ê母語真虧欠，mā一直自我責備。

我讀大學liáuāu,chiah開始koh回歸母語，hit時chiah發現katī ê母語能力chiâⁿ bái,時常hō͘阮翁恥笑kap責備，因為伊ê台灣Hōló話比我khah好。
──有chiâⁿ chōe朋友因為台灣話講liáu無夠好，驚hō͘人恥笑，soah koh kiu轉去，繼續使用「中華民國國語」，同時mā m̄願koh再去回想katī ê母語hō͘「中華民國國語」迫害ê歷史kap現實，甚至講：『我們要放眼未來，不要對過去斤斤計較；我們要擁抱世界，不要局限在小小的台灣。』
──M̄ koh,我是鐵石心腸，mā承認katī ê母語能力差父母一大截，koh感覺對不起將母語傳承hō͘我ê序大人，因此koh khah認真反省kap學習。Kàu今á日，已經過10 外冬loh,我感覺katī ê母語能力恢復chiâⁿ chōe,m̄ koh iáu是愛koh繼續增強功力。

頭前，我會講kah hiahnih tn̂g,第一，是beh講，若想beh學好母語，上重要ê是信念kap意志。若是無族群文化傳承ê使命感，koh lia̍hchún語言只是溝通ê工具，ánne tō照台灣ê外來統治者所做ê:降低甚至禁止母語使用，只使用統治者制定ê單一官方語言tō好ah。
──所以，母語教學愛同時教育「族群文化kap歷史」，而且愛創造族群文化特色ê生活情境，因為，母語是族群文化ê重要基礎；若無，kannā教母語，甚至母語只是用來教育統治者ê外來文化。ánne,母語不但無法度代表族群ê尊嚴，最後mā會行向滅絕ê下場。

第二，我讀大學liáuāu,會當chiâⁿ kín tō回歸母語ê goânin:除liáu我是鐵石心腸以外，tō愛感謝我ê序大人，in自從我一出世，就一直用台灣話kap我講話，尤其我ê阿母，「伊完全聽無中華民國國語」，所以「我一定愛kap阿母講台灣話」，並且愛時常替伊翻譯絕大多數使用「中華民國國語」ê電視節目。
──也就是講，父母是上關鍵ê母語教師。──我覺悟tio̍h chit一點，所以leh教阮chabó͘kiáⁿ講台灣話ê時陣，伊若是講「國語」，我就會儘量溫柔ê用台灣話講：「媽媽聽無neh,你用台語koh講一遍。」結果，我ê kiáⁿ mā學會曉kā中國話翻譯做台灣Hōló話ê能力；tú開始伊ê發音無夠好，mkoh,我一直oló伊、鼓勵伊，幾年來，伊ê語言能力進步chiâⁿ chōe。
──我發現，gín'á若是「會曉講」母語，自然聽有母語；若是伊「kannā會曉聽母語」，最後，伊tō會「無慣勢講母語」，mā「m̄敢講母語」，甚至「無愛講母語」；當gín'á「無愛講母語」，就是母語ê死期kàu loh。Che需要序大人堅定ê態度kap耐心。
我真幸運，因為阮翁ê語言認同kap 我共款，ánne,阮beh創造母語環境tō chiâⁿ簡單，beh學好母語，tī現此時ê台灣，一定愛靠序大人ê phahpiàⁿ。

(這篇文章 iáubōe soah,後禮拜歡迎繼續收看。)