《台語家庭》

 | | | 轉寄

家庭是母語教育成敗ê關鍵

作者 Teng Hongtin 2005.12.18

父母是傳承母語ê使命者 家庭是母語教育成敗ê關鍵 (22)

(這篇文章是頂禮拜ê完結篇)

有真chōe人kiòsī tângchôe學兩種以上ê語言，會造成gín'á ê負擔，講gín'á會真苦憐。事實上，tī阮兜，我徹底用行動推翻chit種錯誤的論調。

我本身是讀中國文學系出身ê,過去mā bat教過一段時間ê「國文」，mkoh,我從來無願意教阮囝講「中華民國國語」、ㄅㄆㄇkap認bat漢字。結果，我ê chabó͘kiáⁿ，幼稚園出業ê時陣，「國語」聽講讀寫ê能力，竟然chiâⁿ好；伊甚至會使kannā看漢字無需要ㄅㄆㄇ，就會當唸出一大kōaⁿ ê「國語」。我想原因出在：1.幼嬰時ê育嬰中心講「國語」，2.電視bàngkà節目lóng講「國語」，3.幼稚園是「國語」環境，4.兒童讀本大多數是「國語」注音，伊以前時常懇求我讀故事，我m̄肯用「國語」唸，結果伊katī看注音，不知不覺soah記tiâu一堆漢字，5.阮tòa台中市，市區ê人khah愛講「國語」。

若是有人一直kā我oló阮kiáⁿ ê「國語能力」足好ê時陣，我m̄ nā無感覺驕傲(足chōe父母會驕傲)，顛倒koh khah煩惱伊ê母語能力，所以mā一直不斷增強伊ê母語語詞、語法，並且開始教伊台灣羅馬字。

讀幼稚園中班ê時陣，伊竟然kā我講，伊感覺「國語」khah好聽，hit時我繼續假影聽無中國話，m̄ koh伊發現我會曉「國語」；我kā伊講阿媽kannā會曉台灣話，伊必須愛學台灣話，若無，阿媽tō聽無伊leh講啥物，ánne阿媽足可憐ê,伊ánne mā無尊重阿媽；koh來，我ûnûn'á kā伊解說：每一種語言lóng有伊ê特色。Chitmá伊已經bô koh認為中國話khah好聽。
後來，伊迷tio̍h bàngkà「小魔女DoReMi」，我順勢講：「咱兜是負責教人講台灣話ê魔法家庭，愛講台灣話，魔法chiah會進步。」而且伊ê魔女使命：就是愛教弟弟講台灣話。
──有一工，伊會發覺che是騙伊ê,m̄ koh,重點是，伊因ūi ánn不e斷增強母語使用ê機會kap能力，「習慣成做自然」。甚至伊iā發現伊ê同學竟然mā會曉講台灣話，而且mā有台灣客人，伊真歡喜。雖然，伊kap共年紀ê gín'á iáu是khah慣勢講中國話，m̄ koh,我相信，只要阮兜一直lóng是「母語為主體ê語言環境」，伊ê母語只會進步，bōe退步。

若是父母兩人ê母語無共，我認為，只要堅持完全使用母語，老父教老父ê,老母教老母ê,同時老父mā應該愛學習牽手ê母語，老母mā應該愛學翁婿ê母語，雙語學習之下，gín'á讀小學進前，母語ê能力一定chiâⁿ好。

上重要ê是：做序大人ê,實在是無需要一直教咱台灣gín'á講中國話,因為咱整個ê台灣學校、社會kap傳播媒體，差不多lóng是中國話ê天下，全台灣ê人lóng leh替咱教囝仔中國話；ah,母語，序大人若是不肯教，無認真教，咱ê gín'á,就減學tio̍h一種語言，尤其是，這是伊ê家族世代傳承的母語。

Koh再講，有真濟序大人所講的中國話lóng 是「台灣國語」，序大人家己tō講bōe好勢，敢有需要koh hō͘咱ê囝仔所學tio̍h ê中國話像「台灣國語」leh?

只有心肝lia̍h thánhoâiⁿ ê序大人，只有真心疼惜序細koh敬重序大ê父母，chiah會堅持用母語來kap gín'á講話溝通。父母若m̄肯教，母語的確會滅絕，無外久咱可能就看會tio̍h。

我8足歲ê chabó͘kiáⁿ，中國話文能力上強(che絕對m̄是我教ê)，台灣Hōló話ê能力mā真好(伊會當用台灣Hōló話katī編一大kōaⁿ ê故事)，mā學會曉一寡美語，有冬時我mā會教伊一兩句客語，伊mā學唱YOYO TV日本bàngkà ê日語主題歌。Che,完全是tī伊日常生活中自然形成ê,我問伊：「學chiah chōe種話，敢會辛苦？」伊講：「Bōea!」

Kap伊ê同學比起來，伊ke學tio̍h 使用台灣Hōló話ê能力，che敢m̄是真使人歡喜ê代誌？伊輕輕鬆鬆tō學會曉台灣Hōló話，實在是祖媽祖公有保佑，感謝。

身為一個台灣gín'á ê父母，我更加ǹg望：咱台灣ê社會kap傳播媒體會當真心回歸台灣語言，mài一直做中國專制獨裁文化ê “phah手”，替中國人來蹧躂、消滅咱ê台灣語言kap文化，咱愛繼續教育台灣ê傳播媒體kap執政者。