《台語家庭》

 | | | 轉寄

愛哭青kap Hô͘lin豆chiaⁿ ê故事(62)

作者 Teng Hongtin 2006.02.19

Àikhàuchheng kap Hô͘lintāuchiaⁿ ê kò͘sū
愛哭青kap Hô͘lin豆chiaⁿ ê故事(62)

青青看chi̍t下，擋bōe tiâu，hiônghiông笑出來，ná笑koh ná流鼻水。

「Ah！你笑a！Chiok好ê。M̄ thang koh哭o͘。」

「你是妖怪是m̄ ？」

「No！No！No！ 我chiah m̄是妖怪leh。我是頂港有名聲，下港有出名，thong世界siōng iantâu ê Hô͘lin豆chiaⁿ，我ê豆名號做佳演。我ê親筆簽名相片，tī菜市á，tú hông khǹg tiàm菜擔á，to̍h sûi hō͘我ê愛慕者搶liáuliáu，nā買無tio̍h我性格ê相片ê人，to̍h ē艱苦kah食bōe落飯，睏bōe落眠。」

妖怪嘴ná講，手ná畫，嘴nōa ná噴，身軀ná跳，bōe輸i是世界ê大明星kāng款，架勢十足，jú講jú sòa嘴，頭殼頂hit粒花m̂，soah開做1蕊紅kìkì ê花，koh jú開jú大蕊。青青感覺chiâⁿ心適，目chiu金金相tio̍h i頭殼頂hit蕊神奇ê花。

「你今á日有福氣ē tàng se̍ksāi我，che lóng ài感謝你ê mama，因為i是我...... i是我...... i是我ê青梅竹馬lah。想bōe kàu i soah嫁hō͘你ê apa，我ta̍kpái nā想kàu chia，我to̍h......」

「Ah！你頭殼頂ê花lian去a。」青青想bōe kàu Hô͘lin豆chiaⁿ soah比i koh khah愛哭，而且i ná哭，頭殼頂ê花to̍h ē倒頭栽落來，khàm tī i ê目chiu前，實在chiâⁿ好sńg。

青青m̄知影siáⁿmi̍h號做「青梅竹馬」，i今年chiah 5歲niāniā，m̄ koh i感覺Hô͘lin豆chiaⁿ chiok苦憐ê，哭kah hiahnī傷心。

「Oeh！你mài koh哭alah！Nā無，我beh koh哭ao͘。你nā ē知影我是青青？我nā ē tī chia？我想beh tńg去chhōe papa kap mama。」

Hô͘lin豆chiaⁿ無teh哭liáu後，頭殼頂ê花koh變做1粒花m̂a，實在chiâⁿ厲害。I頭khi孤pêng，手骨giú āmkún hit隻大紅色ê ia̍h'á。

「Oah！你chit隻ia̍h'á是真êneh！Koh ē sái sìkòe飛。」

「Kàu taⁿ你chiah知，我是真厲害ê Hô͘lin豆chiaⁿa。I m̄ nā ē飛，i koh ē講話o͘。」

「是a，我是全世界siōng súi ê ia̍h'áo͘。我叫鳳凰lah！Ánchóaⁿ，你有kahì無？」

青青本來to̍h chiâⁿ愛看美麗ê ia̍h'á sìkòe飛，想bōe kàu，ia̍h'á ē ná跳舞ná kap i講話，今á日thàu早實在chiâⁿ奇怪。

Ia̍h'á ná整理i幼秀ê chhiu，ná講：
「佳演，你bōesái tiāⁿtiāⁿ chiah早to̍h kā我叫起床lah！Ánne ē破壞tio̍h我寶貴ê美容時間neh。」

「好lah！Taⁿ你to已經世界第一súia，nā to̍h計較hiah chōe。」

(這篇文章 iáubōe soah,後禮拜歡迎繼續收看。)