《台語kah魔術》

 | | | 轉寄

重陽節0909

作者 蘇晏德 2023.10.22

＊重陽節(台語文)Tiôngiôngcheh
九月初九重陽節
Káugoe̍h chhekáu Tiôngiôngcheh
現代敬老添話題
Hiāntāi kèngnó͘ thiam ōetê
長輩聚集展才藝
Tióngpòe chūchi̍p tián châigē
啥物出頭逐項會
Siáⁿmi̍h chhutthâu ta̍khāng ē

九月初九是重陽
Káugoe̍h chhekáu sī Tiôngiông
長者智慧愛發揚
Tióngchiá tìhūi ài hoatiông
疼惜序細人有量
Thiàⁿsioh sīsè lâng ūliōng
是咱心中老英雄
Sī lán simtiong lāu enghiông

九月初九敬長輩
Káugoe̍h chhekáu kèng tióngpòe
祝咱序大食百歲
Chiok lán sītōa chia̍h pahhòe
智慧善心攏加倍
Tìhūi siānsim lóng kapōe
身體健康走若飛
Sinthé kiānkhong cháu ná poe

九月初九敬老人
Káugoe̍h chhekáu kèng lāulâng
莫予孤單守空房
Mài hō͘ ko͘toaⁿ chiú khangpâng
出外活動人輕鬆
Chhutgōa oa̍htāng lâng khinsang
人生開始欲出帆
Jînseng khaisí beh chhutphâng