《媒合也可以尋著真愛》

 | | | 轉寄

八字bē合beh án怎？

作者 劉峯松 2011.09.04

年前請一位做水電á ê朋友修理灶腳漏水，in太太陪伊做伙來，一個全副「武裝」，一個穿插入時，比較之下有一點á 無sùphòe。當水電工朋友掠漏ê時，我趁機會kap chit位太太宣傳我偉大ê媒合事業，但是完全無想tio̍h伊已經是一位命理師，專門替人合八字，兩ê人自然koh聊起婚前合八字ê話題。

一開始我怨嘆媒人難為，雖然逐個月配一百gōa對相親，但是同意進一步交往ê soah只有一、二成，大部分見面不如無見面，完全無來電。伊隨講：「八字bē合lah！」koh補充講：「八字若合，就會一見鍾情、難分難捨。」我聽了後馬上講：「ánne以後to̍h先合八字koh再配對，m̄就順勢á順勢mah？」「對，就是ánne。」伊滿心歡喜回答。「今á日tú好配廿對，請『仙á』先合一合，而且請kā適合ê抽出來做暗號，等幾工in相親，就ē tàng驗證有準iáu無準啊。」我真緊to̍h kā廿對ê記錄表送到伊面前，伊mā kā手腕頂ê橐仔khǹg好，koh theh出橐仔內ê萬年曆，馬上進行合八字ê作業。

伊橐仔內除了有ê萬年曆以外，iáu備有粉紅色ê「五行命理學術用紙」，頂面有「以命觀運、以氣改運、運tòe氣轉」一chōa字，koh有「十神」、「天干」、「地支」等表格，kap「子丑寅卯辰巳午未申酉戌亥」等字。差不多一ê時辰，kā廿對四十個lóng合過，結果只有三對六個合，chhun的十七對卅四個bē合。Chit種情形hō͘我有一點á厭氣，因為當初替這廿對配對，是根據雙方ê年歲、身koân、體重、學歷、面貌、職業、信仰、家世、距離kap性格、性地等等來配ê，而且mā lóng kap泰瑞娟、泰瑞珊共同審議、一致通過，但是今á竟然只有一成半八字合，「那會差chiahchē？」

以後若請「查某仙á」幫忙，先合八字，八字合chiah紹介，ánne m̄ tio̍h 對對一見鍾情、對對難分難捨，koh對對白頭偕老mah？八字有chiahni̍h神，ná從來m̄ bat想tio̍h，á我m̄ bat八字竟然敢做媒人，mā應該先phah腳chhng。伊既然講kah kahná真ê仝款，就暫時相信伊一次，我講：「『仙á』，妳合ê三對六個若是真正一見鍾情，另外bē合ê十七對卅四個，koh像不如mài相見仝款，那ánne我甘拜下風、以妳為師，未來ài開半年時間kap妳學命理，m̄ nā我學，泰瑞娟、泰瑞珊以及泰瑞珠lóng tio̍h學。」伊竟然講像我ánne khiàng腳ê人，學三個月就ē tàng出師啊。

合八字若是真正有效，世界一定變kah無仝款。

首先，政府ē tàng下令全國所有戶政事務所，以後tī人出世報戶口ê時，就順續利用電腦合一下八字，kā未來ê翁婿或者bó͘先chhōe出來。每一對翁仔某若經過政府免費合八字，就無外遇、無家暴、無離婚，而且家和萬事成，mā就無社會問題、治安問題、法律問題、經濟問題......，一定天下太平、國泰民安；自然mā bōe有失婚、晚婚或者chhōe無尪、bó͘ ê種種問題。政府只要kā chit件tāichì做好，相信mā無啥物別ê tāichì thang好做，就輕鬆真chē。

續落來，若是政府m̄做，個體戶kap媒合社媒人mā ē tàng做，免得大家浪費時間、白了功，mā免得亂點鴛鴦譜，kā人têngtâⁿ tio̍h，害人一生吵吵鬧鬧，甚至造成離家出走或者刣夫刣bó͘種種驚人ê後果。媒人若看人真準，自然名聲傳千里，橐袋仔飽飽，媒人錢淹腳目，保證婚姻市場會比股票市場kohkhah鬧熱，做媒人會比耍股票ê chē，經濟m̄就救活ah？

最後，to̍h是政府、媒人m̄做，做人父母ê mā ē tàng做。比如父母「起初」lóng先替囝兒合八字，khah免生米煮成熟飯了後chiah來後悔；所謂「起初」，to̍h是kiáⁿ戀愛前先合八字。另外根據台灣舊慣記載，以前m̄是自由戀愛時代，男方若認為女方符合條件，就請媒人去講，而且交換八字，然後提hō͘命理師合看覓，若是有合to̍h結婚，無合就免講。M̄ koh以前chabó͘kiáⁿ出世ê時，大部分lóng先請命理師偽造一個好生辰，「女命無真」，好到bōe擋，當然就bōe發生八字bē合ê問題。但是chitmá報戶口lóng tùi醫生開ê出世證明，無法度假ê，所以運命性地既然lóng無法度假啊，koh ài án怎通過八字這關neh？怪ê是，現代人大多數teh戀愛了後、進入婚事準備階段，男方chiah提女方八字去合看覓，chit時差不多所有ê命理師lóng佮意成人之美，雙方八字合to̍h講合；雙方八字bē合，mā照講合，免得拆散人ê好姻緣。既然合八字只求安心，命理師就順hitê勢送hō͘大家一個「安」字，koh安心á kā紅包收落來。是m̄是因為命理師m̄肯講實話，父母koh有teh注意chiah變成一個形式，所以當今社會á是一亂操操neh？to̍h是講，人類雖然發現八字chit項大奧妙，m̄是無kā眾生幫忙啥。

到底ài án怎合理看待八字？根據「查某仙á」使用ê「五行命理學術用紙」頂hitchōa「以命觀運、以氣改運、運tòe氣轉」ê邏輯來看，真明顯ê「氣」chiah siōng重要、chiah siōng有效。當水電工朋友掠漏結束了後，我好奇kā伊請教in翁仔某八字有合boh？soah同齊講「bē合」。目chiu金金看in感情好kah難分難捨，連補漏khangkhè lóng相招出現，真pháiⁿ hō͘人相信in八字bē合？我馬上請教：「lín是án怎辦tio̍hê？」朋友慢慢á講：「靠修養。」chia ê「修養」to̍h是「以氣改運」ê「氣」。原來命理學術hō͘命理師廣闊ê tńg旋空間，mā chiah hō͘這大千世界無限ê可能，to̍h是tī人生所有安危順逆之間，iáu有「氣」thang用。

命理學術看起來kahná真深，但是老人、囡仔lóng ē tàng了解，伊kap百姓ê生活非常óa，並無離人真遠。Chit時chūn我已經一屑á lóng無管「查某仙á」做暗號ê三對六個kap十七對卅四個ê相親結果，到時若「有準」，我會真歡喜kā伊講「有準」；若無準，mā會歡喜kā講「有準」，m̄管結果如何，lóng會用仝一個答案「有準」，hō͘ in lóng感覺歡喜。若是講tio̍h 有beh去學命理，坦白講，iáu koh ài考慮、考慮。

本文出自玉山社出版《媒合也可以找到真愛》