《媒合也可以尋著真愛》

 | | | 轉寄

送妳到車站chiahni̍h困難

作者 劉峯松 2011.10.02

牽紅線有真chē小小ê喜樂，其中之一是看羅貝kap瑪麗相親了後án怎「分手」。Chia ê「分手」，m̄是交往或者戀愛了後分手，是暫時ê「分手」，是m̄知siáng輸siáng贏ê「分手」，mā是「生死不明」ê「分手」。有一kóa人相親ê時講了半點鐘、一點鐘bōe感覺短，有一kóa人講一幾下晡、一個暗時bōe感覺長。有一kóa人禮尚往來、相敬如賓，細jī來、細jī去，有講kap無講仝款；有一kóa人一見如故、一見鍾情，像愛人á仝款，互相使目尾，隨時陷入迷魂陣。但是天下無不散ê筵席，最後lóng ài散場，散場ê時in beh án怎行出大門，án怎一個「分手」ê狀況，有無互相講珍重再見？有無相招koh再行一段？是m̄是依依難捨？á是oat頭就走？kám有chah一點á笑容，像老朋友仝款，á是kek一個面chhiuⁿ，已經變成生份人？

是chapo͘、抑chabó͘送對方去坐車，á是分道揚鑣，各人行各人ê？全是觀察重點，mā全是判斷in iáu有下一回合boh，或者kám bē成做夫妻ê重要根據；ioh一下，hō͘媒人歡喜，但是mā tiāⁿtiāⁿ hō͘媒人有一kóa不如預期ê失望kap感傷。

老實講，雖然看chē阿，soah tiāⁿtiāⁿ猜bōe準。有ê看起來無hiahni̍h熱烈，結束ê時甚至是無歡喜ê，事後soah歡歡喜喜通知同意交往；有ê看起來真甜蜜、難分難捨，soah只是做表面而已，事後拒絕koh再相逢。不過，mā有猜kah真準ê。

有一位羅貝teh結束「羅瑪會談」了後，知影瑪麗tùi真遠ê所在搬chhia到員林，koh tùi車站行到賽凡提斯咖啡，chitmá回程mā tio̍h行到車站，koh再坐車tńg去厝裡，所以羅貝就提議beh送伊，載伊到車站；可惜hō͘瑪麗拒絕。瑪麗拒絕坐伊ê車，我就知影大事不妙、凶多吉少，果然隔轉工就收tio̍h伊發出ê「好人卡」。問瑪麗有beh坐便車boh？伊若答應，無一定表示以後koh有機會；但是伊若無答應，應該就行禮落台，已經結束阿。To̍h是講，問人家有beh坐車boh，是成敗ê快速測試法，mā是ta̍kpái lóng有人用ê試金石。

瑪麗甘願冒tio̍h日頭hiah大ê天，流汗流滴用家己ê雙腳行tńg去車頭，mā無願意踏入你四輪ê冷氣房內，就知影伊意志gōa堅定。Chit件tāichì當然thang tùi善意來解讀，伊可能mā認為：「咱今á日功課做了阿，hō͘我tńg去好好á想看覓，tī iáu無想好chìn前，我boài你對我表示好意、boài你kā我灌迷湯，m̄免koh再加料，iáu無會影響我ê判斷。」

但是真明顯ê是tiāⁿtiāⁿ m̄是ánne，卻是「我對你根本無好感，tùi見面、交談落來就已經形成心證，判你『死刑』阿，ná有可能接受你ê o͘se，接受你招待、坐便車neh？」有可能iáu有kohkhah嚴肅ê考慮，「防人之心bē tàng無，萬一坐tio̍h賊車是beh án怎？」我m̄是瑪麗腹肚內ê bīn蟲，並無法度真正知影伊ê心意，但是tùi智識上判斷，拒絕坐車to̍h是提前hō͘你答案，你mā m̄免亂想了。

其實mā m̄是每一個瑪麗lóng ánne，to̍h是講，tiāⁿtiāⁿ有羅貝講beh送，甚至送tńg去厝，一kóa瑪麗lóng歡喜答應。事後證明羅貝並無佔到啥物便宜，而且瑪麗mā bōe感覺食虧，或者有佔人便宜ê所在，照常發「好人卡」。兩年來chit款tāichì iáu算tiāⁿtiāⁿ有，mā無發生啥物意外或者冤家。有一pái一個tùi屏東來ê羅貝，iáu kā兩個生份ê瑪麗同鄉載tńg去，路途中只teh歇睏站落來方便一下，然後就直接送到家；koh有一個二春ê羅貝，及時kā瑪麗載tńg台中趕暝班，lóng是風平浪靜ê。

一般男女朋友，男方當然有kā女方送到車站或者送tńg去家ê職責，但是相親了後ê情況kahná變kah真複雜，有人願意送，有人無願意送；有人願意hông送，有人無願意hông送。問題是túchiah chiah 歡喜開講一、兩個點鐘，甚至一個下晡、一個暗時，為啥物有人分手了後就變成生份人，甚至警覺性真koân，一下子就kā「對看」真久ê chapo͘變成一匹色狼neh？這未免siuⁿhàm了，真值得討論。

若是羅貝teh相親了後，iáu hō͘瑪麗有hiahni̍h大ê無安全感，對你完全無信任，甚至一下子kā你變成一匹色狼，ánne chit種羅貝是應該好好á反省；但是若是kannā瑪麗這頭teh緊張，天性m̄敢信任別人，防衛心過chē，認為人會像色狼kā你食掉，lóng kā羅貝當做pháiⁿ人，ánne mā m̄ tio̍h，kohkhah應該好好á自我反省。

送chabó͘gín'á到車站，應該只是一種體貼、一種禮貌，是現代文明社會ê國民生活規範，羅貝若無chit種體貼、m̄ bat chit種禮貌，mā m̄是好國民，將來kohkhah m̄是好翁婿；但是瑪麗若無chit種認知，隨便就拒絕人，天ah，你實在無夠溫柔，將來beh án怎做bó͘ ah？最近流行一句話：「總統ah，為啥物見你chiahni̍h困難！？」我mā擋bē tiâu感嘆tio̍h：「瑪麗ah，為啥物送妳到車站chiahni̍h困難！？」

是耶、非耶，這lóng是一個難題，最後泰瑞薩願意獻出一個對策，而且請教各位。羅貝m̄管是啥物動機、啥物理由，若想beh送瑪麗到車站，不如就由媒人來轉達，媒人判斷你ê誠意有夠，就轉達阿，但是請瑪麗賣媒人一個帳、一個面子，就mài拒絕了，緊鑽進人ê冷氣車內去，koh ài坐邊á，koh加講幾句。羅貝m̄管送到車站，á是送tńg去厝，到目的地了後，lóng請khà一通電話hō͘媒人，瑪麗mā千萬bē tàng省掉仝款ê電話，iáu無媒人心內會不安，若去報警是beh án怎？代誌m̄是kohkhah大條阿mah？

本文出自玉山社出版《媒合也可以找到真愛》