《媒合也可以尋著真愛》

 | | | 轉寄

烏白送好人卡「殺很大」

作者 劉峯松 2011.10.09

有tang時á送一、兩張「好人卡」iáu好，但是送chē阿mā漸漸無好，有人送十幾張、幾十張、幾百張，就siuⁿhàm阿。Chit種習慣性ê送卡，ē sái用chitmá華語siōng流行ê一個詞「殺很大」，刣別人，到最後kā家己mā hō͘人刣阿。

有一kóa羅貝kanta收tio̍h一張「好人卡」就戰輸阿，chit種例chē kahná山。Chiahê多情ê羅貝，自尊心真強、感情真脆弱，而且mā的確深深愛tio̍h瑪麗，m̄ koh瑪麗一箭就射中心臟，伊隨時會死哀哉去。有一kóa羅貝命iáu算韌，瑪麗連送幾張、射伊幾箭，lóng tòng會tiâu，不過hō͘射中siuⁿchē pái，最後mā lóng phah tī塗跤。

有一個羅貝性命力siōng強，收tio̍h百gōa張，iáu 無認輸，奮戰到底，所有婚友社lóng kā伊列為拒絕往來，最後chhōe tio̍h松丘，無奈講：「無所在收留我，老師請鬥相共。」我看伊iáu有幾口氣tī，就講：「阮泰瑞薩m̄信邪，對受重傷ê人顛倒歡迎；像你看起來kahná beh死beh死ê款，若無伸手kā你救mā 真m̄忍心。」然後替伊排約十次、八次，果然無一個瑪麗愛，to̍h是講，來chia mā收tio̍h十張、八張「好人卡」，最後只chhun一口氣阿。松丘觀察十次、八次了後，就教伊行指導棋，教伊兩招；第一招，ài伊微微á笑，戇笑mā無關係；第二招，一見面就坦白地表明：「今á日這杯咖啡我請。」竟然ánne就阻檔了瑪麗送卡，現在in已經交往一段時間。但是想來想去，ná有幾個羅貝chiahni̍h猛ê，這mā只ē tàng講是例外。

有一kóa瑪麗的確真súi真美麗，羅貝一見難忘，雖然hō͘送卡，soah有一個錯覺，認為天下一定iáu有同款ê瑪麗pah，就用che做目標，誓言一定ài chhōe tio̍h。天ah，一人一貌，ná ē tàng koh chhōe tio̍h同款ê瑪麗neh？有一kóa羅貝mā m̄是普通人，一收tio̍h「好人卡」，kohkhah誓言ài chhōe tio̍h「比妳kohkhah súi ê」，天ah，ná有chit種必要kap可能。Chit種無認輸ê羅貝，到頭來mā是死路一條。

瑪麗烏白送「好人卡」，其實「殺真大」，真正mā刣到家己；因為胃口jú來jú大了後，顛倒食bōe飽，最後就枵死。一個習慣性送卡ê人，認為有一工白馬王子一定會出現，但是望穿秋水、事與願望相違背；ánne浪費歲月，最後青春消失，卡lóng送了阿，nah iáu有卡thang送？

Chit種送卡送了siuⁿ狂ê，其實漸漸喪失欣賞能力，理智當然mā日漸頇慢，最後lóng成夢幻人生，儘量講一kóa夢話，我tiāⁿtiāⁿ聽無in講啥，一直lóng是自言自語teh講：「chitê感覺á是m̄ tio̍h。」

有一kóa瑪麗真慘，逐pái lóng送「好人卡」hō͘人，但是人mā照樣送「淑女卡」對付轉去。為啥物一個好好ê美少女引bē起羅貝ê興趣，mā會收tio̍h「淑女卡」neh？原來羅貝一看tio̍h面前ê瑪麗，雖然面貌美艷，但是神情怪怪ê，失望、鬱卒、冷淡、輕浮、無耐心、不安......，種種負面情緒全寫tī面頂；chit時chūn對羅貝來講，伊只是一個面目hō͘人討厭ê妖女而已，閃long2boe7赴阿，就以牙還牙，mā真tio̍h急送出一張「淑女卡」。Ánne送來送去、殺來殺去，別人死阿，ánne家己m̄是mā去了了啊？

Chhìnchhái送「好人卡」，真正「殺真大」，泰瑞薩最後變成一座墓場，入口iáu寫tio̍h：「無情地有情天，好人淑女共一場。」唉，總算有一個歸宿mā好。

本文出自玉山社出版《媒合也可以找到真愛》