《白話字文獻e5文明觀》

 | | | 轉寄

第三章 《台灣府城教會報中ê現代醫療衛生書寫》(十二)

作者 陳慕真 2008.07.20

另外，＜論Tháiko>、＜論Tháiko ê傳染性＞兩篇文章lóng是teh講「Tháiko病」。T„頭前咱已經有討論著早期台灣tháiko病患者ê數量真chē，亦因為心理壓力kap社會眼光，致使in自我封閉，病情更加嚴重ê情形。＜論Tháiko＞ chit篇文章開頭就形容tháiko病ê病徵：

人tú著這號病，身軀就一直nōa去，ûnûn'á lak腳lak手，到身軀lóng害，人就死。Chitê病亦bē醫得，khah gâu ê醫生lóng無法tit。

用活跳跳ê台語語詞，簡單兩句話tō kā得到tháiko病ê情形，描寫kah真深入，hō͘人看著感覺「怵目驚心」。這篇文章雖然是講tháiko病，總是，作者ùi聖經道理ê觀點切入，將thaiko病ê病症kap人ê罪惡做對照，koh結合聖經ê基督教教義，論述世間人ê罪kap上帝ê赦免；是一篇結合醫學kap宗教論述ê文章。

＜論Tháiko ê傳染性＞chit篇文章，作者ùi西方醫學博士ê研究成果開始論述，將醫學博士研究出來ê「tháiko病人其實無傳染性」ê醫學新知識，介紹tī文章ni̍h，koh舉醫院內醫生、護士時常kap病人做夥亦無傳染著tháiko病ê例，希望教育大眾對tháiko病「無傳染性」ê認識：
醫生kap看護婦nā久久，日繼日，tiám tī tháiko病院伺候，in chióchió對ánne來染著tháiko。畜生亦是m̄ bat染著tháiko。小腸熱、梅毒、淋病、肺痨kap岀phia̍h，lóng會khah gâu傳染；m̄ kú罕得tú著人真驚kap花柳病ê人食飯á是擋伊m̄ thang來醫院。

作者認為只要適當治療，tháiko病就會漸漸消失，社會無應該過頭著驚。伊亦講岀大眾對tháiko病ê態度：「自然應該著細膩chiah tio̍h，總是m̄ bián無知識無仁愛來驚到ngia̍uhngia̍uhchhoah。」講出當時社會因為對tháiko病情欠缺jīnbat，民眾亦無充足ê仁慈心，致使對tháiko患者產生嚴重ê排斥kap驚hiâⁿ ê情形。另外，作者用「ngia̍uhngia̍uhchhoah」chit ê詞來形容整個社會對tháikó病ê反應，亦是真活潑ê語言特色。

Ùi 教會報第305期到307期（1910年810月）連載ê＜寒熱論＞，是馬雅各醫生所寫ê報導。這三篇文章主要以醫學研究ê觀點探討「寒熱病」。起頭作者先引用世界各國ê例、醫學專家ê研究成果kap科學數據來說明「寒熱病是透過蚊仔咬著chiah引起ê」，所以蚊仔是傳染寒熱病ê主要媒介。Sòa落來，koh說明感染著寒熱病ê時，血管內部ê情形：

人ê血有「hoehchu(血珠）」亦有「hoehlûn（血輪）。血輪亦有兩款，就是白血輪kap紅血輪。若看tú著寒熱ê人ê血，著用hiánbîkiàⁿ來看，chiah會看著紅血輪有ê kap平常ê紅血輪tāmpo̍h cheng差，就是tī hit中間有一lia̍p一lia̍p îⁿ îⁿ，看了真gâu振動ê款，chiah ê就是寒熱ê毒珠。

馬醫生用真淺白、簡單ê語詞來論說醫學知識，對血液ê組成、顯微鏡ē kha所看著ê寒熱病細菌ê形狀，lóng有真清楚、詳細ê解說。後來koh講著「毒珠」tī人體內擴大、紅血輪ê「mo̍͘h（膜）」破去，毒珠進入血液，引發寒熱病ê過程。Chit篇文章ē sái講是一篇內容完整、醫學知識豐富，猶koh語言淺白、通俗ê醫學報導。另外，ùi文章中咱亦ē sái知iáⁿ，當時台語已經有「血珠」（hoehchu）kap「血輪」（hoehlûn)，亦tō是chitmá華語所講ê「血小版」kap「血球」ê講法ah。而且chit種透過外型來形容血ê組成ê醫學名詞，m̄ nā符合in實際ê形體，ē tàng真科學來傳達血液組成ê知識，mā因為是真常民化ê比喻，所以hō͘人ē thang真緊來理解。「血珠」、「血輪」kap「毒珠」chiahê出現tī文章中ê台語醫學用詞，現在lóng已經無真普遍teh使用。Ùi醫學台語ê角度來講，教會報lāité有關醫療衛生ê文章實在保留真chē珍貴ê醫學語料。

另外，＜老鼠病＞一文ùi「老鼠病」ê病情特徵、傳染管道kap預防方法來鋪陳，是一篇完整ê衛生教育性質ê文章。作者tī文章一開始tō切入主題：

Chit號病是chi̍t種幼幼ê物，（有人講「Sèlân蟲」，á是講「毒」），入人ê身軀，tòa tī血來生thòaⁿ。Chit號物ê身軀ni̍h有毒；chit號毒，會hō͘人ê臟腑出血，kap身軀發熱來致到死。病人ê糞、尿、痰，以及伊所用ê物，lóng有毒。

因為chit種病老鼠第一會傳染，其他親像蚊仔、胡繩、狗蟻亦有可能會傳染，透過咬人、帶毒hē tī人ê食物、或者是hē tī人身軀有破空ê所在，親像空嘴（khangchhùi）來傳染。所以預防ê方法著ài注意各種生活層面：

第一要緊著lia̍h老鼠，若lia̍h著老鼠，伊ê身軀所有ê kacháu m̄ thang hō͘伊走去，著用火kā伊燒去。（自然著代先kā伊拍死，然後thang用火燒）食物著sèjī，hē tī鍋爐ê物 m̄ thang lāmsám食。食物的確著過煮，若過煮滾是khah妥當，因為驚了胡繩，狗蟻，sìkè sô，hioh，會帶毒來kala̍uh tī hit項物。

作者真詳細紹介預防老鼠病ê方法、步驟。其中，文章括弧內底ê補充「自然著代先kā kacháu拍死，然後chiah thang用火燒」，m̄ nā表達對讀者ê提醒，mā形成閱讀ê趣味感。另外，「sô」、「hioh」等動詞ê使用亦適當表達出昆蟲ê習性，以及描繪岀in chhōe空chhōe縫tī人ê身邊，隨時傳染病毒ê可能性。

koh親像＜蚊子毒ê病＞kap<治防痨傷病ê法＞兩篇，lóng是短篇ê病症介紹報導，文章內先介紹病症ê症頭kap傳染性，後來說明chit款病ê防治方法，親像「mái hō͘蚊仔叮著」、「mái kap痨傷病ê人做夥khùn tī同一張眠床、掛同一張báng罩」，lông屬於簡單有力ê介紹性報導。

1918年9月ê＜胡繩會hō͘人死＞是一篇翻譯自中國上海衛生機構ê文章。Kúi篇文章ê中心是「胡繩」，論述胡繩ánchóaⁿ對人類產生危害，引起siáⁿmi̍h款ê傳染病，ài ánchóaⁿ預防。文章中對胡繩有真心適ê描寫：

胡繩日時á是暝時lóng teh爬，不時teh食，設使若有tam6po̍h物thang食，有一塊'á tiⁿ ê物 á是有一點'á湯伊就隨時食。Tī ginná ê頭殼有爛 á是pū膿ê khang伊不時teh注意。ginná beh去khùn ê時á是早起時khùn起來，伊不時teh chhōe機會thang來食。人teh beh食ê時，胡繩kúi家lóng無洗身軀來kap人食。Hit時咱若出手beh拍伊，胡繩代先看見就飛走，sòa放tāmpo̍h lâsâm ê物hō͘咱所bōe會看見。總是咱無注意ê時，伊koh爬來食。實在照ánne來看，伊ê ba̍kchiu真有路用。

作者「Tân Sùta̍t」tī chia用「擬人法」ê文學手路來形容胡繩若親像人kâng款，會「看」、會「注意」、會「chhōe機會」，koh會「kúi家無洗身軀來kap人食」，造成真心適ê文學效果。雖然是一篇翻譯ê文章，總是，作者對台語ê使用真liúliah，亦gâu掌握文學ê技巧，所以完全看bē出來翻譯ê痕跡。因為加添文學性kap趣味性ê關係，致使chit篇傳播衛生知識ê論說性文章，m̄ 是充滿死硬、tasò ê學術用語，顛倒hō͘讀者tī輕鬆ê文筆中來吸收著醫學、衛生知識，是真成功ê一篇文章。

綜合來講，chiahê有關衛生知識 ê文章，通常lóng先介紹「病情特徵」，sòa落來說明「傳染途徑」，最後以「預防方法」作為結論，達成衛生常識ê傳播kap預防教育ê效果。教會報t„刊載、報導文章ê過程中mä扮演著向教友／一般讀者傳達衛生知識ê重要角色。另外，值得注意ê是，chiahê以病症、衛生、預防為論說主體ê文章雖然lóng屬tī醫學性ê現代知識範圍，m̄ koh ùi內容當中亦ē tàng發覺著作者／主筆ê文學手路，像講：透過活跳ê台語用詞、淺白、簡單koh有力ê敘述特色，以及使用「擬人化」ê文學技巧來書寫。藉著台語白話字ëtàng淺白、直接書寫民間語言ê特色，作者kä文學性ê特質帶入來醫學、衛生知識ê傳播、教育，chhöa讀者進入科學性ê世界，hō͘信徒kap一般讀者ē tàng真容易來吸收chiahê具備文明特質ê現代醫療、衛生觀念。