《趁iau2日時》

 | | | 轉寄

「失明hō͘我ê挑戰」讀後感

作者 林俊育 2008.09.21

每到洛杉磯拜訪tī南灣台灣基督長老教會牧會ê陳宏文牧師，阮lóng歡喜談論教會kap盲人事工。今年元月三日koh再拜訪伊時，伊hō͘我一本「失明hō͘我ê挑戰」，講是伊教會ê邱嘉雄長老送伊ê；伊iáu講邱嘉雄長老mā真關心盲人事工，下次koh再到洛杉磯時，一定安排紹介阮熟識。

今年元月十二日特別koh再訪陳牧師，m̄ nā見了邱嘉雄長老，伊iáu chhōa我去拜訪該冊ê作者程文輝女士。程女士是邱長老牙科診所ê病人，程女士送伊一本「失明hō͘我ê挑戰」，伊讀後深受作者見證神ê大愛而感動，結果訂購三十本送hō͘會友kap朋友共享。

目前程女士kap伊ê大恩人mā是終身保姆列和女士﹝作者稱伊「和姐」﹞同tòa tī洛杉磯ê一棟公寓，二人相依為命。一個多鐘頭ê晤談，伊那充滿神ê大愛kap感恩ê生命力，敦促我趕快kā chit本見證神無條件大愛ê好冊紹介hō͘台灣ê讀者。程女士kā我講伊原先是用英文寫ê“ONE OF THE LUCKY ONES”，一九八○年tī香港出版，粵語中文譯本冊名改為「失明hō͘我ê挑戰」，tī一九八九年tī香港出版，為避免有kóa人ê誤會而稍作修改。所以伊建議我直接tùi英文版譯成中文版。

從事盲人事工五年gōa來，kap視障人常有接觸，對in mā jōachē有所瞭解，我盡力kā我所知影ê視障人kā周圍ê朋友講，但範圍推展真慢，最近我當teh計畫編寫台灣一kóa視障人ê心路歷程kap奮鬥史，希望透過chit本冊ê出版，ē tàng hō͘社會大眾瞭解視障人kap明眼人除了視力差異之外，其他完全仝款。In用手觸摸kap心靈ê目睭來看，有真chē地方「看」得比明眼人kohkhah清楚，咱tio̍h瞭解in，進一步koh接納in，kohkhah beh為in創造一個公平ê生活、教育kap就業ê大環境。程女士ê真實經歷，thang作為台灣盲人事工ê一面鏡子。我聽tio̍h有關台灣盲朋友ê身世見證，真chē kap程女士ê殊無二致。人類「歧視弱勢團体」ê共同弱點，處處可見，失明人tio̍h效法程女士，kā親身ê遭遇kap感受寫出來，hō͘明眼人有所了解而ē tàng接納in。

讀完「失明hō͘我ê挑戰」，koh再讀“ONE OF THE LUCKY ONES”，我感受良深，作者程文輝女士將伊個人ê真實經歷，以平易生動而感動人ê文字，hō͘讀者体會出一個失明ê查某gín'á，tī當時中國社會kap家庭對失明人有偏見kap嚴重歧視ê惡劣環境下，伊懷tio̍h虔誠ê基督教信仰，m̄ nā勇敢而有智慧地接受失明生活ê挑戰，伊kohkhah深切地体會到失明人當時所面臨ê厄運，tùi ánne努力克服萬難去求學，並立志奉獻家己為香港視障人福利工作，直到一九八九年tùi香港政府社會福利署退休為止。程女士描寫每位幫助伊kap鼓勵伊ê人，lóng是神彰顯大愛而遣送來hō͘伊ê，而伊tī感恩之外mā信守對神ê承諾，忍痛別離家人kap伊siōng親愛ê「和姐」，一個人離鄉背井到美國波士頓ê“PERKINS INSTITUTION FOR THE BLIND”﹝Che是海倫凱勒ê母校，一九五五年起改名為“PERKINS SCHOOL FOR THE BLIND”﹞就讀二年，了後koh再到德州窩斯堡ê浸信會短期專修班攻讀教會音樂二年半。

學成後，真chē親朋好友lóng勸伊留tī美國thang過khah好ê日子。但是伊忘不了幼年tī廣州市所見所聞有關失明人ê悲慘運命，尤其有位街頭賣唱行乞ê失明小女乞丐bat對伊講：「你tio̍h努力學習，有可能有一工你ē tàng教阮/咱失明人用手去讀冊bat字，阮就m̄免tī街上賣唱行乞，甚至hō͘人輕蔑地稱做『盲妹』了。」伊答應講會盡力而為，了後伊常祈求天父賜伊求學ê機會，伊並對天父認真地承諾：願意kā所學ê kap失明ê眾Gín'á分享。經過真長時間痛苦ê掙扎kap祈禱，伊順服神ê帶領，tī一九五九年二月tńg來到香港從事盲人福利事工。

一九四五年，第二pái世界大戰後ê廣州kap台灣有淡薄á類似，同是深受儒家kap佛教影響ê封建而迷信ê社會，失明孩童ê父母得bē tio̍h幫助或同情，為tio̍h避免親友ê嘲諷kap追問，往往kā失明ê子女藏匿起來，不hō͘ in外出或受教育，tùi ánne bōesái獨立謀生，變成家人ê重擔。有kóa失明ê孩童被出賣為奴，甚者kohkhah淪為乞丐或娼妓，過tio̍h暗無天日ê生活。迷信tú tio̍h失明人ê手杖會有三年ê厄運，hō͘真chē人m̄敢接近或幫助失明人，因此in tī社會中ê地位無法度得tio̍h改善。程女士ê英文原作冊名譯成中文便是「好字運中ê一位」，伊ê父母雖經祖母ê要求，iáu是無kā伊賣出去。伊siōng感恩ê是認bat真正愛世人ê神，引領伊克服一切難關，行過坎坷ê人生旅途，就會領受神ê喜樂。

當時廣州kap台灣ê盲人福利事工機構，仝款lóng是外來基督教傳教士開設ê，廣州有「慕光院」kap「明心盲人學校」，台灣有「新莊盲人重建院」kap「台中惠明盲校」。Che是因為新約聖經約翰福音第九章闡明：「瞎眼m̄是伊本人或伊ê父母有罪，卻是神ài tī伊ê身上彰顯神ê大能力。」程女士kohkhah時時刻刻向伊ê失明朋友傳揚「神愛世人，包括失明ê人」ê福音，真chē人受tio̍h鼓舞而建立一個積極上進ê人生觀。

台灣比廣州kohkhah好字運，虔誠ê基督徒陳五福醫師受史懷哲博士「尊重生命」ê感召，以家己眼科病院ê收入，tī一九五九年tī宜蘭縣羅東鎮開設「慕光盲人習藝所」，一九七四年擴大而改名為「慕光盲人重建中心」，盲生接受二年免費ê教育kap按摩職業訓練，到taⁿ有三百gōa位畢業生從事按摩工作，獨立謀生而且成家立業，進一步koh回饋社會，如雙連教會西羅亞合唱團ê男團員lóng是「慕光中心」ê畢業生。台灣mā因日據時代重視並保障盲人ê按摩工作，hō͘失明人有好ê就業空間。國民政府遷台後，法律明訂：「非視覺障礙者bē tàng從事按摩工作」，但政府執法不嚴，明眼按摩尤其是色情按摩已嚴重為害威脅tio̍h失明人ê職業生機，實在hō͘人扼腕歎息。希望「失明hō͘我ê挑戰」一書ē tàng激勵國人正視失明人ê就業問題，為失明人開創kohkhah大ê就業空間。

程女士敘述伊受tio̍h歧視kap不公平待遇時，lóng用高度包容ê情操，以輕鬆而幽默ê筆法來表現。明眼人讀了bē惱羞成怒，而會因了解包容，進一步koh改變對失明人ê態度。失明人透過點字書籍或有聲卡帶讀了，會得tio̍h極大ê安慰kap激勵，tùi'ánne邁向kohkhah積極、kohkhah光明ê人生。願神賜我夠額ê智慧kap力量，來完成chit份我生來第一pái ê翻譯工作，將一切榮耀歸hō͘神。

﹝台灣教會公報 2201 期1994.5.8﹞