《趁iau2日時》

 | | | 轉寄

「生命tī我手指尖」譯序

作者 林俊育 2008.09.28

中華民國視覺障礙人福利協會ê吳敏惠執行冊秘書籌畫開設視障寫作班時，伊ài我tī美國chhōe些盲人作家ê作品，紹介hō͘國內kah意寫作ê視障朋友。我到波士頓ê佳樂盲人重建中心圖書館chhōe tio̍h六本，其中羅勃‧史密斯達司﹝ROBERT J. SMITHDAS﹞所撰寫ê自傳式作品〈LIFE AT MY FINGERTIPS〉是一本siōng具勵志性ê好冊，我就先將「生命tī我手指尖」譯成中文，kap國內讀者分享羅勃靠神ê宏恩去克服並跨越盲聾啞ê多重身軀障礙，靠手指尖來觸摸神所創造ê浩瀚世界，靈命會得thang昇華而締造卓越ê成就，來榮耀神ê大能。

羅勃五歲時因龍骨腦膜炎而致使盲聾啞，但受tio̍h比伊早五十年ê海倫凱勒ê傑出成就所鼓舞，伊進波金斯盲校，老師們幫忙伊證明伊ē tàng超越伊ê身軀ê殘障。結果，伊成做第二個完成大學教育ê盲聾啞人。讀聖若望大學時，伊面對比其他明眼學生kohkhah chē ê困難，但tī神ê美妙帶領下，伊最後以優異ê成績畢業。了後，伊koh取得紐約大學ê碩士學位。

羅勃完成學業後，應邀到各所在演講見證神ê大能，siōng chē ê時chūn一年gōa達二百五十三場，場場得tio̍h熱烈ê掌聲，當然mā鼓舞真chē人力爭上游，kohkhah hō͘明眼人ē tàng了解殘障人士ê潛能，只要提供公平ê環境，in lóng ē tàng成做社會ê生產力，而m̄是無用ê依賴者。

羅勃mā結婚成家，tī家己ê厝中招待親友，過tio̍h充實而有趣味ê生活。目前擔任美國海倫凱勒中心﹝HELEN KELLER NATIONAL CENTER﹞ê執行長，從事盲聾啞多重障礙ê教育kap重建，享譽美國kap全世界。

羅勃是一個詩人，伊ê詩集〈心城〉﹝CITY OF THE HEART﹞kap〈美ê分享〉(SHARED BEAUTY)陳列tī波金斯盲校ê社工研究圖書館﹝明眼字﹞ê櫥窗，可見波金斯盲校確實真以chit位傑出ê校友為榮，我希望ē tàng早日譯成中文，hō͘國內ê視障朋友kap明眼人lóng ē tàng分享到chiahê發自心靈ê作品。

一九九一年起，我每年暑假lóng參加美國盲人事工考察，行程包括美國海倫凱勒中心。舊年始知羅勃是一位傑出ê基督徒作家，伊ê作品充滿tio̍h對神ê oló。我趁訪問該中心之便，問伊是m̄是thang將伊ê冊譯成中文tī台灣出版，伊講m̄ nā ē tàng，而且歡迎，kohkhah無用付著作權費，伊一屑á to無遲疑地馬上kā伊ê親筆授權冊hō͘我。我講中譯本出版時，會邀請伊來台灣現身見證，伊講真歡喜ē tàng到台灣一遊。

感謝神ê恩典，我已tī百忙中抽空完成chit本譯作，希望ē tàng早日kap讀者見面。羅勃來台kap國人見面ê日子mā指日可待了，想必伊ê見證一定ē tàng hō͘國人對視聽障者ê態度有所改變，進一步koh對陳博文牧師一再強調ê殘障福音kā伊重視並實踐出來。

台灣工商發達了後，物質慾望造成驚人ê心靈殘障，比身軀ê殘障kohkhah可悲，人人心中築起高高ê牆，對牆外ê弱勢團體視若無睹，希望chit本譯作加上基督教ê福音ē tàng hō͘每一個人ê心坎高牆倒落來，phah開心內ê門窗，共同將台灣創造成做神所喜愛ê國度，che是我翻譯chit本冊ê siōng大目的，願神親自帶領以上計畫ê完成。

承蒙中華民國殘障人協會首任理事長陳博文牧師tī病床上為tio̍h這書寫序，曹永洋老師ê指導kap王志弘先生kap許翠華小姐ê認真校稿，tī 此一併致謝。