《聖經故事三字詩》

 | | | 轉寄

19. Lêngkó (2) .... 靈果 (二)

作者 Tân Chhengchùn 2009.06.28

Un chû pi, chiong sim pí,
恩慈悲，將心比，
Lô͘úi chi̍h, bô tûkhì,
蘆葦折，無除去，
Sió héchi̍h, iú kngkhì,
小火舌，有光氣，
Sòe hoahí, tōa boánì.
細歡喜，大滿意。

Siānliông siān, ná sînsian,
善良善，若神仙，
Chun ló sian, hūiù liân,
尊老先，婦幼連，
Ji̍p sèngtiān, sim hōnghiàn,
入聖殿，心奉獻，
Chhùiphé siàn, bīn bô piàn,
嘴[面比]搧，面無變，

Tiongsìn si̍t, sìniōng it,
忠信實，信用一，
Nā kóng chi̍t, chiūsī chi̍t,
若講一，就是一，
M̄ sī chhit, bián ēng pit,
不是七，免用筆，
Kiâⁿ chèngti̍t, kiat hó si̍t.
行正直，結好實。

Lūn unjiû, bû só͘kiû,
論溫柔，無所求，
Tùi lóiù, ōe chunsiú,
對老幼，話遵守，
Khekkhui siū, unloán siū,
克虧受，溫暖巢，
Chú póiū, siōng chūiû.
主保佑，上自由。

Tio̍h chúnchat, chehchèla̍t,
著撙節，節制力，
Sim bô kat, chūjiân ta̍t,
心無結，自然達，
Bô kháukak, bô khiohkak,
無口角，無拾覺*，
Khòaⁿ khangkhak, si̍t cha̍tpak.
看空殼，實實腹。


Jînài it, sim sêngsi̍t,
仁愛一，心誠實，
Hoaⁿhí jī, kiâⁿ konggī,
歡喜二，行公義，
Hôpêng saⁿ, thiⁿsài saⁿ,
和平三，天使裳，
Thunlún sì, piān huisī.
吞忍四，辨非是。
Chûpi gō͘, si sià hō͘,
慈悲五，施捨雨，
Siānliông la̍k, phiàn sìkak,
善良六，遍四角，
Tiongsìn chhit, chêngāu it,
忠信七，前後一，
Unjiû poeh, gâu káisoeh,
溫柔八，gâu解說，
ChúnChat káu, hó chhùitáu,
撙節九，好嘴斗**，
Kúi chióng chí, sio̍ktī lí?
幾種子，屬於你？

* khiohkak, bōehiáu siōngchìn, 未曉上進; ** ūikáu, 胃口