《《陳夫人》日譯台e5台灣小說 第一部》 |
 |
 |
|
 轉寄 |
《陳夫人》第一部 第八章（更新版）
作者 庄司總一 著 楊東傑 指導 林俊育 台譯 2017.05.07
清文ê決意真堅定，安子雖然有kā伊苦勸，m̄ koh lóng無法度改變伊ê決定。安子期待chit件事對in翁來講是好ê試煉，以後tùi新生活出發，ǹg望對in翁本身á是對in兩人會成做thang歡喜ê tāichì。
退出官界無gōa久，清文就受聘去長老教ê中學教冊；he是長老教會經營ê學校，學生差不多全部 lóng是台灣人。起初清文頭殼內對學校ê教師有輕視感，認為 in 是無法度駛向人生大海ê細隻koh無力ê小船，或者是一旦出帆就會去tú tio̍h悽慘海難ê hit種人。事實上，hit當時景氣好kah會驚人，tùi遠遠來到殖民地ê教員中，mā有teh混日子ê流浪者。M̄ koh，清文實際做老師了後，chiah發見教育事業並m̄是伊所想ê hiahni̍h無價值koh無效果ê事業。因為是伊m̄免靠做老師來維持生活，而且hit間學校ê前身是伊細漢ê時所讀ê學堂，也to̍h是伊ê教育搖籃ê關係，所以hō͘ 伊ē tàng有親密感來教育學生。尤其這是宗教教育ê學園，環境自然清純，氣氛mā真好，所以伊對教員ê看法就有所改變。
辭掉官廳ê頭路，逃出濁流，開始ē tàng靜思家己自由學習ê身份，清文顛倒有機會放落重擔，感覺真輕鬆。Hit時，伊常常tī食暗頓chìn前，陪安子出去散步，tiāⁿtiāⁿ行向南pêng ê郊外去。Hit tah是台灣人ê墓地，in並m̄是beh去pōe墓，是因為tī hia ē tàng靜思，thang好來敬虔祈禱。
起起落落ê曠野，一面是重重疊疊ê墓蓋(khàm) leh，hiah ê墓是叫做風水ê馬蹄形ná親像扁扁ê土饅頭ê墓。Hitê phòngnaih無平ê土崙á對面有一段 koân起來ê所在，hit tah是無墓地ê草埔，看起來有各各他ê頭殼碗(譯註：耶穌受釘十字架ê所在)ê款式，所以清文in兩人kā它號做「各各他之丘」。Khiā tī hitê土崙á ê頂koân，tùi市區參雜ê厝頂看過去，ē tàng仿彿看tio̍h台灣中央山脈tī雲中連綿不斷，mā ē tàng眺望tī hia附近ê城牆殘骸。Hitê kā古早ê市街圍起來ê彎彎oatoat城牆，mā hō͘ 文明ê潮流衝擊崩壞去。兩百年前kahná夢teh過去ê清朝遺跡，chitmá kantaⁿ一部分留落來；石灰泥kah石頭已經崩落，露出紅土，雜草茂盛。Hitê留落來ê城牆一頭，有一個叫做「大南門」ê城門；順hit棟城門ê雙重厝頂，青苔四界生湠，Chit種古城ê雅氣會引出人ê藝術感，所以時常有人tī hia chhāi起畫布動起畫筆。土崙á ê草埔頂面，有chiâⁿ十個thǹg赤腳ê台灣gín'á，in發出可愛ê kiki叫聲，悠哉悠哉lóng無驚惶ê款式，tī hia teh牽牛食草。黃牛kah水牛ê kha脊phiaⁿ頂，有台灣鳥kahná khiā tī島嶼ê石頭頂面，一屑á都m̄驚，牛mā歡喜kā kha脊phiaⁿ借in khiā。日頭一下落山，雀鳥á kah白頭殼á雖罔無風，m̄ koh kahná是hō͘ 強烈ê風吹tio̍h，快速飛向樹林內入去。有時chūn，chit隻黃鷹受tio̍h beh沉落西山ê日頭照tio̍h，展開牠金色ê翼，飛過天空。空氣不時lóng真ta燥，tī街路引起engia ê季節風，tī野外也輕鬆吹過野草kah灌木。熱天，常常beh有雷公雨ê款式，碧藍ê天空無tiuⁿtî to̍h出現滿天一大堆厚厚ê積亂雲(譯註：十種雲形之一)，chit時ê日落天色hō͘ 欣賞ê人kahná心內mā染tio̍h玫瑰紅，心情變kah koh khah súi。
Peh起lih chitê土崙á ê沿路，清明節ê時chūn，會tú tio̍h帶香、銀紙、祭物來pōe墓á是拾(khioh)骨ê人，mā會tiāⁿtiāⁿ聽tio̍h父母過往ê少女á是死翁ê寡婦teh哀哭ê聲。
有一工，清文夫婦kah一個pōe墓了beh tńg去ê老chabó͘人相閃身。當in已經行到距離約五十公尺ê時，清文kahná想tio̍h啥物tāichì，對安子講：「小等leh！」就趕緊se̍h翻頭去jiok hitê chabó͘人。
「果然認m̄ tio̍h人ā。」清文隨時翻頭tńg來，感覺小khóa pháiⁿ勢講：
「想講她一定是老母，結果m̄是；實在有夠像(sêng) lah！」
「Aiah！Ánne真無chhái。」
安子oa̍t頭來看，看向hitê漸漸消失tī林投樹林中ê老人ê背影，心內感覺tio̍h清文發現她m̄是親生老母ê懷念心情kah in翁知影hitê人m̄是親生老母ê遺憾。清文面露苦笑，m̄ koh mā m̄是hiahni̍h灰心喪志。總是，chitmá認m̄ tio̍h人，雄雄狂狂jiok去，可見tī伊心內，生母ê形影顯然iáu未消失。
「你對老母ê tāichì iáu無bē記得neh？」
「實在是bē記得ê款，soah去認 m̄ tio̍h人。」
「無lah！M̄是面形ê記憶問題....。」
「確實是無bē記得；面形iáu小khóa會記得，m̄ koh，細漢時ê記憶khah無hiah穩當，而且阮父母離婚後，我kah她kantaⁿ見面一二pái niāniā。M̄ koh，因為是老父出手beh娶她，所以應該m̄是眾人所講ê hiahni̍h無好ê chabó͘人。」
清文m̄驚；以前連對in bó͘ 都隱瞞m̄肯講ê tāichì，chitmá hiahni̍h坦白ánne講，真是小khóa不可思議。這kahná是看bē起chitmá chitê無正義ê老母，á是以前隱瞞家己ê見笑事(tāi)，chitmá感覺顛倒應該tio̍h講出來；總講一句，是出tī無虛偽ê懷念所自然講出來ê話。Tùi伊ê目色ē tàng看出來，m̄ nā是chit件tāichì niāniā，最近清文對安子無拘束ê坦白態度，安子感覺真歡喜。
「Tùi瑞文聽tio̍h你ê運命了後，我對老母ê tāichì常常掛tī心肝頭，真可憐neh！Chitmá m̄知beh án怎chiah好？Kám講無論án怎，lóng chhōe無方法thang見面？」
「可能是ánne。聽講hit當時她tńg去tòa tī嘉義附近田庄ê外家厝，m̄ koh，以後去tó位to̍h lóng無消息。Tāichì已經過了二十gōa年，mā有可能她已經往生à。橫直chitmá koh再見面，mā無啥物路用ê款。」
「Bē ánne lah！若是神賜大恩，一定會引chhōa她來kah你來會合。我mā感覺你真可憐，我一直認為你是手不動三寶（嬌生慣養）大漢ê chapo͘ gín'á，m̄ koh，其實你有想bē到ê苦楚neh。」
「Mā無講有啥物苦楚lah！Tùi家己ê出世來講，應該是siuⁿ過受恩賜。若是hit當時母kiáⁿ lóng hō͘ 人趕出去，咱兩人to̍h無法度有chitmá ê結果；現此時可能是tī tó一位lâsâm ê田庄，做一個下賤ê苦工á是作穡人。Tùi chit點來講，我一直非常感謝老父阿山。」
「話雖然是ánne講，你bē記得koh看bē起抹大拉ê馬利亞(譯註：四福音書跟tòe耶穌ê女人) ê tāichì，he可能m̄是利己主義。」
「M̄是看bē起lah！M̄ koh，假使講我現實ê親生老母是下賤ê，她ê血若tī我ê血中淨化，變成靈性上偉大ê母性。所以，阮寧可mài見面khah好。」
對chit種運命ê人常常有一句話ánne講：M̄認輸就看破。，kám m̄是？Kám是伊ê心本來to̍h看bē起koh恨in老母，chiah驚去見面，á是伊無teh關心？不管是tó一種情形，chitmá tùi伊認m̄ tio̍h人ê事來看，安子並無ǹg望聽伊坦白講：「無論如何，想beh見面to̍h是lah。」雖然是ánne講，對記憶中無清楚ê老母hiahni̍h真實teh愛慕，安子無ǹg望清文有浪漫主義ê感傷；想tio̍h三年做官的生涯中，清文hō͘ 世俗、乖癖、受氣、懊惱khîⁿtiâu ê靈魂中，安子ài伊ē tàng洗清hiahê lâsâm，回復單純ê精神。
「咱ánne ê祈禱，kám無sêng Milé (譯註：Millet，法國畫家，華語譯做「米勒」)所畫『晚鐘』內面ê夫婦？咱雖然m̄是作穡人，mā會體會作穡人ê心，無體會mā bē soah得lah。」
Peh上土崙á，安子ê面hō͘ 日落ê天色染kah變玫瑰色，安子小khóa默禱了後ánne講。清文輕輕á微笑，恬恬無應話。安子感覺伊無掛慮任何項事，thang講伊是恬靜溫和ê翁婿。「不管是掖種ê女人á是切割石頭ê人，Milé chitê畫家tī平凡ê生活中，確認真實ê súi kah價值，其中mā有耶穌ê精神。你認為ánne ê想法是弱者ê哲學，m̄ koh，人類ê本質是軟弱ê，所以人類ê堅強有一定ê限度。你是一個真好ê人物，精神mā真旺盛，當然mā有野心。你想beh做官，你講這是你ê大失敗；總是，失敗m̄是做官hit件tāichì，我想是你本身ê問題。為tio̍h beh加強提高家己ê事，所以去要求社會，he是無chhái工ê lah！Ná親像寄生á ê殼是借來ê，容易剝離、毀壞，而且內面是hiahni̍h'á軟弱。你雖然ē tàng做官，若記tiâu耶穌所講ê：想beh做頭ê tio̍h做人ê路尾；ánne，我想你to̍h m̄免艱苦kah hiah悽慘落魄。無lah！你iáu是辭掉khah好，我實在mā 無真ài你做威嚴ê官員。」
安子第一pái ánne對in翁講kah hiah坦白，而且無客氣用說教ê口氣teh kā in翁khau洗。兩人融入tī chitê土崙á ê美麗大自然，沉浸tī心胸開闊ê敬虔氣氛中。清文kahná尾hō͘ 人踏 leh，咬人bē tio̍h人ê獅á hiahni̍h溫和，實在是不可思議。伊kahná悔恨家己ê過去，àⁿ耳孔聽in bó͘句句lóng有道理koh充滿真情ê話，後來ná親像恬恬á phah開心門ê款開嘴講：
「確實....，我確實真驕傲自大，lóng無顧慮家己ê下腳手，kantaⁿ想beh peh上天，chiah會失敗kah siak落來。佳哉我iáu未peh到siuⁿ koân ê所在，所以結果無受tio̍h真大ê傷害。雖然我m̄是戇kah lóng無注意tio̍h你túchiah所講hiahê tāichì，只是我無法度控制流tī我身軀中ê血；我繼承支那南部人ê血，個性好強，koh有物慾ê野心。若是tī別ê環境中，譬喻講我若生做支那人，我ê個性可能會koh khah激烈，mā有可能會變成權謀弄術ê人。」
「M̄ koh，你chitmá ，kám m̄是日本人ā？你比普通ê日本人有koh khah koân ê教養kah真深ê學問，是一個堂堂ê日本人。」
「是lah！我感覺號日本人ê名是光榮ê tāichì，m̄ bat後悔過；若無ánne，我ná會有法度kah你做伙，而且chitmá tī chia mā iáu ē tàng做伙。我所講ê血m̄是指民族上ê偏見hit種感情上ê tāichì，請你mài誤解；he kantaⁿ是個性ê問題，致使我tī辦公室hō͘ 人抵制；我無想講he是hō͘ 人歧視，mā bē ánne想；我想he是家己態度ê錯誤，bē sái埋怨tit。Oeh，安子，當初你來到陳家ê時，對陳家ê風俗改良kah提升生活水準ê做法，有保守思想ê你kah有進步思想ê我，意見上有差別，而且無管你tī邊á不安kah流chhìn汗，我猶原照我家己ê意思去做。厝裡ê人目頭結結對我起反感，kah我作對，我卻傲氣十足，phah胸坎á對你講：『若採用溫柔、phô͘tháⁿ ê方法，對方反tńg會展威起來。威嚴ê高姿態....。』我對家族高壓ê權勢主義，chitmá想起來，已經降臨tī我家己ê身上。這是神對我ê警戒教示，我lóng bē責備埋怨啥人。M̄ koh，我最近漸漸心平氣和起來，尤其是kah你做伙來chia散步，心情有不可思議ê平和氣氛。」
清文khiā起來，伸腰hahhì一聲，kā黃昏ê空氣深深吸入去。伊忽然想起前幾工tī學校教學生ê hit首 Uiliamsuh Osuohsuh (譯註：Williams Wordsworth，英國詩人，17701850) 所作ê詩—《美麗ê黃昏》，就輕聲唸出chit首詩ê第一chōa kah最後一chōa:
美麗ê黃昏，心靜自由自在； 神常常kah你同在，咱雖然m̄知。
安子聽了in翁坦白ê懺悔kah靜靜自我反省ê話，真受感動，khiā起來óa靠tī in翁ê身上，請伊koh kā hit首詩唱一遍。她kā清文ûnûn'á發音ê詩句當做音樂來聽，忽然感覺想beh kā伊lám ânân ê愛心，充滿她ê胸坎，目屎soah teh beh流落來。清文真艱苦心；chit chūn伊ê心內iáu bē tàng穩定，bē tàng自由，伊無想講當真ê告白中mā會有隱藏虛假。
伊chhōe求心靈ê安歇是事實，m̄ koh，伊無真正得tio̍h in bó͘所想ê安歇。Tī hitê「各各他之丘」光輝ê黃昏，伊ê靈魂鎮靜落來，變成謙卑敬虔ê人，ē tàng kah古早人仝款相信創世記kah基督ê記戴。總是，若koh再落去世俗ê街路，hō͘ 家族制度ê牆包圍起來，一踏入冊房，hitê信仰就koh崩盤去。閱讀《向權力ê意志》等ê冊，hō͘ 「Tio̍h強起來！Tio̍h強起來！」ê hoah聲驚kah起煩惱。我tio̍h kā力量kah才能用tī啥物所在chiah好neh？一生做一個神學校ê教師，我kám會滿足？是m̄是應該滿足？若是持看破ê態度，可能無gōa久就會養成惰性，真容易就ē tàng習慣過安隱ê生活。Ánne講起來，我kám hiah簡單to̍h會屈服？我無ài平和、安靜koh穩定，顛倒對人生有激烈奮鬥ê性格，我若kā它硬at彎曲來減弱它ê力量，ánne kám chiah真正是美好ê生活方式？
「弱肉強食，適者生存」是科學講法ê戰爭kah革命，chitê科學ê神話帶hō͘ 人類殘酷ê屠殺。M̄ koh，耶穌ê神話kám無仝款teh殺害人類？為tio̍h想beh淨化靈魂，soah kā靈魂變弱，無kā理想hō͘ 人類soah hō͘ 人類產生幻覺。
總講一句，清文並無in bó͘所想ê，心情hiahni̍h安定落來。伊ê夢真簡單就破碎loh；伊ê發展被阻止ê憤怒kah失意，kahná用嗎啡止胃痛仝款，kantaⁿ暫時用宗教ê熱情來掩蓋leh。
Tī chitê時chūn，厝裡發生真費氣ê問題；財產繼承ê tāichì重新koh再提起，漸漸具體化起來。清文退出官界ê現此時，本來無必要硬進行ê tāichì，事實上，已經bē記得了了à，因為當時是家己講起ê，所以chitmá soah bē救tit。
陳家全部家族ê人tiāⁿtiāⁿ聚集tī大廳，一再協議。習慣上是所有ê繼承人平均分配財產，雖然有平等分配ê原則，m̄ koh，實際上是無可能ē tàng正確公平分配，所以各人意見無仝，iáu是會發生糾紛。事實是小弟景文所分配ê ná像比阿兄超過無應該ê chē，所以清文無歡喜。He m̄是份額chē少ê問題，是因為大家對小弟偏心ê態度siuⁿ過明顯。話雖然是ánne講，因為對清文來講，hit ê金額mā m̄是大kah無重視bē sái得ê程度，目chiu放 khehkheh，khah大方leh就無tāichì à。總是，清文ê忍耐無夠，就提出異議，soah無意中tio̍h堅持家己ê主張。Tāichì就ánne tùi金錢問題變成感情問題。起初大家iáu對伊ê異議輕輕來接受，á是siōngchē kā伊khau洗ê程度。M̄ koh，清文頭尾lóng無beh讓步，所以soah尾大家團結，ǹg伊表示露骨ê挑戰態度。
「各位，我再三提起，我反對大家ê意見，決斷m̄是出tī貪婪ê心，請大家了解。無m̄ tio̍h，小弟景文確實勤勉工作，hō͘ 陳家繁榮，增加家產，我mā十分承認伊有功勞tī.leh，咱全家tio̍h kā伊感謝。M̄ koh，tùi另外一方面來講，這若是無陳家ê背景kah資產，mā是無法度有chitmá ê家產。本來咱習慣『九世同堂』ê方式，無論經過幾代lóng無beh分厝，誇耀咱是大家族主義。總講一句，家產m̄是特定ê某一人專有，我想應該是附屬tī chitê家族ê物件....。」
清文無用hō͘ 人khah好瞭解ê講法，顛倒用硬beh說服人，koh小khóa有恐嚇意味ê演說口氣。早前若用chit種手段，可能有相當威嚇（hek）效果。M̄ koh，chitmá jú ánne做，大家jú無beh聽，只是jú增加輕視kah反彈而已。大家並無乖乖忍受，顛倒私下chhichhi chhu̍hchhu̍h，無teh聽伊講話；有人嘴舌taktak叫，mā有人公然挑戰。清文四界，看看無一個贊同伊ê講法，ē sái講是「四面楚歌」ê狀態。伊chitmá chiah知影大家對伊相當尊敬ê想法是大錯誤ê，in只是對伊ê官服ê敬畏kah驚惶niāniā；伊chit時chiah慘痛覺醒。伊想beh徵求同意kah支援ê老父阿山，mā是表情無好，用責備ê口氣講：
「Oeh！清文，你小khóa khah撙節(chúnchat)leh！Mài講kah一大堆道理來反對。這已經有經過眾親族ê充分協議，mā是眾人目chiu 金金teh看所決議ê，絕對bē有無公平ê tāichì，kám m̄是？」
老父阿山對chitê kiáⁿ hiahni̍h認真teh反對，真bē tàng了解，mā感覺非常苦惱。準講伊對in kiáⁿ ê心理 ē tàng了解，伊mā bē硬beh khiā出來為伊辯護。Chit項tāichì ê決定並m̄是多數決，是照慣例尊重長輩ê意見，所以若阿山有一點 á熱心，發言表示權威，清文ê主張mā m̄是講bē通過。M̄ koh，阿山ê個性是一個無 ài爭執koh嫌麻煩ê人，一屑 á 都無beh發號令。
清文ê目chiu向邊á ê景文lió一下。伊是敵對ê當事人，卻無因為多數贊同伊ê意見表示得意，mā 無露出一屑 á興奮ê款式，真是不可思議。Hit種一屑á在意都無ê款式，hō͘ 清文想beh kah伊講話都感覺真倦(siān)，所以就oa̍t過去看三男瑞文，m̄ koh mā無得tio̍h伊ê支持。雖然幾nā pái ê協議，瑞文lóng有參加，m̄ koh，chitmá卻kahná啞口bē講話。瑞文可能感覺無論家己án怎主張、要求，大局lóng bē有改變，該得ê當然lóng得會tio̍h，所以看起來真冷靜ê款式；mā有可能伊想講無小心加講話，家己應得ê份額會hō͘ 人減少去，所以謹慎張持(tiuⁿtî)，無發言。
清文koh再對大家發言，m̄ koh，聲勢kah面色lóng已經顯出khah輸ê勢面。
「顯然大家對我有誤解tī.leh，我絕對m̄是自私自利teh講話，只是想講我是長男ê關係，為tio̍h家族ê興起，tio̍h照顧 chitê大家族。景文家己積聚ê財產當然tio̍h歸伊所得，m̄ koh為 tio̍h chitê家庭工作，來ho͘伊二十甲ê不動產，我認為有khah過份一點á....。」
講到chia，厝裡ê一位阿叔khiā起來，身軀àⁿ過桌á，揮手極力反駁清文講：
「Oeh！清文，chitmá mài koh講 hiahê哭iau ê tāichì lah！你講景文ê功勞額siuⁿ過份？你kám有啥物義理thang講？Kah伊比起來，你到底為家庭盡過啥物氣力？你去日本內地留學，中學到大學十年中間開掉gōa chē錢？而且娶一個日本bó͘ tńg來，起新厝、食美食、穿好衫，奢華浪費，你kám無想tio̍h chiahê tāichì？」
「阿叔ê話有khah超過，我並無感覺有hiahni̍h奢華。」
清文ánne應話了後，四界就發出「mài講白賊」、「mài烏白講」等等ê反駁kah罵聲；清文若針對chiahê話辯解，大家to̍h koh khah喧嚷起來；照ánne落去，會變成bē tàng收soah。
「大家靜落來！大家靜落來！」
坐tī主席位，名叫林明哲ê老人用sau聲來壓制大家。伊掛一副龜殼框ê老花目鏡，留白山羊á 鬚，身材kahná鶴hiahni̍h瘦抽，財大koh有學識教養koân ê氣質。Tī分財產等ê場合，lóng會tùi家族親戚外面請一位chit款德高望眾ê人，拜託伊來判斷tāichì ê是非曲直chiah做決議；總講一句，to̍h是扮演kahná議長ê角色。
等候大家安靜落來，林先生就慢慢á開嘴講話。伊ê聲帶kahná生青苔，發出低低koh粗粗ê sau聲，koh齒縫(phāng)真chē，會漏風，致使發音mā無真清楚，hō͘ 人感覺kahná嚨喉生sian hiahni̍h oh得聽。
「清文大兄，你所講ê mā有一kóa道理tī.leh，我mā bē tàng無kā你承認。M̄ koh，繼承者m̄是kantaⁿ你kah景文niāniā，lóng總有十一房hiahni̍h chē。我若接納你ê要求，其他ê人mā是會講話，我mā bē sái無聽in ê話。Ánne tāichì m̄知 tio̍h到tang時chiah會有結論。當然koh無gōa久，你就ē tàng成做家長，原來ê陳家tùi chitmá開始就變小，chit項事mā m̄是值得慶賀ê kám是？我有了解你ê感受，m̄ koh，ánne ê家庭分裂，本厝就會縮小，這是當然ê tāichì，mā是真不得已ê，我有聽講這是lín兄弟所希望chiah來決定ê。第一來講，阿山老先生 iáu真勇健，何必tio̍h hiahni̍h麻煩neh，這實在是....。」
林先生話講到chia soah起含糊。實際上，老父在世ê時 to̍h beh分財產，除非是老父已經衰老，á是破病來失去執行家政ê能力，若無，因為兄弟之爭成做一家bē和ê原因，絕對m̄是名譽ê tāichì。林先生無意中表明chit點遺憾ê意思，m̄ koh，事到如今，講啥lóng已經無路用loh！ 「若ánne，照阿兄所講ê，景文先生ê功勞額有khah超過一kóa，其實我mā有想過，是chē少加減niāniā。」林先生賢明附加但書，用是m̄是 ē tàng讓一步ê口氣，kā視線移向景文ê面。林先生是一個富翁koh德高望眾，chit件事bē sái kah伊暗中勾結。Hō͘ 伊ánne講，景文soah心內chhia̍k一下。M̄ koh，林先生ê話並無特別硬ài伊讓步ê意思。
「你看án怎？景文君，二十甲中間讓五甲左右ē sái得bē？」
「林先生，你講kah ná senglí買賣leh，ánne m̄好lah！這是神聖ê 財產繼承。M̄ koh，我無家己提出啥物要求，完全委託在座各位尊長ê安排。若講kantaⁿ分一隻豬ákiáⁿ hō͘ 我，he mā是無可奈何ê tāichì。我bē去吊tāu自殺lah，請免煩惱。」
林老先生因為一直būsàsà bē收soah ê問題當teh厭氣，終其尾用講sńg笑ê口氣來問景文ê意見，景文mā用koh khah gia̍tkhiat ê話kā伊回答，結局大家緊張ê氣氛忽然化解，soah大聲笑起來。In ê笑聲ná親像波浪向清文溢過來，伊感覺無啥物好笑，是伊hō͘ 人當做笑柄而已。林老先生ê chit句「讓步」，本底想beh向沉重ê場面投入一帖清涼劑，無想講藥效siuⁿ過強，soah全場大聲笑起來。林老先生就ánne改用正經ê口氣，對身為家長ê阿山小khóa有批評ê語氣講：
「阿山先生，你一向對tāichì lóng無要無緊，m̄ koh，chit項tāichì是你一生kantaⁿ一pái ê重大問題，請你tio̍h慎重考慮，túchiah講ê二十甲土地，希望你kā心內話講出來。」
「無lah！我pháiⁿ講出來lah！若接納長男ê意見會án怎？次男一定bē服，講kah tio̍hbeh吊tāu自殺。這一定tio̍h請你定奪chiah會解決。M̄ koh，我mā認為二十甲有khah無合理，若一半比較khah適當lah！」 阿山 ánne一講，大家隨停止笑，又koh開始雜嘴反對，林老先生目頭結結。無論阿山是一個gōani̍h'á好好先生，對siōng尊重ê人mā bē sái態度hiahni̍h無大無細。林老先生感慨世風淺薄，beh án怎來處理túchiah ê場面，伊soah sa無寮á門。Chit時，清文忽然使khiohka̍k（自暴自棄）叫講：
「Mài koh講à lah，林先生，請照起初ê協定去做。」
「Aiah！Ánne問題就完滿解決loh！最後就是抽籤ê手續。」林老先生擔頭輕鬆落來，就催辦事ê人緊進行。親chiâⁿ中間負責辦事ê人，開始翻閱財產目錄kah相關ê文件。
Kā祭祀公業(祭祀祖先、kiáⁿ孫ê教育、慈善事業費)、養贍(父母ê養老金kah葬式費)、嫁妝（女子ê出嫁費用） chit三種金額扣除了後，kā財產分配hō͘ 眾繼承人。Chitê財產包含現金、不動產、日用家具等，分做平大份了後照抽籤來分配。
「Ánne最後ê決定：XX郡XX庄ê水田六甲做第一號—天，第二號—地，第三號是安平街ê鹽田—人....。」
照ánne，kā每一份財產用天地人、春夏秋冬、仁義禮信等做符號標示，koh kā每一個符號寫tiàm紙裡，捲起來做簽條。然後選一個黃道吉日，koh再tī親族ê嚴格環視之下，進行抽籤分配。
一直爭執不斷ê財產分配問題，就ánne解決好勢。清文感覺家己真戇，為啥物tio̍h hiahni̍h認真去爭取neh？伊所要求ê m̄是金錢，mā m̄是土地，只不過是希望hō͘ 大家承認伊做一個長男ê權利，保tiâu伊ê體面niāniā。伊ánne用心去爭取，結果顛倒koh khah慘，伊ê面子無了了，變kah真無光彩。
清文忽然感覺世間真無聊。就算是tú tio̍h強風大湧，mā tio̍h ài有戰鬥ê對象；chitmá伊kantaⁿ tio̍h面對家己，伊ê心內充滿各種ê思想，m̄ koh m̄知beh án怎去克服處理。伊ê心理有病à，kui身軀 lóng無氣力，伊chiah三十一歲niāniā，就面對現實中不可思議ê厭倦階段。Ánne落去bē sái得；kantaⁿ óa靠信仰，而且是參雜理智ê自我信仰，he是kahná親像teh食嗎啡hō͘ 家己睏落去，絕對bē sái得。
Tī chit款ê情形下，清文kah一般人仝款，忽然想beh去旅行。伊bat想過tio̍h出國旅行一chōa。總是，促成chitê計畫馬上實行ê動機是伊去tú tio̍h一件tāichì。
He是聖誕節暗時發生ê tāichì。Hit暗，清文想beh去安子ê教會看看leh。
「Eng暗我想beh穿台灣服去，你感覺怎樣？」
清文出門chìn前真罕得ánne問；平常出外伊lóng是穿西裝á是日本和服。
「我畢業tńg來ê時，老母替我訂做ê hit套衫，請kā它hiaⁿh出來。我lóng iáu m̄ bat穿過，一半pái kā它穿穿leh mā bē bái，kám m̄是？」
清文chit時無啥物理由，竟然真難得beh穿台灣服出門。
兩人就ánne來到日本基督教會ê門口。Hit時，安子tú tio̍h一個女信徒，兩人就tī陰暗ê前埕khiā teh講話。清文想講chabó͘人話長，khiā tòa hia戇戇 á等mā m̄是辦法，m̄ koh，伊並無想beh家己一人先入去禮拜堂，所以kantaⁿ peh起lih教會ê門廊看māi。入口ê所在有一張細隻桌á，有一張寫「接待」 ê字條垂落來，hō͘ 人感覺是tiāⁿtiāⁿ看tio̍h ê普通開會場所ê款式，kah chit時tú好傳來「平安夜」ê兒童合唱聲ê聖殿無啥對tâng。
Tùi hitê入口tú好有五六個男女挨挨陣陣teh入來，hit位接待ê人一屑á都無信徒ê款式，用無情理ê口氣講：「Bē sái得，bē tàng隨便入去。Lín kám是信徒？」可能是有非信徒想beh入去，清文想講歡迎都bē赴à，ná會有chit款無通情理ê教會？Chit時，伊hō͘ 人擠(chiⁿ)到接待ê所在，接待ê chapo͘人展開雙手，擋伊ê路講：
「你，m̄ thang，m̄ thang！」伊用kē路ê台語講，然後嘴裡chho̍pchho̍p念：「實在無伊法，連清國奴也beh入來！」
清文起驚kah gāng去。Chit種驕傲koh無感性ê態度，kám ē sái算是基督徒？清文感覺真意外；意外變受氣，清文tī無意識中用激動ê目神kā伊睨(gîn)。Chitê接待ê人ka短頭毛，有小khóa白頭毛，五十歲左右，目眉kah嘴鬚烏烏，kah白頭毛無啥對tâng。伊ê目神尖利，kui個人看起來漢草真好；tùi伊身上所穿ê羅紗ê khiā領服裝，hō͘ 人一看就知伊是一個官員中職位siōng低ê人。
清文並無想beh辯解，講伊是教會會友陳安子ê翁。
「驚死人！Chit間教會飼一隻兇霸霸ê顧門狗？」
清文kantaⁿ ánne nauh一句，就tùi門廊行落去，開門chông出教會。安子馬上jiok過來。
「你，小等leh！因為秋山先生m̄ bat你....。」
清文一句話都無回，一直chông beh tńg去，到一間台灣厝宅前約一百公尺ê所在chiah hō͘ 安子jiok tio̍h。安子掠tiâu伊ê長衫手ńg，苦勸講：
「秋山先生講伊真失禮，我若kah你做伙入去，就bē發生chit款tāichì。請mài受氣，咱koh來去教會。」
「Kahná台灣人無權利入去。」
「Hitê人講hit款失禮ê話？」
「放開我ê手ńg！」
「Hitê人hō͘ 教會真頭痛，伊ê頭腦小khóa怪怪。」
聽講秋山chitê人是早前滿州ê鱸鰻，是行為無好ê chapo͘人。因為伊以前ê恩主是一個相當有地位ê官員信主，為tio̍h beh報答伊ê恩情，最近有teh出入教會。伊本來lóng無信仰，聽牧師ê講道常常lóng teh tuh龜，m̄ koh，像講排椅á lah，算人數lah，chiahê事務性ê khangkhòe，伊lóngē tàng做kah真輕khó。Ánne算是bē bái，m̄ koh，伊eng暗ê粗魯驕傲態度，教會mā感覺來了一個怪人，真oh得處理。雖然有chitê緣故tī.leh，m̄ koh，安子chitmá無時間thang kā in翁解說；準講有說明，她mā無法度hō͘ 清文馬上了解來體諒，這hō͘ 安子非常為難。
「Hitê人kahná鱸鰻leh，mài kah hit種人受氣，這是難得ê聖誕節，請回心轉意，咱 koh tńg來去教會lah！」
「Ánne講，你lóng無teh掛意loh，因為你是偉大ê日本婦人。」
「M̄是ánne lah！我會叫伊kā你會失禮。你若ánne tńg去，我會真艱苦。總講一句，咱koh來去教會lah！」
「無ài lah！放開我ê手ńg！」
清文堅持hàiⁿ開手ńg，hitê力頭hō͘ 安子ê身軀phiân去撞tio̍h厝壁。Tī安子驚kah gāng去ê時，清文已經消失tī烏暗中。
