《《陳夫人》日譯台e5台灣小說 第二部》 |
 |
 |
|
 轉寄 |
《陳夫人》第二部 親子 第十三章
作者 庄司總一著 賴永祥指導 林俊育台譯 2017.01.29
阿明想講害ā, 腹肚痛koh tiāⁿtiāⁿ走便所。
Kám會tī庄腳感染tio̍h病？Kám有可能？拜託m̄是ánne。 阿明一直ǹg望mài變嚴重，m̄ koh, 無久to̍h發燒，漏屎jú來jú厲害，伊ê病已經掩khàm bē tiâu。
「你tī庄腳kám有食tio̍h啥物無清氣ê物件？所以，若早知to̍h勸你mài去，就無tāichì。」
老母春鸞並m̄是teh質問，是因為她生本to̍h溫和慈祥，所以她擔心chiah ánne講。阿明一聽，發燒ê頭殼koh khah懊惱，kahná對待chabó͘kán'á ánne大聲講：
「Kám講我去庄腳食tio̍h蛇？Mài管我！過一時á to̍h會好去，免叫醫生。」
總是bē tàng無管，病jú來jú嚴重。老父瑞文終於去請醫生。診斷ê結果chiah知，阿明感染tio̍h amebah赤痢（譯註：華語譯做「阿米巴痢疾」）。
M̄ koh, 對醫生á是雙親ê質問，阿明lóng講去庄腳農場kantaⁿ食帶去ê便當，無食其它ê物件。伊認為一定是前幾工tī街路買枝á冰，食了引起ê。阿明無ài hō͘ 人知真正ê原因，伊tī農場有lim井水ê事實，一定tio̍h隱瞞到底。
Hit工tī樹á腳食中晝小khóa歇睏了後，清文kah安子因為beh辦tāichì去事務所，阿明kah清子就tī農場四界se̍h。In帶來ê水罐已經無水à, 阿明嘴真乾。貫穿鳳梨園ê一條九尺闊ê路邊有一口井，兩三個農場工人tī hia teh自由自在limhit口井ê水，聽講井水有用漂白粉消毒過。Hit時，in bē記得清文有提醒in m̄ thang lim無hiâⁿ過ê生水。阿明lim井水來解嘴乾，hit時，清子mā toè伊lim。
因為無聊ê顧面子，阿明食hitê無ài食ê鹹三文魚卵，若無伊bē hiah嘴乾，致使lim無保險ê生水。阿明咒詛hitê烏tò͘紅、真鹹koh黏黏糊糊ê日本食物。M̄ koh想起hitê快樂ê一工，伊一點á都無後悔去農場。因此，伊無beh hō͘ 雙親á是陳家ê人知影伊tī農場感染tio̍h amebah赤痢。清文講：「Koh無jōa久to̍h ē sái來chia tòa暝。」安子回答講：「來chia度周末，實在真好。M̄ nā是咱家己，若ē tàng全家來chia chhitthô，會gōani̍h'á快樂leh！」阿明無bē記得chiahê話，想tio̍h阿伯kah阿姆chit種美麗ê希望kah理想，若因為伊ê無注意去染tio̍h病，致使in ê希望kah理想bē tàng實現，阿明ê心肝真艱苦，實在忍受bē tiâu。
所以，伊希望家己ê病無嚴重，ē tàng緊緊來醫好。 In老父入來，嘴teh pok薰、悠哉悠哉ê款式，tī伊因為發燒致使濕tâm ê目chiu前出現。阿明掠準老父大概老父iáu未發覺伊ê病因，就安心落來。
「Án怎？kám會真艱苦？」
M̄是煩惱á是同情心，瑞文用存心不良ê眼神，直接看對倒tī病床ê kiáⁿ。 「我一世人bē koh ài食枝á冰。」
後悔含恨ê阿明用小khóa chhoah ê聲講，為tio̍h beh逃避老父ê目神，隨時koh péngpêng睏落去。伊無注意tio̍h老父kā因為péngpêng歪chhoah ê冰袋chhiâu hō͘ 它正ê時面帶笑容。
「M̄ koh m̄是大tāichì, 無久to̍h會好。注射了後會khah khùiⁿ活。」
「Ánne 真好。」
瑞文m̄是teh苦笑，mā m̄是teh憐憫笑，m̄知什麼原因到taⁿ阿明iáu teh隱瞞事實。
「M̄ koh, 若食枝á冰to̍h會中毒，這是tio̍h禁止ê社會問題。」
「M̄是大家lóng ánne, 是我運氣bái lah。」
「你kám m̄是有去hitê厝？....」
「有去阿伯ê厝....」
冰袋koh再歪chhoah去，阿明kā它chhiâu正。
「Oh, 阿爸，清子kám mā感染tio̍h？」
「大概kah你仝款ê症頭。」
無需要加講，簡單ê一句話to̍h劇烈鑿tio̍h阿明ê心。帶來pháiⁿ消息ê老父瑞文，kahná是惡魔來臨，瞬間tī紅kìkì ê目chiu前出現。伊已經無話thang講à, 只有吐氣niāniā。
「Oeh, 阿明，你ná會編一套白賊話來欺騙lín父母？你真戇呆。Kám tio̍h需要講白賊來hō͘ 家己陷落無聊ê痛苦？」
阿明haiⁿhaiⁿchhan。心內重複「無聊ê痛苦？」hit句話，m̄ koh, 伊已經無氣力thang來反駁。
「你想看māi leh, 你去農場lim lahsap ê古井水—koh隱瞞講白賊，你ê病m̄是破病niāniā, 若有三長兩短—責任kám m̄是lóng tī阮做父母ê身上？Kám講你kah意lín阿伯kah伊ê厝soah無計代價來ánne做？你tī lín阿伯ê厝內，連khanaliah（譯註：華語譯做「金絲雀」）ê屎都感覺是芳ê。Ánne無打緊，你對家己親生ê父母pháiⁿ款待，這是甚麼法理？」
瑞文知影tio̍h利用chitê機會來好好á教示kiáⁿ兒，對破病中ê阿明有khah過頭kā伊修理。
「你ná會kantaⁿ感覺阿伯ê厝chiah是好？」
「阿爸m̄是仝款？」
「你講啥物？」
「阿爸少年ê時chūn，你kah意hit pêng ê阿姆。」
若m̄是破病發燒，阿明bē講chit種話。
阿明ê痛苦有雙重。連家己ê叔伯小妹mā可憐感染仝款ê病，她ê病痛可能比伊家己khah嚴重。阿明想tio̍h這lóng是tùi伊來造成ê, chitê自責擒tiâu伊ê心肝頭。腸á kahná受割斷hiah痛苦，kui身軀kahná火teh to̍h hiah燒。這是家己ê苦難á是清子ê劫數？兩個lāmlām做伙，伊soah分bē清楚。因為病痛kah hiah厲害，阿明想講家己會就ánne死去，清子mā會就ánne死去。阿明因為發燒soah tuh眠睏去，一定是做一個惡夢。夢醒ê時，感覺家己iáu活teh, koh奇怪想講清子kám mā活teh。伊teh想像少女teh睏ê面，soah想起蒼白ê死人面。M̄ koh m̄是每pái lóng是惡夢，有時夢見tī hip熱ê春宵，看tio̍h大廳新增ê新娘燈，伊beh去迎接坐美麗花轎ê新娘。伊ê心肝pho̍kpho̍k跳，就ánne hō͘ 炮á聲吵醒。
家己beh迎接ê新娘是啥人？....Kám會是清子？阿明teh回想伊ê眠夢，身軀phi̍hphi̍hchhoah, m̄ koh總是比夢見死khah歡喜。清子感染tio̍h amebah赤痢chitmá án怎？一定是真艱苦，情形演變kah án怎？等等不斷teh煩惱。阿明想tio̍h兩個做伙teh艱苦，心內感覺奇妙ê滿足。
兩三日了後，阿伯kah阿姆來探訪，聽過清子ê病mā大概真樂觀，阿明煩惱ê艱苦心chiah得tio̍h tháu放。
過無jōa久，阿姆the̍h花來探訪。
「Ah, 阿姆，he花....」
阿明不知不覺tī病床頂ánne講，體溫真無簡單chiah退燒，chitmá感覺koh chhèng koân起來。
「雖然m̄是真súi ê花，我叫chabó͘kán'á去賣，她買chit束花tńg來。若是balah（譯註：華語譯做「薔薇」to̍h會khah好。）
安子真自然kā hit束花khǹg tī阿明ê讀冊桌á頂面。因為疑惑kah見笑，阿明無發覺家己脆弱ê感情kahná波浪起起落落。
Hitê花ê名叫做圓á花，淡淡紫紅色ê頭殼形，hō͘ 人想起kahná圓á，所以ánne號名。圓á象徵家庭圓滿，因此習慣上，圓á花成做婚禮裝飾ê花。
安子kám會知影chitê風俗習慣chiah帶來？He是無可能，因為她看起來m̄知chitê緣故。M̄ koh, 安子嫁來陳家已經二十年ā, 台灣ê風俗習慣知影真清楚chiah tio̍h。Tùi chit點來講，她應該比新世代ê阿明koh khah台灣化。若是ánne, 阿姆知影hitê花kah結婚有關係chiah帶來，hit中間可能有啥物意函tī.teh....。
有啥物意函neh？....Kám有hit款tāichì？若是ánne, 無lah....。 安子tńg去了後，阿明虛弱ê目chiu久久sióng hitê圓á花。優雅ê花瓣，其實m̄是啥物花，kah它ê花名仝款，一蕊圓圓ê花，hō͘ 阿明ê目chiu看起來kahná紅紫色ê雞心臟。Mā hō͘ 伊感覺kahná是teh象徵新娘新郎ê心，天真浪漫，第一pái ê gāigio̍h gāigio̍h。無lah, he m̄是型ê問題，tī型ê中間koh加上傳統ê意義。阿明一直lóng有teh參加陳家á是親chiâⁿ ê婚禮，hiahê煩雜lôlílôso ê禮儀hō͘ 人感覺真煩。M̄ koh, chitê圓á花會hō͘ 人懷念，裝飾tī大廳ê角頭á是新娘房ê桌á頂，吐出熱情ê chitê花。
破病ê回復期，對健康ê期待，根據回復ê確實性，會活出比健康koh khah幸福ê活跳跳性命。總是，阿明chitê少年人ê回復期無chit種明朗ê心境，伊有喜樂kah不安ê參雜，有時感覺tio̍h生死混合ê奇妙心情。伊ê希望無像甘甜koh重味ê奶，kahná薄薄ê露水隨時消失去。阿明一pái ê破病，ē sái講是因為阿姆帶結婚之花來探病，chiah hō͘ 伊第一pái想像將來beh kah清子結婚。Chitê思想m̄是冷kiki ê塑像，因為已經肉體化，致使hō͘ 阿明ê內心產生真正ê苦惱。
過幾工了後，阿明離開病床，伊隨時去阿伯ê厝探訪清子。她無tī.teh, 她ê病已經完全好，兩三工前to̍h去學校上課。
可能因為懷恨lim古井水ê tāichì。總是，她比伊khah早好，ná會無來kā伊看一pái？阿明小khóa感覺不滿kah幻滅，就行出去外口。 真久無suh tio̍h室外ê空氣，衰微ê胸坎á勻勻á phok起來。街路ê厝宅kah過路人kahná kā伊bē記得，看起來真生疏。四月ê日頭光鑿目感覺會痛....阿明ê病iáu未完全好。
街路ê頭前傳來隊伍ê聲，tùi鬧熱ê炮á聲知影he m̄是出山ê行列。阿明tùi亭á腳ê柱á邊teh看隊伍ê進行。
Chhóa頭ê炮á放kah jú來jú鬧熱，吹班（樂隊）ê鑼鼓聲kah笛á聲ê交響鬧熱滾滾，喜氣洋洋。有幾個𣛮（siāⁿ）hō͘ 人扛teh行，有ê𣛮頂面khǹg鏡台、衫á櫥、衫á褲、鞋、桌á kah椅á, lóng hē tī紅布頂面。新娘坐tī幾個轎中間ê一個，用刺繡ê紅布圍teh, 轎頂koh有裝飾紅球，一下to̍h認會出來。新郎mā坐tī其中一個轎，tòe記新娘kah新郎兩個姓ê提燈kah新娘轎，向前行....。
Hitê結婚ê隊伍，阿明起先感覺真苦悶，後來chiah有一點á喜樂進入伊ê腦海。吹班ê chapo͘ 成員以及扛轎á是扛𣛮ê人，看起來lóng是khulih（譯註：做粗工ê人，漢字有時寫做「苦力」）ê款式。In穿長度到腳頭u ê褲，露出小腿kahná塗漆茶色teh發光，thǹg赤腳踏tī燒燙ê tám'áka路面，pata pata向前行。其中有人甚至因為天氣熱kā衫展（thián）開，á是本來to̍h破真大孔，露出kui身軀汗ê排á骨，hō͘ 人看tio̍h bē爽快。Chitê大好日，ná會無beh穿khah整齊leh？無論坐花轎ê新娘妝kah gōa súi, 迎（ngiâ）親ê隊伍jōa 行伍（hângngó͘），這是美中不足ê遺憾。民族性ê粗野，tùi chit點顯露kah現現現。
總是，chit種舊ê結婚式mā漸漸簡單化，最近mā常常看tio̍h新娘新郎ê轎車ê行列。聽講mā有人tī大神宮ê神明前舉行婚禮儀式，台灣人結婚mā有人排設西洋式ê婚宴。阿明想講家己結婚ê時....如果kah清子結婚，會採取hit種方式。Tī神宮結婚ê方式會án怎leh？Kám會是宮主唸祝詞？新郎新娘交杯lim酒？詳細情形lóng m̄知。Koh再講西洋料理ê宴會是án怎？Kám會曉使用刀á chhiám'á？聽講用餐具bē sái出聲，然後開Siangphián（譯註：華語譯做「香檳」），pòngpóng....伊tī一本小說中讀tio̍h形容做kahná網球ê聲。Iáu有蜜月旅行，火車kā兩人載到真快樂ê所在，當然tio̍h有月娘ê暗時。月娘kah新娘仝款恬靜、溫柔koh清新，月娘是女性。台灣話kā月叫做「月娘」，月光微微á散發清芳（phang），hiahni̍h'á súi。Beautifulbeautiful, 月光恬恬á發出聲音、唱歌，配合火車ê車輪聲。月光....月光....moonlight, moonlight, moonlight....
