《《陳夫人》日譯台e5台灣小說 第二部》

 | | | 轉寄

《陳夫人》第二部 親子 第十八章

作者 庄司總一著 賴永祥指導 林俊育台譯 2017.03.05

玉簾到taⁿ一直家己感覺無掛意ê事，想bē到去hō͘ 丈夫衝擊以來，對她來講已經成做大事。創傷tī家己感覺有受傷ê時chiah會真正感覺痛。Hō͘ hitê青年困擾koh kā伊嬉弄來感覺無罪ê喜樂，chitmá已經成做嚴重ê報復，刀劍來teh鑿她ê胸坎。神ê話、祈禱á是讀聖經，chitmá已經無koh是為tio̍h對方，是成做為家己贖罪kah拯救tio̍h掠tiâu ê牽藤。總是，她koh感覺掠tiâu ê牽藤會斷去，會跋落去谷底。玉簾有時á to̍h來咒詛神：神是疼，m̄ koh, ná會hiahni̍h劇烈teh鞭phah我chitê軟弱ê女子？她對游德仁並無過分ê想法，只不過是伊hō͘ 她一個小小ê夢niāniā。Tī夢á是想像ê中間，kám講會致使姦淫á是刣人？何況結婚以來，她m̄ bat有過幸福ê滋味，偶然chhōe tio̍h一點á虛幻ê安慰，為甚麼tio̍h受chit種ê責備？

她心內想講無beh koh去，m̄ koh, 她iáu是繼續teh去農場。這實在是可怕ê tāichì, kahná去坐tio̍h家己tio̍h落車卻無靠站直駛ê火車。 總是，好佳哉hit台列車脫線停落來，玉簾有一段時間免去農場。當然這m̄是出tī她ê意思，是因為hit所在發生腦脊髓膜炎ê流行病，chit二個月連清文kah安子mā lóng無法度去。

俗稱「流腦」ê流行病tī台南州，講已經有四百人感染，m̄ koh, 實際人數koh khah chē。Kantaⁿ tī陳清公司ê農場to̍h有七八個患者，其中三個人已經死亡。而且，今年ê雨水比往年khah chē, 費心起造ê堤防崩去，農場ê作物lóng報銷去。清文kah安子非常懊惱傷心，可怕ê流行病致使in bē tàng去看災情。

陳家ê人當然mā無去，真無簡單chiah吸引厝裡ê人前往，安子想tio̍h會hō͘ 厝裡ê人無好印象，她就真失望。她ê菜股種ê tho͘máto͘h kah茄可能lóng nōa去à, 別莊m̄知變成án怎？五六十工無人拚掃，一定全全蜘蛛絲....。

安子因為擔心，暗時soah做可怕ê惡夢。她夢見別莊ê大廳倒真chē病人teh痛苦haiⁿhaiⁿchhan, 其中mā有死亡ê，而且，有野鼠tī病人ê身軀頂teh走。牆壁kah天花板ê kachoa̍h四界飛，teh咬「最後ê晚餐」ê油畫，teh食廚房ê牛奶油....。

因為她有khǹg兩塊牛奶油tī廚房，所以做ánne ê夢。M̄ koh, 根據留tī農場ê游德仁ê報告，農場並無安子想像ê hiah嚴重，而且流行性ê腦炎mā漸漸消退，安子終於ē tàng放心。Chit時卻傳來游德仁tio̍h病ê消息。

Hit所在發生流行病以來，游德仁受tio̍h當局禁止外出，因此伊不得不tio̍h留tòa hia。實在值得同情，伊koh再負責農場監督到底，tio̍h深深kā伊感謝。伊終於病倒，清文感覺tio̍h親自去探訪chiah會安心。 「M̄ koh, 你，這m̄是一般ê病....」

安子真驚惶不安。腦炎是死亡率真koân ê症頭，而且準講得救，mā會變成智障á是肢體殘廢。冒chit種ê危險去hia, ē sái講是有勇無謀。
「拜託你mài去，雖然游德仁真值得同情。」
「M̄ koh, 咱農場mā有三個人死亡。」

真無奈ê情形下，清文暗示伊ê決定不變。
「所以，ánne kám m̄是koh khah危險？若萬一發生什麼tāichì, 你beh án怎chiah好？」
「無要緊，我kā嘴lom一直掛teh to̍h無問題。若是每一個人lóng會感染，ánne, 醫生beh怎樣leh？醫生真少受感染，是因為in有做完全ê預防，另外一點to̍h是家己有自信，絕對無問題ê信心....。」

安子看tio̍h清文面上ê微微á笑，她顛倒感覺熱血tùi面上消退。男人iáu是有女子缺乏ê大氣魄。她雖然對丈夫ê責任感kah勇氣有感動，m̄ koh, 心頭ê不安iáu是無法度平靜。

不管她án怎努力反對，清文iáu是堅決m̄改變伊ê意志。
「Ánne, 你若一定beh去，mā hō͘ 我做伙去。」
「Kám講死mā beh做伙死？你mài想kah hiah悲壯！做你放心。」
「Ánne, 我去mā無問題。」
「Bē使得！」

清文講tio̍h家己beh去，嘴笑目笑；in bó͘ 講tio̍h beh做伙去，就目頭結結，一直搖頭。

兩人互相堅持家己ê意見，安子就去拜訪她ê家庭醫生S氏，kah伊參詳。S醫生mā無贊成in夫妻去庄腳，雖然流行病無像感冒hiah koân ê感染率，m̄ koh, 危險是事實。總是，若真正無去bē sái得，tio̍h充分注意。流行性腦脊髓膜炎ê病原tùi tó位侵入，tī醫學上雖然iáu未確定，m̄ koh, 聽講是嚨喉、扁桃線á是它ê附近。所以，siōng重要ê是帶嘴lom, koh來to̍h是tńg來到厝一定tio̍h kā身穿ê衫褲隨時消毒。而且tio̍h注射Chuluhoamit（譯註：ズルファミ—ド，德語Zulfamid, 華語=亞硫酸胺），聽講加減有效。

就ánne, in beh做chiahê預防kah注意事項，兩人決定beh去。安子teh準備ê時，玉簾走來。因為她有聽tio̍h游德仁hō͘ 病魔攻擊。
「游先生ná會運氣hiah bái？伊hông派去hit款所在，無法度離開hia出來，結果soah病倒落來。」

Kahná是安子in hō͘ 游德仁陷落chitê慘境，玉簾nga̍uhnga̍uh念講。她koh問：
「Tang時開始破病？」
「今á日早起，佳哉有早治療，無要緊。」
「Kám真正無要緊？為甚麼無hō͘ 游先生liōng早tńg來台南？Chit五十工，我一直想辦法beh án怎kā伊tùi危險ê所在救出來。我祈禱神m̄ thang發生pháiⁿ tāichì，m̄ koh, 結局神mā是kahná beh kā伊召去。」

玉簾哈哈笑出來，因為苦悶hō͘ 她擋bē tiâu，kiōngbeh崩盤ê款。安子感覺她hit種ku怪ê笑法真不可思議。事實上，玉簾m̄知tang時起to̍h無出門，安子已經真久無看tio̍h她，不知不覺ê中間，她瘦kah ná是另外一個人。

她kah游德仁之間ê事bat有一koá謠言，安子mā常常有teh掛意，taⁿ看tio̍h玉簾對伊ê病情hiahni̍h擔心，chiah知影有kóa koh樣。總是，tāichì hiahni̍h突然，安子對玉簾ê悲傷心chiâⁿ無法度充分感受，kantaⁿ ē tàng安慰她講：無要緊，一定會好起來，無問題。M̄ koh, 她心內卻有一點á討衰bē爽ê感覺。

總是，玉簾也m̄是小姑娘，因為宗教信仰ê心靈，她對世事看khah開，她盡量無beh露現瘦抽ê蒼白面容，koh 努力來掩khàm lap窩koh閃sihsih 有痛苦ê目chiu。她mā發覺無應該tī阿嫂ê面前暴露家己心中ê秘密。
「其實，我以前to̍h想beh kā游德仁安排來做美圓ê翁婿。伊認真koh老實，一定ē tàng hō͘ 我ê chabó͘kiáⁿ幸福。」
「Ah, 是ánne oh, 伊一定是一個好kiáⁿ婿。」

安子聽玉簾ánne講，一切ê疑問lóng了解à, 就做ánne ê回答。總是，互相只不過是講kahná m̄是真實ê假話，兩人mā lóng感覺家己講ê話一點á都無真實，講話bē投機soah感覺無味無素。
「阿嫂，你有beh koh去農場。Ánne, 我mā beh去。」

玉簾ánne輕鬆á講，安子身軀kahná去hō͘ 她縛tiâu.teh, kui個氣勢挫敗落去。
「玉簾，bē sái得lah, 因為清文iáu未答應beh hō͘ 我去。」
「Ánne, 若是你ē sái去，我ná會bē sái去leh？」她小khóa任性講。
「He to̍h無仝款，he是阮開始ê事業。你去若發生意外，kám m̄是清文kah我tio̍h負完全ê責任？」

玉簾hō͘ 安子ánne解說了後，她隨時接納。