《Kah陳小小做伙讀台語》

 | | | 轉寄

Iáu是照上主ê形像造ê

作者 陳小小，台譯：Lîm ChùnIo̍k 2024.09.15



Iáu是照上主ê形像造ê

法老王對摩西tùi koân地講：「上主是啥人hō͘我tio̍h聽祂ê話，准以色列人離開？我m̄ bat上主，mā m̄准以色列人離開。」（《全民台語聖經》出埃及記5章2節）就ánne上主用十災來回答「上主是啥人」，十个神跡lóng具體展現受造向上帝ê臣服，傳達出chit个名字包含ê創造主意義。

第一災尼羅河水變血，河川聽上主ê！祂是創造主。

第二災水蛙災，水蛙聽上主ê！祂是創造主。

第三災蝨母災，土粉、蝨母聽上主ê！祂是創造主。

第四災胡蠅災，胡蠅聽上主ê！祂是創造主。

第五災chengseⁿ tio̍hche ê災，chengseⁿ生死聽上主ê！祂是創造主。

第六災生瘡災，健康kah病症聽上主ê！祂是創造主。

第七災冰雹災，冰雹聽上主ê！祂是創造主。

第八災草蜢災，草蜢聽上主ê！祂是創造主。

第九災烏暗災，日頭聽上主ê！祂是創造主。

第十災tōakiáⁿ死亡，人類生死聽上主ê！祂是創造主。

法老王終其尾明白上主比in國民平常時敬拜ê眾神明—尼羅河哈比、水蛙ê神海奎特、大地ê神蓋布、蟲ê神凱布利、chengseⁿ ê神阿匹斯、醫藥ê神托特、天頂ê神努特、破壞ê神塞特、日頭神拉等等 koh khah厲害！上主mā比kakī oló做神ê kakīkoh khah厲害！

希伯來人寫作四常使用平行體ê技巧，讀者mā慣勢用平行，而且讀ê方式the̍h出來koh khah深刻ê含意。出埃及十災ê造物上主kah受造，thang用對讀法，tńg來創世記第一章ê上主照序創造萬物。

創世記1:1：「源起頭，上帝創造天kah地ê時，」創世記1:2：「地是空空渾沌，深淵ê頂面烏暗；上帝ê靈運行tī水面。」華語看起來是兩段，m̄ koh tùi原文看，chit兩節ài連做伙，bē tàng分開。所以1:1 ê結束應該是逗點，卻m̄是句號。和合本修訂版已經修定做「起初，上主創造天地ê時，」，以下三个英文版本聖經mā用連接符號：

TⁿK Genesis 1:1 When God began to create heaven and earth –

NRS Genesis 1:1 In the beginning when God created the heavens and the earth,

YLT Genesis 1:1 In the beginning of God's preparing the heavens and the earth


M̄ koh kantaⁿ改標點符號iáu 無夠，一定tio̍h kā「天地」翻譯做「chiahê天」（הַשָּׁמַיִם）kah「chitê地」（הָאָרֶץ）。整句為：「源起頭，上帝創造『chiahê天』ê時，chitê地是空空渾沌，深淵ê頂面烏暗；上帝ê靈運行tī水面。」；...…」chiah ē tàng理解上主創造兩个世界，「chiahê天」，NRS、YLT lóng複數翻譯出來做the heavens，he是一个人肉眼看bē tio̍h ê超自然世界（俗稱屬靈世界）。「Chitê地」chiah是人肉眼看ē tio̍h、人所khiā ê世界。Á創世記1:2到第一章結束，通篇描述「chitê地」án怎被按照上主ê計畫kah秩序創造ê細節。

詩篇115:16 kā chit兩个世界ê觀念講述kah koh khah清楚：「天（chiahê天），是上主ê天；地（chitê地），祂卻hō͘世間人。」chiahê天ê概念mā thang tī哥林多後書12:2看tio̍h，保羅bat提起kakī被講tio̍h第三層天頂，指ê to̍h是hitê人ê肉眼看bē tio̍h ê「chiahê天」超自然世界。

Á「chitê地」創造ê siōng 高潮是人類。人類是照上主ê形像（צֶלֶם）kah樣式所造！צֶלֶםchit字mā用來指君王塑像ê建立。人類是上主設立tī「chitê地」siōng尊貴榮光ê受造，人類是上主tī受造世界ê代表，人類代表上主管理「chitê地」。

Kā出埃及記十災kah創世記第一章對讀，to̍h ē看tio̍h當人類m̄ bat上主、m̄敬拜上主，to̍h ē phak拜tī「chitê地」比kakī kē ê受造萬物，親像埃及人拜尼羅河、水蛙、大地、天頂、胡蠅、chengseⁿ、冰雹、草蜢、日頭。自古以來，世界各國ê民族mā phak拜各種ê走獸、飛禽、蟲thōa、水族。M̄ koh，「chitê地」ê受造萬物，獨獨人類帶有上主ê形像kah樣式。人類m̄知kakī是照上主ê形像kah樣式所造，iáu倒páiⁿ去敬拜其他受造萬物，chitê行動是一種反創造ê行為，是一種對造物主上主ê褻瀆！因為人類代表上主。

人類照上主ê形像kah樣式所造，chitê觀念mā出現tī新約ê雅各書。勸戒兄弟姊妹tio̍h慎言，tī話語上無過失：「咱用嘴舌頌讚祂為主、為父ê，koh用嘴舌咒詛hitê照上主形像被造ê人。」（雅各書 3:9）後面包含ê意思是，講人pháiⁿ話，mā是另外一个種形式對上主ê褻瀆，因為被咒詛ê hit人有帶上主ê形像kah樣式。

亞當kah夏娃犯罪了後，人類世世代代lóng是罪人。上主ê拯救計畫，透過耶穌帶來新ê創造。哥林多前書15:45有陳述耶穌是「末後ê亞當」ê觀念，teh對應第一个帶來罪惡ê亞當。信耶穌ê人，lóng成做新造ê人，白話ê講法to̍h是tī舊人類內面產生新人類！「無論啥物人，若kah基督結聯，to̍h是新創造ê人；舊ê tāichì已經過去，taⁿ lóng變做新ê。」（哥林多後書5:17）「lóng變做新ê」原文koh khah活跳ê譯法是：「看ah！Chiahê新ê，發生！」

Siōng特別ê是chiahê新造ê人，iáu是照上主ê形像造ê！保羅講：「tio̍h成做新ê人，to̍h是照上帝用真理所產生ê公義kah聖潔來創造ê新人。」（以弗所書4:24）舊人是照上主ê形像造ê，新人mā是照上主ê形像造ê，這是何等重要ê koh一pái授權！意思是講上主無棄sak人類，新人類—新造ê人繼續代表上主。所以，保羅提醒：「Ánne，lín tio̍h脫離以前ê生活，thǹg去舊ê人，kā舊ê「我」換新；舊ê「我」因為私慾ê引誘已經teh敗壞」（以弗所書4:22）因為咱是上主tī「chitê地」ê代表，代表上主管理「chitê地」。

過去，舊人掠準kakī是上主來管理「chitê地」，就ánne 人人痛苦、haiⁿhaiⁿchhan。咱chiahê hō͘ 耶穌拯救ê新人，hiahni̍h'á榮幸，iáu是照上主ê形像造ê！願蒙恩ê咱做每一件tāichì，lóng知影tī「chitê地」是代表上主，一切言行tio̍h反映上主，m̄ thang hō͘上主卸面子。另外，咱代表上主，m̄ koh m̄是上主，咱是上主ê奴僕，tio̍h隨時察覺上主主人ê心意，用真理ê仁義kah聖潔來管理「chitê地」。