《主編e5話》

 | | | 轉寄

繁星計畫 DVD贈送

作者 陳鳳翔執行長 2007.08.05

德蕾莎修女照顧「sànchhiah人中ê sànchhiah人」事蹟，大概真chē人lóng知影。Ē sái講是khah少人知影上帝/上主如何帶領伊建立chit種跨國ê服務sànchhiah人組織，á hit段過程，hō͘我gōnggia̍h無停。

德蕾莎修女得tio̍h上帝/上主ê呼召，有感動boeh獻身照顧sànchhiah人。按照天主教ê程序規矩，tio̍h向頂面ê督導單位報告。當伊得tio̍h上級長官接見ê時，督導表示：「Kap妳仝款想boeh獻身照顧sànchhiah人ê人真chē，但是in後來lóng做bē落去。妳如何確定是上帝/上主ê呼召，確定家己做會落去neh？」

以前涉世未深，會感覺督導真無生命，怎樣潑人冷水？但hit年伊近中年，有了社會歷練，看見真chē事工起初憑藉tio̍h一時衝動、血氣之勇，當感動消失，留落來爛攤子hō͘別人。真有點á像一句台灣俗語「生雞卵無，放雞屎有。」

其中有一段對話，非常經典。督導問德蕾莎修女：「咱天主教mā有真chē照顧sànchhiah人ê機構，你為何無boeh參加hiahê機構就好？何必另外建立一個組織？你憑什麼認為家己建立ê機構會做ê比現存機構好？」

督導ê問題，tī修女心中盤旋，hō͘伊jú來jú清楚，家己boeh服事ê對象，m̄是sànchhiah人，卻是「sànchhiah人中ê sànchhiah人」。

當伊準備好了，來到督導面前，伊謙卑講：「咱天主教是有真chē服事sànchhiah人ê機構，in mā做得真好。但是chiahê機構tio̍hài sànchhiah人家己前來領取各樣ê救濟品。總是有kóa sànchhiah到極點、iau到根本行bē到咱救濟站ê sànchhiah人，無人照顧in。我想boeh服事ê對象，就是chit群sànchhiah人中ê sànchhiah人。」

後面ê故事，大家lóng知影，á上帝/上主透過德蕾莎修女頭前ê故事，hō͘我思考tio̍h，信望愛站服事ê對象，過去一直是網路族。但電腦世界裡，mā存在一陣無方便使用網路ê族群。Hiahê錢少ê，可能iáu teh用 modem上網，忍受慢kah ná龜速度ê頻寬，甚至mā存在根本無錢牽網路，或者是該使用者，根本處tī bē tàng上網ê區域，譬如山頂ê原住民、第三世界國家。

因此，我先估算一下á經費，大約二十萬。雖然無tī年度ê預算中，但全體義工群lóng非常支持。這算為咱信望愛對外ê十一奉獻行動，雖然chitê金額遠超過咱ê十一。

續落來，kap技術組義工討論，將本站頂面ê重要信仰kap聖經資源，做離線版DVD光碟ê可行性。並一一聯繫原本隸屬tī各種捐贈者ê資產，請求授權。

技術組義工開了真chē時間，進行研發測試。畢竟過去lóng是做線頂版(online)，離線版(off_line) m̄是hiahni̍h容易。Chia tio̍h多謝in辛苦ê奉獻，chiah ē tàng成就「信望愛繁星計畫」。

光碟內容有：
1. CBOL計畫產生ê 中文聖經工具繁體版，包含「聖經、聖經原文 字典、聖經註釋、串珠、舊約聖經原文字彙分析」。
2. Spring兄弟提供ê 中文聖經查詢工具繁體版。
3. CBOL計畫提供ê 專卷研經資料。
4. 梁望惠老師提供ê 成人主日學教材。
5. 台中何姊妹提供ê「台語聖經朗讀」mp3。
6. 北美感恩兄弟協助校閱ê「荒漠甘泉」。
7. 西螺杜謙遜牧師提供ê「台語聖詩投影片」。
8. 李瑞雄長老提供ê「台語聖詩伴奏mp3」。
9. 信望愛資訊中心ê專輯。

預定壓製五千片，郵寄到全台各種教會機構，kap海外一kóa機構。咱直接授權所有the̍h tio̍h光碟ê人不需要過問，ē tàng任意拷貝hō͘需要ê人。另外，所有為信望愛奉獻ê朋友，不管奉獻jōachē，即使只有一百元，mā會得tio̍h chitê繁星計畫光碟一片，送完為止。

但，kohkhah歡迎上網下載（網址請看下面），自行取得siōng新版本。畢竟光碟容量有限，擠bē落hiahni̍h chē資料。Ná親像「越南聖經」、「台語聖經」、「古舊珍本聖經」....等豐富內容，無法度khǹg入光碟片中。

繁體版（台灣站） ftp://ftp.fhl.net/pub/FHL/COBS/fhldvd.iso
繁體版（北美站） ftp://us.fhl.net/pub/FHL/COBS/fhldvd.iso
簡體版 ftp://ftp.fhl.net/pub/FHL/COBS/fhlgbdvd.iso


目前，光碟已經送廠大量製作，預計下禮拜就會開始phah包郵寄。感謝上帝/上主，伊預備了一位崑山科大學生葉可欣，tú好暑期來本中心實習做義工20工。M̄ nā tī編務、站管上協助真chē，並hō͘我原本想來thang驚ê五千份ê phah包郵寄事工，ē tàng有伊作伴同齊來完成。分擔ê重擔，格外ê輕。

耶和華對亞伯拉罕講：「我便指家己咒chōa講『論福，我必賜大福hō͘你；論子孫，我必叫你ê子孫chē起來，ná親像天頂ê星，海邊ê沙。……』」（創世記二十二章）

上帝/上主ê子民像天頂ê星，海邊ê沙。「繁星計畫」hō͘眾義工獻上ê智慧財產，ē tàng壓製成光碟，送到偏遠鄉鎮或是世界各種角落，達到hiahê「無網路、但有電腦」ê人手上，為主所用。

請大家為「繁星計畫」祈禱或奉獻支持，願上帝/上主祝福∼

執行長 陳鳳翔敬上