《主編e5話》

 | | | 轉寄

恭喜信望愛站得教育部頒獎

作者 cris 2008.02.03

恭喜信望愛站loh！
這真正是春節大禮

台語信望愛ê威力無遠弗屆
Tī中小學ê課堂上
伊mā發揮了影響力neh！

我tī學校上鄉土語言課ê時
Bat放《馬偕在台灣》ê布袋戲DVD hō͘學生看
我ài學生沿路看沿路注意字幕ê漢羅拼音
看完了後來一個看羅馬拼音學台語ê有獎徵答
學生因為學過KK音標
大多數lóng iáu猜會出來
In猜kah趣味滾滾
Mā答kah得非常歡喜

了後，有學生看過iáu想boeh koh再看
我便將台語信望愛紹介hō͘ in
Siōng頭有《馬偕在台灣》ê布袋戲全劇
In ài怎樣看就怎樣看

最後是要求學生將看過ê馬偕故事
koh再分組創作劇本並演出
因為已經到學期末
所以劇本kap演出khǹg tī下學期

下學期我boeh kap學校老師推介台語信望愛
免得咱chiahê無啥會講台語ê鄉土語言老師
一下boeh上課to̍h起煩惱

感謝諸位真有文化使命感ê兄弟姊妹
真正是萬事互相效力，hō͘愛神ê人得益處

而且ah！台語信望愛siōng偉大ê是開小錢作大事
咱tī學校單位做事ê lóng知影
教育部每年投落oh得想像ê重金teh推廣母語
但是開大錢卻做不了什麼tāichì
所有ê成果mā無khǹg tī網路頂供大家使用
真chē比賽mā只是比完了就準算
像高雄市每年暑假ê答嘴鼓比賽
預算就有千萬
Ē sái講是不過就是學校出一隊參加
初賽複賽比比leh頒頒獎，ánne而已
答嘴鼓ê文字稿kap比賽ê影音
就是想boeh看mā無所在搜尋
我實在無法度想像
Hiahni̍h簡單ê程序kap競賽竟然tio̍h ài千萬
而且這iáu只是推廣母語其中ê一個小小ê活動而已
如果kā hit筆錢the̍h來hō͘信望愛站做tāichì
Tī仝款ê資源kap金錢之下
我敢hiapai koh肯定地講：
信望愛發揮ê影響力必定比教育部作ê
大大過kúinā倍

因為，信望愛ê同工是
忠心koh良善ê僕人！