《母語e5心靈雞湯》

 | | | 轉寄

Thu̍tpiàn...突變

作者 Li KhinhoaN 2006.05.21

SARS 五之五
Ū chi̍ttōaⁿ sîkan bô tńgkhì Tâioân
有一段時間無轉去台灣
Chòekīn hoathian Tâioânlâng
最近發現台灣人
Siókhóa chham kakī bô siáⁿ siosiâng
小可chham家己無啥相像
Te̍kpiat sī bīnhêng
特別是面形
Te̍kpiat sī kóngōe ê hêng
特別是講話ê 形
Siókhóa chham kakī bô siosiâng
小可chham家己無啥相像
Tâioân piànhòa lú lâi lú kín
台灣變化愈來愈緊
Tâioânlâng ê chìnhòa
台灣人ê進化
Sīm̄ sī mā lú lâi lú kín
是m̄是mā愈來愈緊?

Tiānsī sinbûntiong ê Tâioânlâng
電視新聞中ê台灣人
Chhùihêng chham íchêng chin bô siâng
嘴形chham以前真無像
Ū thu̍t chhutlâi
有ê突出來
Ū tiám'á sêng “thânglàuia”
有點á sêng「唐老鴨」
Ūê ke chi̍tiân po̍hpo̍h tahbīn
有ê加一iân薄薄貼面
ChhinchhiūN Ji̍tpún ê jímchiá
親像日本ê忍者
Ūê chi̍tsûn chi̍tsûn ê hoâiⁿsûn
有ê 一sûn 一sûn ê橫sûn
Náchhiuⁿ chhiúsu̍ttiong ê gōakhoiseng
那像手術中ê外科醫生
Ūê chin hoe chin súi
有ê真花真súi
Ūê koh ū kokchióng chháisek
有ê koh有各種彩色

Chiok kiaⁿ góa ē lú lâi lú bôsêng Tâioânlâng
足驚我會愈來愈無sêng台灣人
Kín khì khòaⁿ iseng
緊去看醫生
Mn̄g iseng ū símmi̍h honghoat
問醫生有甚物方法
Hō͘ góa mā ē tàng chìnhòa
Hō͘我mā會tàng進化
ChhinchhiūN tī Tâioân ê Tâioânlâng
親像tī台灣ê台灣人
Iseng kóng he sī chi̍tkhoán thu̍tpiàn
醫生講he是一款突變
Siū Tiongkok pēⁿto̍k ji̍pchhim ê kiatkó
受中國病毒入侵ê結果
Tâioânlâng chíiàu Tâioânsim iáu tīteh
台灣人只要台灣心iáu有tīleh
Èngkai ū hoattō͘ khìtû Tiongkok pēⁿto̍k
應該有法度去除中國病毒
chinkín hoeho̍k gôapún ê Tâioânlâng
真緊恢復原本ê台灣人
Tâioânlâng púnlâi ê bīnhêng
台灣人本來ê面形
Tâioânlâng púnlâi ê chhùihêng
台灣人本來ê嘴形
Tâioânlâng púnlâi ê chengsin
台灣人本來ê精神

Putkò, góa mā sī chin kiaⁿ
不過，我mā是真驚
kiaⁿ góa bô sêng Tâioânlâng
驚我無sêng台灣人
Kàu sî Tâioânlâng ē bô beh jīntông góa
到時台灣人會無beh認同我
Kóng góa íkeng m̄ sī Tâioânlâng
講我已經m̄是台灣人
Góa chiū kóaⁿkín khì bé kúi'á táⁿ
我就趕緊去買幾á打
Kokhêng kokchōng ê chhùiam
各形各狀ê嘴掩
Ta̍kkang tī kiàⁿthâu cheng liānsi̍p kòa
Ta̍k工tī鏡頭前練習掛
Kòa hō͘ ū chi̍ttiám'á sêng “thânglàuia”
掛hō͘有一點á sêng「唐老鴨」
Ū chi̍ttiám'á sêng Ji̍tpún jímchiá
有一點á sêng日本忍者
Ū chi̍ttiám'á sêng gōakhoiseng
有一點á sêng外科醫生
Ū chi̍ttiám'á hoe
有一點á花
Ū chi̍ttiám'á sekchhái
有一點á彩色
Koh jīnchin liānsi̍p kóng ōe
Koh認真練習講話
Kóng hitkhoán Tâioânkhiuⁿ ê
講hit款台灣腔ê
“thâioankô͘î”
「台灣國語」
Beh hō͘ kakī lú lâi lú sêng
Beh hō͘家己愈來愈sêng
Tâioânlâng
台灣人
2003/6/1 Harvard