《歷史上ê主耶穌》

 | | | 轉寄

第五章_1 約瑟kah馬利亞聖家

作者 杜英助 台譯：Lîm Chùnio̍k 2020.03.29

1） 約瑟（耶穌ê養父）ê家譜（馬太1：1～17）
耶穌ê家譜tùi祂ê養父約瑟chit pêng來算，kantaⁿ tùi亞伯拉罕算起到耶西生Tabi̍t有14代；Tabi̍t tùi烏利亞ê bó͘生所羅門算起到約西亞生耶哥尼雅mā有14代；tùi偤大國亡國偤大人被掠到巴比倫了後，自耶哥尼雅生撒拉鐵到約瑟mā有14代。

Tī chit 3个14代共42代中ê族譜內面，若是咱m̄ bat chiahê人物是啥人？讀tio̍h chiahê人物ê名真正是淡薄á趣味都無，無人ē認為上「chiok精采、真有趣味！」當阮teh讀聖經ê時，讀tio̍h chiahê咱平常根本無看過ê人物，tī聖經歷史mā真少提起ê人名ê時，你kám ē停落來想看māi？真chē人讀ê時lóng是讀一人跳過一人，讀過頭14代koh跳過另外一段ê 14代，讀tio̍h siōng尾出現約瑟ê名ê時，chiah想tio̍h約瑟ê故事來。

M̄ koh，咱細讀偤太人非常重視民族血統ê純正性ê時，親像亞伯拉罕到迦南地ê時，為tio̍h幫以撒娶bó͘，to̍h ài叫伊ê老奴僕tńg來到美索不達米亞ê拿鶴（亞伯拉罕ê兄弟）ê城，哈蘭（tī今á日土耳其ê東南部，oá近幼發拉底河）去chhōe同族（亞蘭人）彼土利（拿鶴kah密迦所生ê kiáⁿ）ê chabó͘ kiáⁿ利百加（容貌非常美麗），來做以撒ê bó͘。以撒kah利百加生一對雙生á，以掃kah雅各；以掃娶迦南本地ê chabó͘ gín'á做bó͘，一娶to̍h娶兩个赫人ê chabó͘ kiáⁿ做bó͘，chit二个赫人ê新婦tiāⁿtiāⁿ hō͘以撒kah利百加「心內大憂悶」（創世記26：34、35）。Á雅各到老母利百加ê後頭厝牧羊ê時，就ánne娶利百加ê阿兄拉班（雅各ê阿舅）所生ê一對姊妹利亞kah拉結做bó͘。

為tio̍h kah正統ê血親結婚，tī古代社會是一種非常普遍ê傳統，包括帝王ê傳承、王位無外傳，所以，王子大多數lóng是kah kakī ê親姊妹結婚，來保持正統ê帝位，真少有例外，m̄ koh m̄是無。親像雅各有12个kiáⁿ，約瑟hō͘ in阿兄出賣到埃及，當伊tùi奴隸ê身分高升做埃及ê首相ê時，法老王to̍h安排安城（to̍h是現今ê開羅）ê祭司波提非拉 ê chabó͘ kiáⁿ亞西納hō͘ 約瑟做bó͘，為約瑟生二个kiáⁿ，to̍h是瑪拿西kah以法蓮；當雅各（以色列）年紀老邁ê時，伊特別叫約瑟ài kā伊chit兩个kiáⁿ chhōa到伊面前，伊就kā in chim嘴，kā in抱，用倒手hōaⁿ tī大kiáⁿ瑪拿西ê頭殼頂面，用正手hōaⁿ tī以法蓮ê頭，來為約瑟ê kiáⁿ祝福（創世記48章）。

當約書亞chhōa以色列人tńg來到上帝應允hō͘ 亞伯拉罕ê迦南地ê時，約書亞mā按照摩西所指示ê分配圖kā中部siōng美好ê土地一塊分hō͘ 瑪拿西，一塊分hō͘以法蓮；當in tńg來迦南地ê時，chit兩个kiáⁿ ê kiáⁿ孫mā按照約瑟ê吩咐，kā伊ê遺體（真可能已經按照埃及ê慣例製作為木乃伊）帶tńg來示劍ê所在安葬。

【註：約瑟做埃及宰相ê時，埃及ê法老是遊牧民族希克索人，m̄是埃及人；希克索人kah希伯來人仝款是近東ê遊牧民族，真可能是近親á是遠親，所以約瑟kah安城ê祭司（非埃及人神廟ê祭司，伊ê職位可能kah撒冷王麥基洗德祭司類似）ê chabó͘ kiáⁿ結婚，mā有血緣關係】。

摩西kah米甸人ê祭司葉忒羅ê chabó͘ kiáⁿ西坡拉結婚，mā是生兩个kiáⁿ，名叫革舜kah以利以謝；葉忒羅應該mā是牧羊民族ê祭司，聖經講：「摩西ê丈人葉忒羅kā燒祭kah別款ê祭獻hō͘上帝。亞倫kah以色列ê長老lóng來，tī上帝ê面前，kah摩西ê丈人做伙食。」（出埃及記18：12）。所以綜結來講，約瑟ê丈人、摩西ê丈人kah撒冷王麥基洗德，應該lóng是耶和華上帝ê祭司；以色列人認為kah上帝ê祭司ê chabó͘ kiáⁿ結婚，thang看做是有血緣關係ê親chiâⁿ！

M̄ koh tī耶穌ê家譜中，卻真意外出現四个外邦chabó͘ gín'á ê特例，而且chit四个外邦chabó͘ gín'á中間有3个有妓女á是淫婦ê身分；照摩西十誡，chit三个婦女lóng應該hō͘ 人用石頭tìm死ê，m̄ koh她們ê「臭名」竟然列tī耶穌聖家ê族譜中，你講奇怪不奇怪？它ê原因tī tó位？Τī chit中間一定有安藏上帝特別ê奇異恩典tī其中，chit四个屬tī外邦chabó͘ gín'á ê人名如下：

11她瑪：她瑪是tòa tī迦南地ê亞杜蘭人，是迦南chabó͘ gín'á。Tī約瑟hō͘ in兄哥賣去埃及以後，伊ê大兄mā to̍h是雅各ê大kiáⁿ偤大kah迦南chabó͘ gín'á書亞結婚。偤大ê大kiáⁿ珥tī基悉ê時iáu kah迦南chabó͘ gín'á她瑪結婚，因為珥tī耶和華ê眼中看做是pháiⁿ，耶和華to̍h kā伊thâi死（創世記38：7）；按照近東ê慣例：阿兄娶bó͘，死後無kiáⁿ，小弟有責任kah兄嫂同房，為阿兄生後代，m̄ koh，珥ê小弟俄南雖然聽從父命kah兄嫂同房，卻m̄肯為阿兄生kiáⁿ做伊ê後代，就洩精tī地上，被耶和華thâi死；偤大ê第三kiáⁿ示拉長大mā無娶她瑪做bó͘。所以，當她得tio̍h消息講偤大beh去亭拿ê時，她便坐tī往亭拿路中ê伊拿印城門口，蒙面偽裝做妓女。偤大tī城門看tio̍h她，認為她是妓女，自動邀請她講：「來！Hō͘ 我kah你同房。」結果，兩人同房了後，她瑪就tùi偤大懷孕生一對雙生á。

此舉hō͘ 偤大發見，偤大認為她瑪既然「因行淫來懷孕」就beh照當時ê法令「Kā她拖出來，kā她燒死！」M̄ koh，當她hông khiú出來ê時，她mā the̍h出證物出示她本來to̍h是kah她丈夫ê老父有娠ê，卻m̄是kah別ê chapo͘人同床有娠ê；chit件醜聞雖然m̄是合法，m̄ koh照當時ê奇俗來看卻被容允，所以，偤大to̍h無kā她燒死，顛倒承認講：「她比我koh khah有義，因為我無kā她hō͘ 我ê kiáⁿ示拉。」（創世記38：26）；按照迦南當地ê禮俗，chabó͘ kiáⁿ若無法度得tio̍h適合近親ê對象，to̍h是thang容允kah kakī ê生父同房傳後。

亞伯拉罕ê姪á羅得離開所多瑪，伊ê kiáⁿ婿iáu未親近kakī ê未婚妻，無kah伊離開所多瑪，死tī火災。羅得ê bó͘ koh因為「tī伊後面回頭一看，to̍h變成一條鹽柱。」無法度koh生chapo͘ kiáⁿ hō͘ kakī ê chabó͘ kiáⁿ做丈夫，就ánne伊兩个chabó͘ kiáⁿ（iáu未親近chapo͘人）to̍h叫老父lim酒了後kah她同房；chit種兩个chabó͘ kiáⁿ lóng tùi老父存留kiáⁿ孫，to̍h是摩押kah便亞米（koh名叫亞捫），這mā是當時ê禮俗認為理所當然ê tāichì。因為ánne，偤大kah新婦生kiáⁿ，偤大照當時傳宗接代ê禮俗來看，伊chiah ē承認伊ê新婦她瑪比伊koh khah有義，chiah無kā她燒死！

12 喇合：她是迦南地耶利哥古城ê妓女（廟妓）。因她掩蓋約書亞所派去ê兩个青年探á，soah被約書亞容允她kah她父家ê人lóng ē tàng tòa tī以色列中保存性命（約書亞記第2、6章）；後來以色列人撒門kah喇合結婚，生Tabi̍t王ê阿公波阿斯。奇哉！外邦chabó͘ gín'á又koh是妓女，伊ê名mā被列tī耶穌聖家ê族譜中。依一般「聖君」ê族譜追查，kám有可能出現chit種記載？

13 路得：她是摩押ê chabó͘ gín'á，應該是以色列人ê遠親，m̄ koh嚴格講起來，以當時ê國情來看，她是以色列ê外邦人；所以拿娥米kah丈夫以利米勒ê第二kiáⁿ基連tī摩押地避難ê時，kah當地摩押chabó͘ gín'á路得結婚，雖然m̄是合法卻合情合理。M̄ koh，事kah願相違背，拿娥米kah丈夫、kiáⁿ兒為tio̍h閃避饑荒，遠離故鄉伯利恆，顛倒無法度救丈夫kah kiáⁿ兒，in到摩押異邦thàn食，父kiáⁿ二代，lóng是chheⁿ屍死。所以，拿娥米便決定遷tńg來伯利恆依親。當時，路得chit位新婦對take拿娥米特別有情、有孝，koh相óa靠，講：「M̄ thang催我tńg去，mài跟tòe你…你ê國to̍h是我ê國；你ê上帝to̍h是我ê上帝…。」（路得記1：16～17）有chit種認同kah共識，就ánne，拿娥米就chhōa路得tńg來伯利恆，而且tī親族中替她安排kah波阿斯結婚，chhōe tio̍h理想ê歸宿。

兩人成親以後生俄備得，俄備得生耶西，耶西生Tabi̍t；馬太記錄耶穌基督ê家譜一開始to̍h講：祂是「亞伯拉罕ê kiáⁿ孫，Tabi̍t ê kiáⁿ孫，耶穌基督。」（馬太1：1），所以，耶穌基督是以色列人ê君王，mā是外邦人ê救主！其實tùi他拉ê後代來看，路得kah波阿斯lóng是一家親。

14 拔示巴：她是Tabi̍t王ê忠臣赫人烏利亞ê bó͘，容貌非常美麗，tòa tī王宮ê隔壁。烏利亞若m̄是Tabi̍t王ê忠臣á是侍衛兵，是絕對無可能tòa tī王宮ê厝邊；m̄ koh，當烏利亞tio̍h奉命追隨約押統帥去攻打亞捫人ê時，Tabi̍t王卻留tī耶路撒冷無領軍出征。聖經講：少年時chūn ê Tabi̍t hō͘ 撒母耳先知膏立為王ê時，「伊是赤色，目chiu 清秀，生做好看。」而且「心內敬畏耶和華上帝」，所以，耶和華就指示撒母耳先知講：「Chitê人to̍h是，你起來kā伊抹油。」（撒母耳記上16：12）。聖經雖然肯定Tabi̍t是「合上帝心意ê王」，當伊kah掃羅王ê次女米甲結婚了後，tī逃難ê時，為tio̍h活leh起見，koh娶拿八ê未亡人亞比該kah亞希暖做bó͘（撒母耳記上25：40、43）；當時掃羅已經kā伊ê chabó͘ kiáⁿ米甲，to̍h是Tabi̍t ê bó͘ 改嫁hō͘ 帕提。後來Tabi̍t tī希伯崙做王ê時，koh續娶基述王達買ê chabó͘ kiáⁿ瑪迦、哈及、亞比她、以格拉等等六个bó͘ 做皇后，總共生：暗嫩、基利押、押沙龍、亞多尼雅、示法提雅、以特拉等等6个kiáⁿ兒。

Tabi̍t王是一个精力充沛ê戰士，到中年以後身軀ê精力猶原真充足，無法度控制情慾。所以tī黃昏ê時，tī耶路撒冷王宮ê厝頂陽台頂散步，無意中看tio̍h厝邊一位「容貌非常美麗」ê婦人teh洗身軀，to̍h派使者去kā她接來kah她同房，結果有娠；chit位美麗ê婦人to̍h是伊ê忠心侍衛烏利亞ê bó͘ 拔示巴。為tio̍h掩蓋chit件醜聞，Tabi̍t終其尾設計「借刀殺人」ê陰謀，hō͘ 烏利亞tī敵陣面前被害，chiah koh再娶伊ê bó͘ 拔示巴做王后。Chit件見笑tāi hō͘ 先知拿單知影，巧用譬喻逼Tabi̍t王認罪懺悔chiah得上帝赦免。M̄ koh，伊kah拔示巴同房所生ê kiáⁿ ê性命卻因為伊犯罪來死。Tī chia Tabi̍t王共犯十誡中ê「殺人」kah「姦淫」二罪，實在應當依誡命律例ê法規kakī處死。M̄ koh，因伊為tùi心內徹底悔改求上帝憐憫、赦免；chit項tāichì是歷代君王絕對做bē到ê tāichì，所以，聖經chiah ē肯定伊猶原是「合上帝心意」ê王。

話講Tabi̍t王ê後代kiáⁿ孫，歷任偤大國ê國王mā lóng無一定lóng做領導人民敬畏上帝ê好王；有kóa國王甚至背離上帝，向跪拜偶像ê埃及法老靠óa，koh拜迦南地ê神明，致使偤大國終其尾hō͘ 巴比倫國王尼布甲尼撒王消滅。末代國王西底家因為「伊背叛，硬伊ê頷頸，固執伊ê心，m̄歸順上主—以色列ê上帝。」（歷代志下36：13）所以，耶和華hō͘ 巴比倫人來消滅偤大國，tī利比拉kā西底家王ê kiáⁿ兒thâi死，koh挖伊ê目chiu，kā伊帶到巴比倫囚禁。（註：耶穌ê家譜無記西底家ê名）

是án怎耶穌基督ê家譜，ē出現chiahê真khiapsì ê人物？Τī暗中想講一定藏有上帝做人m̄知ê美意！

根據歷史ê探討：耶穌ê養父約瑟是「義人」，m̄ koh，伊無kah馬利亞同房，耶穌to̍h降生à。Tī約瑟娶馬利亞做bó͘ chìn前，根據史料ê記載：伊kah前bó͘（未記名）已經生四个kiáⁿ兒，to̍h是雅各、約西、偤大、西門（馬可6：3）kah二个無名ê chabó͘ kiáⁿ（福音書kantaⁿ記她們是耶穌ê姊妹）；當耶穌被釘十字架ê時，除了聖母馬利亞以外，in lóng無在場。M̄ koh tī耶穌koh活以了後，in chiah相信耶穌是性命ê主，因為ánne被列入tī信徒ê行列中（使徒行傳1：14），大兄雅各koh做耶路撒冷教會ê主教á是長老（使徒行傳12：17、21：18，加拉太1：19、2：9、12），甚至tī耶路撒冷，tī公元後70年聖城被毀chìn前，tī城內為tio̍h見證耶穌koh活來殉道；殉道前bat寫一本新約聖經中ê雅各書。