《歷史上ê主耶穌》

 | | | 轉寄

第六章_三　耶穌ê早年生活

作者 杜英助 台譯：Lîm Chùnio̍k 2020.05.24

三、參與建設加利利ê首府
話講，當耶穌11歲（公元6年）ê時，tī加利利ê加瑪拉（Gamala)有一个名叫偤大ê激進份子，因為不滿羅馬皇帝奧古斯都koh再做戶籍登記，hō͘ 偤太人一再徵收重稅，就煽動偤太人民起來反抗羅馬政府（使徒行傳5：37），跟tòe伊ê人lóng被羅馬兵thâi死滅亡à。Chìn前，tī大希律王往生了後，tī加利利mā有一位名叫杜達ê人出現，自命不凡，mā集合400名壯丁攻打羅馬兵，反對in鎮壓偤太人向希律王做羅馬政府ê走狗，徵收重稅hō͘ 羅馬皇帝使用soah被thâi(使徒行傳5：36）。因為偤太人tiāⁿtiāⁿ反抗羅馬政府ê暴政，所以為tio̍h beh平定偤太人叛亂，奧古斯都就下令kā加利利ê一座堅固ê大城吉坡里（Zippori)，又名叫做賽弗里斯城（Sepphoris)拆毀à。

Κoh講，耶穌ê老父約瑟tī細細ê拿撒勒村裡，是一位有名ê木匠；當加瑪拉ê偤大起義反抗羅馬政府ê時，因為人少抵抗bē過羅馬強大ê軍隊soah被掠，附從伊ê偤太人同時被一網打盡，á是四散逃走，被掠tio̍h ê人一律hō͘ 羅馬兵釘十字架。因為約瑟是木匠，雖然伊無參加反抗羅馬政府，m̄ koh，伊卻被掠去製作十字架hō͘ 羅馬兵使用。根據歷史學家講：當約瑟tī厝裡被羅馬兵掠去了後，耶穌非常驚老父受害，就ánne偷偷á跟tòe tī後面去暗中偷看，究竟ē發生啥物不幸ê tāichì；m̄ koh想bē到，羅馬兵強迫約瑟製作十字架了後，chiahê官兵竟然用hiahê十字架去釘死kakī ê同胞。

當時，偤太人ê歷史家約瑟夫描述羅馬兵beh釘死加瑪拉 ê偤大叛徒ê時，是kā伊ê衫褲thǹg掉，先用有鐵鉤ê鞭索á是皮鞭kā伊重重鞭phah 39下（40下減一下），皮肉裂開，chheⁿ血chho̍pchho̍p滴；m̄ koh，受刑人kantaⁿ ē tàng痛苦大叫，m̄敢開嘴大罵，若無，ē受koh khah嚴重ê痛phah，了後koh再kā犯人送去絞刑、火刑、斬首á是釘十字架。實在chiok恐怖！少年ê耶穌，暗中偷看老父製作十字架hō͘ 羅馬兵kā偤太人處決ê時，心內深覺痛苦難忘；莫怪當祂tī客西馬尼園知影祂因為beh為世人贖罪，做「上帝ê羊羔」beh為罪人獻祂ê聖體ê時，ē體會tio̍h「giâ十字架」tú親像lim「苦杯」仝款痛苦。

一向關心耶穌ê馬可，tùi晚餐樓跟tòe耶穌到客西馬尼園ê時，看tio̍h耶穌跪leh三pái向父上帝祈求講：「阿爸天父ah，祢萬事lóng ē，願祢hō͘ chitê杯離開我；總是，m̄是照我所意愛，tio̍h照祢ê旨意來實現。」（馬可14：36）ê時，祂ê心內會憂傷、悲痛，血汗ná流湧出。 約瑟夫講：hō͘人認為是羅馬政府ê叛徒加瑪拉 ê偤大，tī公元6年起初反抗羅馬皇帝ê時被羅馬兵釘十字架慘死；無gōa久，伊ê二个kiáⁿ兒為老父復仇koh做伙被掠tio̍h，mā是hō͘釘十字架處決，以向偤太人警戒。

偤太人tī加利利ê城市吉坡里被羅馬兵拆毀了後，希律安提帕tī 10年後，約公元16年左右tī吉坡里koh大興土木，重建新城；就tī chit時，約瑟to̍h chhōa耶穌做伙去參與chit座新城ê重大建設。做木匠ê工人，同時mā ài做石匠ê工作，hit時，約瑟已經50 gōa歲了，可能因工作過勞來死。

為tio̍h建設吉坡里新城，希律安提帕不得不tī伊統治ê加利利向人民koh再徵收重稅，所以，為希律徵收稅金ê偤太人抽稅ê人，真正是hō͘一般人民痛恨入骨；繳bē出稅金hō͘ 希律安提帕ê sànchhiah人，tiāⁿtiāⁿ koh khah向財主á是向政府借錢繳稅，借錢利息是100％，穀物是25％。無力坐額ê時，家庭ē破產。農田被拍賣iáu無夠坐額高利貸ê時，連kiáⁿ兒mā ē hō͘ 財主、債主賤價抵債，á是被買收做奴隸，á是做性奴，受逼為娼。

根據真chē歷史學家ê探討、研究報告ê資料指出：Τī公元27年熱天，有一个抹大拉 ê馬利亞，她ê老父是sànchhiah掠魚人兼作穡人，因為向財主借錢繳稅，一時家庭經濟發生缺欠，老父不得不koh再向一位財主借錢生活，後來債務加上利息滾絞，本利年年增加；所以，少年花貌ê少女抹大拉 ê馬利亞不得不被債主chhōa走來還債。Chit位債主ài財ná命，chhōa走馬利亞以後，逼她為娼。本來個性純樸，面貌清秀ê良家少女被真chē食飽思淫ê富家少爺sńg弄感情了後，精神錯亂，甚至被7个垃圾鬼附身拖磨，流浪tī吉坡里好額人ê街頭，流目屎，悽慘哭，無助ê時，當時耶穌tú出來傳道，一看tio̍h chit位可憐ê偤太少女ê悲情，禁bē tiâu生起憐憫之心，kā她身上ê 7个垃圾鬼趕走。路加bat tùi耶穌早期ê門徒彼得聽tio̍h伊講chit位抹大拉 ê馬利亞ê故事；m̄ koh tī她跟tòe耶穌ê時，路加為tio̍h保護她ê清譽，tī故事中並無透露她ê名。

路加轉述彼得ê見聞講：有一个法利賽人因為某事請耶穌kah伊食飯，耶穌就到hitê法利賽人厝裡（tī吉坡里ê富有家庭）同坐桌；hitê城裡有一个chabó͘人（抹大拉 ê馬利亞，隱名無講），是一个罪人（hō͘ 人看做是淫婦，mā無講出來），知影耶穌tī法利賽人厝裡坐席（因為sńg弄她感情ê人lóng是富家少爺，所以，她知影chitê人ê家庭tī甚麼所在。）就the̍h貯滿香膏ê玉瓶（kah人作樂ê時用ê？是富家少爺送她ê？Á是kakī購買ê？無講清楚。）khiā tī耶穌ê kha脊後，óa tī祂ê腳前哭（受主ê疼感動），目屎滴tâm耶穌ê腳，就用kakī ê頭毛ka擦乾，koh用嘴連續親祂ê腳，kā香膏抹起lih。

請耶穌食飯ê法利賽人（路加mā是kā伊隱名）看見chit項事，心內to̍h自言自語講：「她是一个罪人ah！」（因為伊認bat馬利亞平常時teh出賣靈肉thàn錢），「Chitê人（指耶穌，mā隱名不講）若是先知，一定知影摸祂ê是啥人，是一个án怎ê chabó͘人（伊無kā她ê名講出來！），她是一个罪人ah！」耶穌知影hit位請伊食飯ê法利賽人心內teh想啥物（一下to̍h看出伊ê表情），就回應伊講：「西門（直接叫伊名），我有話beh對你講。」西門講：「老師，請講。」

耶穌講：「有兩個人欠某一个債主ê錢，一个欠五百个銀幣；一个欠五十个銀幣，因為in無力坐額，債主就開恩赦免in兩個人ê債。Ánne，chit兩个人tó一个koh khahthang伊？」西門回答：「我想是hitê受赦免khah chē ê人。」耶穌對伊講：「你ê判斷bē bái。」

就ánne，耶穌oat過來ǹg hitê chabó͘人（mā無講出她ê名），對西門講：「你kám有看見chitê chabó͘人?我入去你ê厝，你無hō͘ 我水洗腳（洗塵，偤太人迎客之禮俗），m̄ koh，chitê chabó͘人用目屎滴tâm我ê腳，koh用頭毛擦乾（kám ē是無緣無故！）；你無親我，m̄ koh，chitê chabó͘人tùi我入來to̍h 無停親我ê腳（表示心內ê感激）；你無用油抹我ê頭，m̄ koh，chitê chabó͘人用香膏抹我ê腳（表示受恩回報）。所以，kā你講，她真chē ê罪lóng得tio̍h赦免（心內得tio̍h完全ê醫治，因為她愛ê chē；á hitê得tio̍h赦免khah少ê，疼就khah少。」

就ánne，耶穌對hitê chabó͘人（猶原保密）講：「你ê罪lóng赦免。」同席ê人心內講：「這是啥物人，竟然赦免人ê罪？」耶穌對hitê chabó͘人（一直保密）講：「你ê信救你，做你平安tńg去！」（詳見路加7：36～50）

當抹大拉 ê馬利亞ê「罪」因信kah疼得tio̍h耶穌赦免以後，路加chiah講：耶穌周遊各城各鄉傳道，宣講上帝國度ê福音kah祂做伙去ê有12个使徒（門徒去傳福音，to̍h成做使徒），iáu有bat hō͘ 邪靈附身，hō͘ 病纏身已經醫好ê幾个婦女，其中有稱做抹大拉 ê馬利亞，bat有7个鬼tùi她身chiūⁿ趕出來…。In為tio̍h感謝耶穌，lóng是用kakī ê財物供給耶穌kah使徒（路加8：1～3）。

耶穌另外二个門徒馬太kah馬可lóng有記載，耶穌kah門徒tī Poâⁿ過節ê前兩工，受邀到伯大尼ê癩ko病人（bat hō͘ 耶穌醫好）西門ê厝裡食飯ê時，有一个chabó͘人（mā隱名無講）the̍h一个玉瓶貯極貴ê香膏來，趁耶穌坐席ê時，lâm tī祂ê頭殼頂面，耶穌知影她是為祂受死埋葬來事先做預備ê；所以，耶穌oló她ê作為是「一件美事」（馬太26：10、馬可14：6），按照一般聖經學者認定：Chit位chabó͘人mā是抹大拉 ê馬利亞；tī Poâⁿ過節ê前6天，準備香膏為耶穌抹腳ê chiah是有具名講，她是伯大尼ê馬利亞—她是馬大ê小妹，拉撒路ê阿姊。（約翰12：1～8），m̄ koh hit pái由啥人請客，約翰就ánne無具名，kantaⁿ講：「有人tī hia為耶穌預備宴席；馬大服侍，拉撒路mā tī中間，馬利亞就ánne the̍h一斤極貴ê純哪噠香膏，抹耶穌ê腳。（約翰12：1～13）

抹大拉 ê馬利亞，被耶穌醫好赦罪以後，真正是一位知恩、感恩、報恩，tùi心內深深ê所在心疼耶穌ê婦女；她一生bat三pái準備極貴重ê香膏抹耶穌，m̄ koh，第三pái耶穌已經tùi死koh活。因為她ê疼kah感恩，耶穌koh活ê早起時，tāi先向她顯現！（約翰20：11～18）