《歷史上ê主耶穌》

 | | | 轉寄

第七章_1.2 Τtī約旦河傳道ê行洗禮約翰

作者 杜英助 台譯：Lîm Chùnio̍k 2020.05.31

（公元前5年九月～公元26年）

一）行洗禮約翰ê父母
老父：撒迦利亞是利未人，tī希律王ê時代，是耶路撒冷聖殿亞比雅班（24班中ê第8班祭司ê班長）中ê一个祭司（擔任祭司長）。

老母：伊利莎白是亞倫ê後代，是耶穌ê老母馬利亞ê阿姨；根據史料所記，馬利亞ê老母安妮kah老父希里（Tabi̍t ê kiáⁿ孫）早往生，所以，馬利亞自細漢to̍h寄養tī伊利莎白ê厝裡，hō͘ 阿姨扶養長大，親chiâⁿ關係非常密切。

二）行洗禮約翰ê出世地—隱加琳（Ein Karem)
行洗禮約翰ê老父撒迦利亞是耶路撒冷聖殿ê祭司，m̄ koh，祭司無一定lóng tòa tī城內；根據史料考證，有kóa祭司是tòa tī耶利哥，撒迦利亞to̍h是tòa tī耶路撒冷西南pêng約6公里遠ê一个山區名叫隱加琳，一个大出葡萄kah橄欖ê山莊。Tī第五世紀chìn前，tī chit所在to̍h有一kóa小聖堂（記念禮拜堂）存在。

路加講：當馬利亞順服天使長加百列向她傳達ê信息，受聖神感孕ê日子，她to̍h起身趕緊往內山到底去，來到偤大ê一座城（tùi拿撒勒到隱加琳，兩地相離約60 gōa公里），進入撒迦利亞ê厝，kā伊利莎白請安（路加1：39～40）。

Tī隱加琳ê村裡有一个水泉，傳說講馬利亞來到隱加琳ê時，tāi先tī chia tú tio̍h她ê阿姨伊利莎白，所以，chit所在ê泉水號名叫做「馬利亞之泉」；續落來，伊利莎白to̍h接馬利亞到她ê厝。當她聽tio̍h馬利亞向她請安ê時，她（伊利莎白）所懷ê胎（行洗禮約翰）一聽tio̍h馬利亞（耶穌ê老母）ê請安，to̍h tī老母ê腹肚內iáu未出世ê時，雖然無看tio̍h面（嬰á耶穌）to̍h已經熟sāiā（kahná bat熟sāi!）。

Tī隱加琳ê村裡，有一座主要ê教堂，叫做探訪教堂（the Church of the Visitation)，標示馬利亞探訪伊利莎白ê時tī chia tòa三個月；教堂土kha層ê聖堂內有三幅大ê聖畫：
1）馬利亞探訪伊利莎白，兩人相見歡喜ê情景。
2）希律王下令屠殺2歲以下ê嬰á ê時，伊利莎白kā行洗禮約翰掩蓋 tī一塊大石後面，chiah免得hō͘ 希律王ê阿兵哥殺害。
3）撒迦利亞tī聖殿ê聖所ê香壇前獻香祈禱。

Tī chit所在有一塊石頭，相傳to̍h是小行洗禮約翰藏身ê所在；聖堂ê一角iáu有一个泉水井，chitmá iáu有清涼ê泉水提供hō͘ 人chheⁿlim。

聖堂ê二樓有真chē非常美麗生動ê藝術壁畫，描述聖母馬利亞ê故事kah聖天使對馬利亞ê歌頌。Á教堂正面有一面壁堵，tī壁面鑲嵌真chē無仝文字ê馬利亞tī chit所在ê尊主頌：「我ê心神尊敬主做大，我ê心神因為救我ê上帝來歡喜。因為祂看顧女婢ê卑微。Tùi taⁿ以後，萬世代ê人lóng會講我有福氣。…。」（《全民台語聖經》路加1：46～55）

Tī隱加琳村裡siōng主要ê教堂名叫「行洗禮約翰教堂」（the Church of St. John the Baptist)。Tī教堂內有一个地陷khaê小禮拜堂，相傳chit所在to̍h是行洗禮約翰出世ê地點。教堂ê地下室是撒迦利亞ê厝；教堂內ê正堂mā有一kóa聖畫。親像：行洗禮約翰為耶穌行洗禮ê油畫，見證耶穌是基督kah上帝ê羊羔、除往生人ê罪孽ê名畫等等。

Tī行洗禮約翰教堂正頭前ê一片大壁堵，mā有用真chē無仝國家ê文字寫撒迦利亞ê頌詞：「Tio̍h oló主，以色列ê上帝！ 因為祂有看顧koh救贖祂ê子民。 69 有tùi祂ê奴僕—大衛ê家，替咱設立有大能ê救主。」（《全民台語聖經》路加1：67～79）