《歷史上ê主耶穌》

 | | | 轉寄

第七章_5.6 Τtī約旦河傳道ê行洗禮約翰

作者 杜英助 台譯：Lîm Chùnio̍k 2020.06.14

五）行洗禮約翰ê傳道工作情形

1）伊tī約旦河外ê伯大尼（chitmá屬約旦國）為人行洗禮。當時偤大曠野kah約旦河外ê所在，比利亞lóng屬希律安提帕分封王所管轄ê區域。

2）行洗禮約翰30歲出來傳道ê時間是羅馬帝國皇帝提庇留第15年。本丟彼拉多做偤太總督（巡撫），安提帕做加利利ê分封王，to̍h是公元26年。

3）傳道ê信息：
31 宣講悔改ê洗禮，hō͘ 罪得赦（路加3：3）。
32 為悔改者指示應當做啥物tāichì？親像：
a）有兩領衫褲ê tio̍h分hō͘ hiahê無ê。
b）有食物ê，mātio̍h分hō͘ hiahê無ê。
c）抽稅ê人除了例定ê數目，m̄ thang加抽。
d）兵丁bē sái強暴待人，mā m̄ thang kā人詐欺，有錢糧tio̍h知足。

Chiahê教導lóng是tī昆蘭社區過共同生活，互相分享財物ê修道者ê善行kah美德，mā是大家共同遵守ê生活規範，包括悔改潔身ê洗禮ê禮儀，lóng kah昆蘭社區所施行ê淨身禮儀息息相關；所以一般學者lóng認定，行洗禮約翰出來傳道chìn前tī曠野生活長大，一定是kah昆蘭社區ê修道者做伙生活、成長。

4）做基督ê先鋒，tī曠野修直主ê道路，為耶穌做見證。當伊看tio̍h耶穌行óa來伊身邊ê時為主做見證，向眾聽眾講：「看ah！上帝ê羊羔，除去世人罪孽ê。」耶穌行óa來ê時，雖然伊知影耶穌聖潔無罪，m̄免悔改受洗，m̄ koh tī耶穌beh為信眾留落來良範ê要求下，行洗禮約翰終其尾為耶穌行洗禮，而且紹介伊名下ê二个門徒約翰kah安得烈去做祂ê門徒；因為伊知影，tī耶穌出來傳道以後，耶穌必興旺，á行洗禮約翰ê工作to̍h ē漸漸減少！

六）行洗禮約翰傳道ê時來受洗ê群眾

1）有tùi耶路撒冷法利賽人差來ê祭司kah利未人：Ιn kah行洗禮約翰ê關係siōng親近，mā siōng密切；因為行洗禮約翰ê老父原來to̍h是聖殿ê祭司長，á利未人tī聖殿á是地方會堂裡in lóng是拉比（宗教教育ê老師），in聽tio̍h行洗禮約翰出來傳道，為人行洗禮，真想beh知影伊究竟是m̄是偤太人所期待，所thèng候ê「基督」á是「以利亞」先知koh來？（約翰1：19～28）。行洗禮約翰ê答覆是：「我to̍h是tī曠野teh hoah ê聲：Tio̍h為主修直道路，tú親像先知以賽亞所講ê。』」（約翰1：23）。因為ánne，行洗禮約翰tī昆蘭社區kah愛色尼人同齊生活ê時，對以賽亞書m̄ nā真熟，kakī mā真清楚知影伊是啥人？

當行洗禮約翰看tio̍h耶穌來到偤大曠野見伊ê時，伊to̍h向群眾講：「看ah！上帝ê羊羔，除去世人罪孽ê！」Κoh向in做見證講：「我bat看見聖神，kahná粉鳥tùi天降落，tòa tī伊ê身上…我看tio̍h，to̍h證明這是上帝ê kiáⁿ。」（約翰1：29～34）

2）偤太人ê平民、人民：行洗禮約翰tī曠野宣講悔改ê洗禮hō͘ 罪得赦ê時，in期待基督ê來臨，所以出來看，而且聽伊宣講ê信息，想beh確認行洗禮約翰是m̄是基督？當時in lóng悔改、受洗；chiahê人民是tùi偤太全地kah全耶路撒冷來ê，人數真chē（馬可1：5）。這以外，全約旦河地區ê人mā lóng來（馬太3：5）聽行洗禮約翰ê講道，而且接受洗禮。

3）法利賽人kah撒都該人mā來受洗：行洗禮約翰特別向in講：「毒蛇ê種類！，啥人指示lín閃避將來ê憤怒？」（馬太3：7），行洗禮約翰是án怎真嚴厲指責in是「毒蛇ê種類」？真正是大膽！因為in相信伊是先知！

31 法利賽人：In是tī公元前第2世紀成立ê敬虔派ê偤太人。「法利賽」希伯來話ê字義是「分別出來ê」。Tī新約時代，法利賽人ê人數約有6,000人，in主要是社會中層非神職人員ê摩西律法ê信徒，有senglí人kah工匠；in ê特點to̍h是嚴守妥拉（摩西五經）律法kah tùi律法伸長出來ê一套口傳ê律例（古人ê遺傳，馬可7：3～4）。

In非常重視kā妥拉ê誡命應用tī日常生活中，而且tī妥拉四kho͘ 圍起造一座防衛ê牆，所以大家lóng講in是社群中ê「分離者」；法利賽人相信人死後ē koh活（使徒行傳23：8）。Tī羅馬帝國統治下，對Tabi̍t ê kiáⁿ孫彌賽亞ê來臨有抱熱切ê期待。M̄ koh耶穌基督降生，行洗禮約翰向in見證：耶穌是基督，是上帝ê羊羔，又koh是彌賽亞，in卻m̄相信。

In看tio̍h耶穌tiāⁿtiāⁿ kā人治病、趕鬼，甚至hō͘ 死人koh活ê神能kah神跡ê時，顛倒結合群眾kah祭司長引經據典，講：「基督kám是tùi加利利出來ê？經上kiám m̄是講『基督是Tabi̍t ê kiáⁿ孫，出tī Tabi̍t ê本鄉伯利恆』？」（約翰7：42）。當耶穌tī聖殿教導人ê時，祭司長kah法利賽人koh khah叫聖殿ê警衛去掠祂，beh kā祂謀害；佳哉tī法利賽人中iáu有一位見義勇為ê尼哥德慕有異議提問講：「無先聽本人ê嘴供，m̄知伊所做ê tāichì，kám講咱ê律法iáu ē定伊ê罪？」（詳見約翰7：50～51），關係法利賽人kah耶穌之間ê關係kah問題，容允以後koh再解說。

32 撒都該人：In tī公元前166～163年間成立。Tī偤太人中間，in是kah法利賽人互相對立ê偤太教派，屬tī祭司階級ê人，in否定天使kah靈界ê鬼神ê存在，mā否定神跡，尤其m̄相信人死後ē koh活（馬可12：18～27，使徒23：8）；in往往kah偤太人ê公會大祭司結合做伙（使徒行傳4：1、2，5：17）。

In對摩西ê律法是按照字句ta̍k字ta̍k句解說，m̄相信口傳ê律法（古人ê遺傳）。Tī教義信仰方面，in雖然kah法利賽人對立，m̄ koh tī宗教立場，in卻kho͘ 法利賽人óa來，攻擊耶穌kah抽稅ê人；koh因為撒都該人是屬tī社會權貴kah祭司階級ê人，掌握宗教kah政治事務大權。因為in ê大祭司tī偤太人ê公會中掌握大權，所以有權命令祭司長kah民間ê長老以及羅馬兵來掠耶穌去公會受審，而且用宗教法裁定耶穌「講莽撞ê話、褻瀆ê話。」叫來聽審ê群眾決定應該án怎處置自稱做「基督ê耶穌」！因為耶穌koh承認講祂是「上帝ê kiáⁿ」，所以眾祭司長、長老、文士kah公會ê眾議員tī宗教威權壓制下，因為m̄信耶穌ê身分是應驗先知ê預言就lóng判決「祂是該死ê」（馬太26：57～68，馬可14：53～65）。

4）抽稅ê人kah羅馬兵：Ιn lóng是靠勢羅馬政府ê威權來欺負偤太人ê人民ê人，偤太人真痛恨in。尤其偤太人ê抽稅ê人，隨意向人民超徵數倍稅金，hō͘ 人民看做是大罪人。