《歷史上ê主耶穌》

 | | | 轉寄

第十章_一2 耶穌行出加利利

作者 杜英助 台譯：Lîm Chùnio̍k 2020.09.20

2）耶穌對尼哥德慕談重頭生（約翰3：1～21）：耶穌出來傳福音ê時，tāi先到約旦河接受行洗禮約翰ê洗禮，為基督徒加入教會建立一个信仰告白ê典範禮儀。M̄ koh，洗禮是表示一个人悔改、認罪，hō͘ 身軀得tio̍h潔淨，偤太人kā它稱做淨身禮；m̄ koh，心靈beh得tio̍h潔淨，一定tio̍h照耶穌ê指示：「用聖神kah火kā lín行洗禮」（路加3：16）chiah ē tàng徹底「tī基督裡成做新造ê人。」（林後5：17），這to̍h是重頭生ê真理。

約翰講：當耶穌tī耶路撒冷過Poâⁿ過節ê時，雖然有真chē法利賽人看見耶穌所行ê神跡，iáu m̄相信耶穌是彌賽亞—上帝ê Κiáⁿ；m̄ koh，其中畢竟mā有一个法利賽人名叫尼哥德慕，是偤太人ê官（議會ê議員），tī暗時來見耶穌，向祂請教有關上帝國度ê問題；tāi先伊對耶穌尊稱做「拉比」，伊講：「阮知你是tùi上帝hia來做老師ê；因為祢所行ê神跡，若無上帝同在，無人ē tàng行。」尼哥德慕無親像其他ê法利賽人，雖然看見耶穌所行ê神跡卻無願相信耶穌是tùi上帝hia來ê；因為尼哥德慕心內相信，chiah ē tī暗時（因為耶穌日時頭無閒傳道、醫病，暗時chiah有時間歇睏）來見耶穌。

耶穌知影尼哥德慕心內teh想啥物？所以tī伊iáu未開嘴提問chìn前to̍h先kā答案kā伊講：「我實實在在kā你講，人若無重頭生，to̍h無法度見上帝ê國。…人若m̄是tùi水kah聖神生ê，to̍h無法度進上帝ê國。」尼哥德慕聽tio̍h chitê話ê時，心內kahná bat koh kahná m̄ bat，m̄ koh，伊並無懷疑耶穌ê話，究竟tio̍h án怎行chiah ē tàng進入天國？後來耶穌直tú直對伊講：「摩西tī曠野án怎舉蛇，人子mā一定照ánne被舉起來，叫一切信祂ê lóng得永生。」意思是講，beh進入天國得永生ê條件to̍h是tio̍h悔改、認罪、受洗，同時tio̍h信耶穌是tùi上帝hia差來ê真光，beh拯救一切信祂ê人lóng得永生。

感謝上帝！Τī尼哥德慕kah耶穌腳頭u相tú對談了後，伊ê心內koh khah相信耶穌是tùi上帝hia來ê老師。耶穌經過一年後koh再chhōa門徒來耶路撒冷聖殿過Toà棚節，tī節期過了一半，祂koh tī聖殿教導人，眾人lóng驚kah gāng去，講：「Chitê人無學過，án怎hiahni̍h熟sāi經典？」M̄ koh，因為耶穌tī安息日hō͘一个病人得tio̍h醫好，所以，有kóa偤太人就對耶穌受氣，認為安息日bē tàng工作á耶穌卻「明知故犯」，所以想beh謀殺祂。

Tī節期ê siōng尾一工，耶穌koh tī聖殿教導人，向眾人hoah話：「人若渴了，到我chia來lim!信我ê人to̍h是經上所講：『Τùi伊ê腹內ē流出活水ê江河來。』」耶穌chitê話是teh指信祂ê人beh受聖神充滿。當時有人信耶穌是先知，mā有人信祂是基督；祭司長kah法利賽人lóng聽tio̍h耶穌宣講ê福音，尼哥德慕mā tī現場。當in命令聖殿ê警衛kā耶穌掠來審判、定罪、殺害ê時，啥人知當時尼哥德慕非常勇敢挺身出來為耶穌辯護講：「M̄先聽本人ê嘴供，查明伊所做ê tāichì，kám講咱ê律法iáu beh定伊ê罪？」就ánne，祭司長kah法利賽人就kā掠耶穌ê行動暫時按下。

所以，尼哥德慕信耶穌是因為伊聽bat耶穌ê教導，而且相信祂是上帝差遣來到世chiūⁿ ê真光，m̄驚法利賽人侮辱伊、排斥伊；像伊ánne相信耶穌ê人，伊ê信心真正是有「種」！（詳見約翰福音第三章1～21節）