《歷史上ê主耶穌》

 | | | 轉寄

第十章_一1 耶穌行出加利利

作者 杜英助 台譯：Lîm Chùnio̍k 2020.09.13

第十章 耶穌行出加利利 （公元27年～28年）

一）Chhōa門徒到耶路撒冷參加Poâⁿ過節

耶穌chhōa門徒前往耶路撒冷ê途中，tńg來到kakī ê家鄉拿撒勒傳道、醫病，hō͘鄉親看輕、陷害。耶穌脫險了後就行出加利利，落南去耶路撒冷參加Poâⁿ過節ê節慶；tī耶路撒冷停留ê時間約10工左右，發生幾件重大事件如下：

1）潔淨聖殿（約翰2：13～22）：約翰kah耶穌chiūⁿ耶路撒冷，做伙去聖殿，伊講：「耶穌看見聖殿內底有賣牛、羊、粉鳥ê，而且有兌換錢銀ê人坐tī hia，耶穌就the̍h索á做鞭，kā牛羊lóng趕出聖殿外，倒出兌換ê人ê錢銀，推倒in ê桌á，koh對賣粉鳥ê講：『Κā chiahê物件the̍h出去！M̄ thang kā我父ê殿當做買賣ê所在。』」 是án怎耶穌看tio̍h此情此景，心內ē tio̍h急ná親像火teh燒？因為聖殿是敬拜上帝，向上帝祈禱ê聖地；上帝是聖潔ê，所以，敬拜上帝，向上帝祈禱ê所在mā tio̍h聖潔，chiah ē得tio̍h上帝ê歡喜接納。Koh再講，聖殿ê功用m̄是做買賣ê市場，偤太人ê大祭司允准出租聖殿hō͘ 做買賣ê人使用，ē污染聖殿ê聖潔。違背聖殿使用ê功能是無合法ê！耶穌為tio̍h維護聖殿ê聖潔，做合法ê使用，所以kā做買賣ê人趕走；做買賣ê senglí人明知無合法，所以，in雖然繳租金hō͘ 祭司長，m̄ koh in敢受氣，m̄敢動手，kantaⁿ ē tàng kā伊ê苦衷不滿ǹg大祭司吐氣。

耶穌阻礙大祭司收無合法ê稅金，chit項tāichì mā是致使耶穌tī聖殿傳道、醫病kah趕鬼做善事ê時，hō͘ 大祭司、祭司長、祭司kah法利賽人當時四界想beh chhōe耶穌教導人ê話柄，thang好早一點á來謀害祂ê原因；m̄ koh，因為一般偤太人ê人民看tio̍h耶穌所做ê一切善事，對耶穌lóng非常友善，所以，in頭尾m̄敢下手，恐驚發生反效果，顛倒hō͘ 偤太人ê人民反對，soah lóng去跟tòe耶穌。