《歷史上ê主耶穌》

 | | | 轉寄

第十二章_一 耶路撒冷ê Poâⁿ過節

作者 杜英助 台譯：Lîm Chùnio̍k 2020.12.20

（公元30年三月～四月）
一、伯大尼之家（公元30年三月28日禮拜三）
Toà tī耶路撒冷城橄欖山東郊ê伯大尼人，有一kóa家庭是tùi拿撒勒遷徙過來ê；tī chitê庄頭內有一个家庭tòa三个人：馬大、馬利亞kah一个小弟拉撒路，家境小康，父母早to̍h往生。Chit一家人真可能是耶穌tī拿撒勒ê親chiâⁿ，in姊弟三人自細漢kah耶穌tī拿撒勒做伙長大，所以感情真好。In tang時遷來伯大尼tòa？！福音書內面無講清楚；當耶穌chhōa門徒來耶路撒冷過節，teh傳道ê期間，tiāⁿtiāⁿ來tòa tī chitê家庭，接受in親切ê接待。

Tī耶穌chhōa 12个使徒周遊各城各鄉傳道，宣講上帝國度ê福音ê時，tiāⁿtiāⁿ接待耶穌ê婦女有bat hō͘ 邪靈所附kah hō͘ 病症所纏ê以及已經醫好ê幾个婦女，iáu有抹大拉ê馬利亞、希律ê管家苦撒ê bó͘約亞拿kah蘇撒拿，以及真chē別ê婦女，in lóng是用kakī ê財物供給耶穌kah門徒（路加8：1～3）。

當耶穌chit pái來伯大尼chìn前，tī chitê厝裡，祂所疼ê拉撒路病倒；就ánne伊ê阿姊馬大kah馬利亞to̍h趕緊發落人去比利亞約旦河東pêng ê伯大尼見耶穌，講：「主ah，你所疼ê人破病à。」耶穌聽見了後卻講：「Chitê病bē致使死，乃是為tio̍h上帝ê榮光，叫上帝ê Κiáⁿ因為ánne得榮光。」所以，耶穌iáu tī原地koh再tòa兩工，了後chiah對門徒講：「咱koh來去猶太。」當時門徒質問耶穌講：「老師，近來猶太人ài beh用石頭kā祢tìm，祢kám beh koh去hia？」Hit時，耶穌kā門徒講：「拉撒路死去à。我mā為tio̍h lín歡喜，因為我無tī hia是beh hō͘ lín信我；taⁿ咱來去伊hia。」耶穌ê門徒中有一个心內多疑ê多馬聽tio̍h老師ánne講，就真無歡喜地對其他ê門徒講：「咱mā來去，thang kah祂做伙死。」（約翰11：1～16）

是án怎偤太人tiāⁿtiāⁿ想beh the̍h石頭tìm耶穌？因為當時耶穌tī約旦河ê東pêng做真chē善事，而且向眾人講：「我是上帝ê Κiáⁿ」，偤太人卻chhûn心誤認「耶穌講褻瀆ê話」。In kantaⁿ相信耶穌是一个「人」，m̄是「上帝ê Κiáⁿ」（約翰10：31～39）。何況拿撒勒ê鄉親mā m̄相信耶穌是tùi上帝hia差遣來ê，kantaⁿ認定祂是hit位「木匠約瑟ê kiáⁿ」，á是講祂是「馬利亞ê kiáⁿ」而已；因為ánne，耶穌為tio̍h beh hō͘祂ê門徒確信祂是上帝ê Κiáⁿ，祂就對in講：拉撒路已經死à。/咱做伙去伊hia，hō͘伊「tùi死koh活」，因為ánne，「天父上帝kah衪ê Κiáⁿ藉chitê理由來得榮光」。

耶穌chhōa門徒過約旦河去耶利哥城koh tòa tī撒該ê厝過一暝，接受伊熱誠ê接待；離開耶利哥ê當時，拉撒路已經死四工à。當馬大聽見耶穌來à，to̍h隨時去迎接祂，對祂講：「主ah，祢若tī chia，阮小弟就bē死。」耶穌對她講：「你ê小弟ē koh活起來」。而且講：「我是koh活kah活命。信我ê人雖然死去，iáukoh ē活起來； 26 chitmá活teh來信我ê人，永遠bē死。你有ánne信無？」馬大以她對耶穌ê信仰回答耶穌講：「主ah，我信祢是基督，上帝ê Kiáⁿ，是teh beh來世間ê hit位。」馬大對耶穌ê信心比耶穌ê門徒koh khah大。耶穌ê門徒跟tòe祂到chitmá，足足有三年半ê時間，看過耶穌做過真chē善事，行神跡醫病，kantaⁿ稱呼耶穌為「拉比」（老師）。M̄ koh，馬大kantaⁿ tī耶穌來到她厝裡ê時熱誠接待祂，聽tio̍h耶穌ê話to̍h相信耶穌「是主，是基督，是上帝ê Κiáⁿ！」她ê信心真正真大。

當馬大tńg去叫她ê小妹馬利亞講：「老師來ā，祂teh叫你。」，馬利亞聽tio̍h就趕緊走出去耶穌hia，看見耶穌to̍h仆tī祂腳前對祂講：「主ah，祢若tī chia，阮小弟就bē死。」耶穌看見馬利亞teh哭，kah她同來ê偤太人mā哭，就問in講：「Lín kā伊葬tī啥物所在？」In回答耶穌講：「主ah，咱來去看。」耶穌看tio̍h馬大、馬利亞kah偤太人ê心內ánne哀痛，約翰講耶穌流目屎，可見耶穌gōani̍h'á疼拉撒路！

耶穌來到拉撒路ê墓前，hitê墓是一个岩洞，洞內koh分二層，拉撒路ê屍體是khǹg tī底層；墓門用一塊大石頭塞leh，耶穌叫人kā石頭徙開，gia̍h目ǹg天講：「天父ah，我感謝祢，因為祢已經有聽我ê祈禱。我知祢不時都有teh聽我ê祈禱，獨獨我ánne講，是為tio̍h khiā tī四箍圍ê群眾，beh hō͘ in相信祢有差派我來。」講soah chiahê話，伊就大聲hoah講：「拉撒路，出來！」hitê死四工，身軀已經腐爛koh臭à ê人to̍h出來，伊ê腳手lóng用布包leh，面mā包手巾。耶穌對in講：「Kā伊tháu開，hō͘伊行路！」（約翰11：1～44）

耶穌是án怎beh延遲四工chiah來到伯大尼？因為耶穌若趕tī拉撒路病危á是tú病死ê時來到伯大尼，kā伊醫好á是hō͘ 伊koh活，hiahê自作聰明ê偤太人to̍h ē koh再講拉撒路kantaⁿ是一時昏迷，tú好耶穌叫伊醒起來而已，m̄是耶穌有權柄叫伊tùi死koh活，因為ánne來否認耶穌是上帝ê Κiáⁿ。拉撒路既然死去，按照偤太人ê慣例，tī一工內to̍h ài kā伊ê屍體處理完下葬。所以，拉撒路既然死去，koh埋葬tī墳墓內四工ā，偤太人to̍h bē講拉撒路kantaⁿ是昏迷過去而已；耶穌叫伊tùi墳墓內koh活行出來，真chē偤太人看見耶穌所做ê tāichì（to̍h是看見上帝ê榮光），就明白耶穌chìn前對in所講ê話：「我若m̄是teh做天父ê tāichì，lín m̄免信我。我若teh做上帝ê工，lín雖然m̄信我，mā tio̍h信我所做ê tāichì；ánne thang hō͘ lín知，天父tī我ê內面，我mā tī天父ê內面。」（約翰10：37、38）

當時四工前，耶穌tī約旦河東pêng ê伯大尼向偤太人講chiahê話，偤太人想beh掠祂；chitmá tī in tī耶路撒冷東pêng ê伯大尼，親目看見耶穌真正用做「上帝ê Κiáⁿ」ê權柄，hō͘ 拉撒路真正tùi死koh活。所以tī猶太人中間，有真chē人看見耶穌所做ê tāichì to̍h信祂。M̄ koh，「有真chē人」並無表示「所有ê人」lóng信，所以，其中mā有人去耶路撒冷見法利賽人，kā耶穌所做ê tāichì向in phah小報告，就ánne，祭司長kah法利賽人to̍h召開會議，互相參詳講：「Taⁿ chitê人行hiah chē神跡，咱tio̍h án怎來對付。咱若放祂ánne繼續做落去，群眾會去信祂…。」終其尾議決：計謀beh刣耶穌（約翰11：45～53、馬太26：1～5、路加22：1～2、馬可14：1～2）

因為ánne，耶穌to̍h暫時離開伯大尼，往撒瑪利亞人tòa ê一座城名叫以法蓮，kah門徒tòa落來（約翰11：54）。因為hit時祭司長kah法利賽人早to̍h下令「若有人知耶穌tī tó位，tio̍h來報告，hō͘ in thang去kā祂掠起來。」（約翰11：57）