《古典台語文學e5欣賞》

 | | | 轉寄

《十字架ê記號》(17)救星

作者 賴仁聲 2006.04.16

辯護士起來回答，講chhōe無。接續koh講，ánni我真m̄願意，檢察官喊hoah hitê婦人人，婦人人是女性，軟弱，伊頓桌hoah人拖伊出，ánni真正冤枉。檢察官講，無，hitê婦人人照我ê意見是辯護士chhiàⁿê，因為常常有辯護士用淡薄錢來chhiàⁿ hit號無賴漢，講若伊辯無話ê時，chiah請伊嚷一句，hō͘伊有機會thang koh辯；若m̄是ánni，伊若果真知，的確會來自首。辯護士真受氣，講，檢察官ná講ná無情理，án怎講是我去chhiàⁿ hitê婦人人來嚷ê？

Tútú爭論ê時，特務探偵蔡天平入來，peh上台，仆tī審判官長ê耳孔teh講話，真細聲，也審判官長真僥疑，嘴chi̍pchi̍p叫，辯護士心teh想phah算有ǹg望ê路。益杉真驚，伊ê意思kanta想taⁿ會死lah，來去黃泉見惠美。蔡先生對判官講，檢察官也是真僥疑ê款，原因就是蔡先生chhōa二個婦人人來，一個講是素蘭，一個講是惠美，兩人katī來自首。Ah！真正奇怪，thái有chit號事ah！判官長就叫兩人出來，事(tāi)先叫惠美出來，hō͘益杉認，看chitê果真是惠美ám̄是。益杉看一面真驚，心肝暗暗teh想是惠美ê靈魂顯聖。直直嚷，惠美，惠美你tio̍h赦免我。聽眾大家真驚，有ê pehpeh起來看，因為大家lóng想講，惠美死，怎樣今á日iáu tī chia。判官就問，你果真是惠美ám̄是？惠美應講，是。你豈m̄是已經死？無，我講lín就知。Taⁿ請你講。我11月初2暗，tī池邊，我chhōa我ê女婢素蘭作伙去tī hia祈禱，因為我kah素蘭lóng是基督徒。素蘭看伊ê丈夫kah二個細姨來，就bih走，chhun我tī hia，也我攬丈夫ê腳，伊kā我踢去。Hit時我有tǹglap坐；總是無致到siak落池。我會siak落池，m̄是丈夫ê腳踢我，是秀春ê腳踢我，kah其他猶一個婦人人ê手sak我，若無，我無hiah快落池。Taⁿ秀春踢你，你豈有甚物證據。有，伊踢我，我beh siak落池ê時，我有giú tio̍h伊ê皮鞋尖，也伊ê皮鞋尖有用金ê花來入益杉5像(這是現代外國最流行式ê鞋就是將siōng尊敬，所疼ê人ê像來入tī鞋尾ê花)，現時tīchia。就對袋á jîm起來，也我siak落去ê時，手猶pantī池邊ê石頭beh liòng起來，hit時益杉走去嚷救人，也玉珠kā我pak手soah chhia落去。Hit時我beh沈落去，有sa tio̍h伊ê手蹄尾，所以伊ê手指有一粒，金剛石hō͘我giú tio̍h，la̍ktī我手裡，hitkha手指平時是我teh用，石滑滑常常ka落，tùi伊來，益杉kā我pak hō͘伊掛。所以hit暝hit粒石á chiah會laktī我ê手，taⁿ lóng tī chia做證據。也我跋落去ê時，草蔬phèteh，沉落去ê時有koh浮起來，hit時秀春kah玉珠兩人已經走去。我浮起來有khîⁿ tio̍h一隻挽菱角ê船á。因為阮ê池底有放菱角，我khîⁿ起來船á頂ê時，叫素蘭，伊bihtī大樹後，緊出來，用一條gín'á hàiⁿ韆鞦斷tī樹腳ê索á，一頭hiat hō͘我，我kā伊縛tī船á，一頭hō͘素蘭拖，ánni giú上岸，對hittia̍p我有逃走，也素蘭tèⁿ m̄知tò去，也tùi hit時我走對上海去四界kā人煮食，lóng是tú tio̍h pháiⁿ頭家，所以去chhōe一個牧師。牧師常常去監內講道理，所以引進我入監獄ê病院做看護婦。Hittia̍p我改名做林氏淑貞，所以無人知。有一暝益杉beh自盡，tī監房我看伊jiok出來，後來摔倒tī草埔á，我kā伊插teh tī我ê手。Hit時伊病後腦貧血不省人事，我kah顧監ê kā伊插入去睏，hittia̍p我有khioh tio̍h伊ê遺言書，chittia̍p tīchia，就the̍h交判官。

講到chia，益杉ê心非常ê歡喜，也驚，chiah koh想見hit暝 ī上海預審監房ê事。也我為tio̍h讀chit張遺言狀，知果真m̄是伊存惡意beh害我，所以，我chiah刁工beh來為伊辯解。設使若無chit張遺言書，我決斷想m̄ ài koh入伊ê門，所以做我走。講到chia審判官長講，ánni好，請坐。就叫書記來讀遺言狀，讀了果然有影，益杉是iáu存疼惠美ê心，就koh叫素蘭來問。(待續)