《《平民ê基督傳》》

 | | | 轉寄

Jī koàn Tē sì chiuⁿ Siàuliân Kah Sêngliân 二卷第四章 少年Kah成年

作者 Tâi e̍k:Ko Tekchiong,Siutēng Lîm Chùnio̍k & Chng Hūiphêng 2024.03.31






Tē sì chiuⁿ Siàuliân Kah Sêngliân

Sèngchheh ū kìchài Iésu tī siàuliân sîtāi, cha̍pjī hòe ê sî só͘ tútio̍h ê chi̍tê kò͘sū, lâi phahphòa hitê saⁿcha̍pnî, tn̂gtn̂g, tiāmchēng ê le̍ksú. Lán teh kîkoài m̄chai sī ū siáⁿmi̍h goânin tīteh? M̄ chai sī ū siáⁿmi̍h bo̍ktek chiah lâi teh kóng khí? Kám sī ū ìsù beh àmsī, tī I ê chengsîn sengoa̍h ê hoatta̍t siōng ê choánki? Kiámchhái sī teh àmsī, tī hit sî Iésu tāikhài chiah chho͘chho͘ iúì bat tio̍h I ê sînpì?

Iûthàilâng ê gíná, nā kàu cha̍pjī hòe, chiàu in ê kuikí, lóng hō͘ in ha̍ksi̍p lu̍thoat ê kàsī, lâi chiâⁿchò "lu̍thoat ê Kiáⁿ", tútú sī chhinchhiūⁿ hiānkim, bôlūn siáⁿmi̍h Kitokkàu ê thoânthé, ū kiâⁿin ê lések lâi hō͘ gíná, ū hūn tī kàuhōe lóng chóng ê chekjīm kāngkhoán. Chhinchhiūⁿ ánne, I ê sèhàn kî íkeng kòeliáu. I tī simlāi sī ū kámkak chongkàu siōng tiōngtāi ê chekjīm. Chit sî I ēthang kah tōalâng chòhóe chiūⁿ Êlúsalem̀ hù cheh. Só͘í lán ū tha̍k tio̍hkóng,"Τa̍k nî Pôaⁿ kòecheh ê sî, I ê pēbú khì Êlúsalem̀, kàu I cha̍pjī hòe ê sî, chiàu chehkî ê lē, lóng chiūⁿ Êlúsalem̀."

Sèngchheh tùi chit chân, ū khòaⁿ putchí tāng, só͘í tùi ánne, ū giú lán ê sim ài lâi chùì chittiám. Lán thang sióngsiōng, chitê sèngchêng tiāmchēng, chhimtîm ê gíná Iésu, tī láuchá ê tiongkan, ū gia̍h thâu teh thènghāu chitê kihōe, chit sî I ê simlāi ū putchí siū chin tōa ê kámtōng, lâi kah chèng Nachalia̍t ê sûnlé chiá chòtīn chhuthoat, tùi hit tiâu Nachalia̍t ê tōa tōlō͘, ǹg hitê pêⁿiûⁿ ti̍tti̍t lo̍hkhì, iā chùì tehkhòaⁿ hiahê tùi siangchhe lō͘ lâi chiap tīn ê chēchē ê sin ê thoânthé, tāike kengkòe sianchó͘, íki̍p sianti lâng só͘ bat le̍kkòe ê ū le̍ksú ê só͘chāi, jiânāu ū kiâⁿ kàu tī Sūliām, tāike to̍h hiohkhùn tīhia lâi thiaⁿkìⁿ Ílēsa ê sūchek, iūkoh beh kiâⁿkòe Kîpía ê sî, ū thiaⁿkìⁿ kóng, hit só͘chāi sī Sàulô ông ê kò͘hiong. In tāike ná kiâⁿ ná teh gîm hoaⁿhí ê chìnhêng koa — Siphian — lâi oló Êlúsalem̀ ê sèngsiâⁿ.

Lán sī chin ohtit siatsióng, hiahê jia̍tsim ê Iûthài gíná ê liāmthâu; chiôngtiong chò gíná ê Iésu, thâukhíseng lâi khòaⁿkìⁿ sèng ê Êlúsalem̀, hit sî I sī kámsióng siáⁿ khoán, sī hō͘ lán kohkhah bētàng siatsióng·ê! chiàu I tehkhòaⁿ, Êlúsalem̀ m̄ sī chi̍tê kokbîn ê kiaⁿsiâⁿ niāniā, mā m̄ sī chi̍tê ū siū chēchē le̍ksú ê kìek só͘ chngthāⁿê siâⁿchhī niāniā. Êlúsalem̀ sī chi̍tê sèng ê siâⁿ; ū kiatliân tī I ê chongkàu, I ê kîtó, I ê sèngchheh; iā ū kiat liân tī I ê bîncho̍k ê le̍ksú tiong chò tēit sînsèng ê sîkî. Chèng sûnlé chiá hoa̍h ji̍p Tamásek (** Êlúsalem̀ ) siâⁿ ê sî, sī íkeng ji̍p tī Siōngtè ê sèng ê siâⁿ.

Khaksi̍t, chāi Iésu tehkhòaⁿ, I ji̍p siâⁿ hit ji̍t, sī I itseng só͘ tio̍h kìliām ê ji̍t. Tī hit chi̍t lépài kú ê tiongkan, I úntàng ū seⁿkhí kîī íki̍p kèngùi ê liāmthâu. Chhì siūⁿ, I ji̍p tī I ê pē ê chhù, choân sèkài ê Isulael lâng só͘ chunkèng kèngpài ê tiongsim, hitê chòngkoan ê tiāntn̂g, hit sî I ê simsîn m̄chai giâmsiok kàu ánchóaⁿ! chhì siūⁿ, I khòaⁿkìⁿ kángchheng kángbān ê kui tōatīn ê jia̍tsim, kèngkhiân ê Iûthàilâng, tùi thiⁿē ta̍k kok chūchi̍p, lâi chak tī Êlúsalem̀ ê koechhī, ūê tah pò͘pêⁿ hiohkhùn tī soaⁿ·n̍i̍h, iā tāike chūchi̍p chòhóe ēng tâng chi̍tiūⁿ ê sim, beh tī I ê sèngtiān lâi ho̍ksāi Pē, hit sî I khòaⁿkìⁿ hitê kongkéng, I ê simkoaⁿ kám bô chin hoaⁿhí khoàilo̍k! bô giâugî, hiahê khah lāu ê lâng ê tiongkan, ūê sī gâu kengthé lâng, gâu khòaⁿ khin lâng ê kèngkhiân, só͘í bô kàu gōani̍h siū kámtōng. Chóng·sī lâng nā m̄ sī tùi cha̍pjī hòe khí, sī bōe seⁿkhí hitkhoán ê simkoaⁿ! só͘í khaksi̍t hitê kénghóng, Iésu khòaⁿliáu sī kámkhài bû liōng!

Tī hitê giâmsiok ê àmmê, tī sûi lâng ê katêng, hoānsè ū kúinā ê katêng chò chi̍tê thoânthé, lâi t ī"lâuténg" siú hitê tùi kúinā sèkí ílâi, só͘ teh chíbêng I ê Pôaⁿ kòecheh ê lések, kohchài chhì siūⁿ, I khòaⁿtio̍h chitê chêngkéng, hit sî ê kámsióng siáⁿ khoán? hit sî Pôaⁿkòecheh ê iûⁿko íkeng thâi, bôkàⁿ ê piáⁿ kah phang chháu íkeng pâi tī toh· n̍i̍h, ū chēchē sèsè Hàn ê gíná, tōabīn Iésu iā sī ū óa lâi mn̄g só͘ pâilia̍t ê lések kóng,"Chitê lések sī siáⁿmi̍h ìsù?"hit sî tī chèng tāike ê tiongkan, tēit lāu ê lâng, to̍h chin giâmsiok lâi ìn kóng,"Chitê to̍h sī Chú ê Pôaⁿkòecheh ê lések, lâi siàu liām chá Chú ū pôaⁿkòe Isulael chèng kiáⁿsun ê chhù, lâi chínkiù lán ê ke."khaksi̍t chhinchhiūⁿ chit khoán kénghóng, chò gíná ê Iésu khòaⁿliáu, úntàng siū tōa kámtōng, lâi seⁿkhí kîī ê liāmthâu chiah tio̍h.

Taⁿ lâi kóngkhí chiahê La̍hbí ê sū, inūi ū tāmpo̍h líiû tī·leh, só͘í lán chiah tio̍h te̍kpia̍t lâi kóngkhí I kah in tâmlūn ê kò͘sū.

Iûthàilâng ê kengchheh (Talmud) ū chísī lán chai, sèngtiān ê phênggīoân (Sanhedrim), sī khah siông tī ta̍kpái ê cheh ê sî, tio̍h ài lâi chē tī "Gîmá" ê téngbīn lâi kàsī jînbîn. In só͘ kóng·ê sī tansûn, phó͘thong ê kàsī, ta̍k lâng thang lâi thiaⁿ, lâi mn̄g. Ū chi̍t ji̍t, chitê gíná Iésu ū khòaⁿ tang khòaⁿ sai, chin hihán ê khoán, lâi sìkè kiâⁿ tī hitê chònggiām ê thiaⁿtn̂g, lâi tittio̍h chēchē sinkî ê ìnsiōng khek tī simlāi, iā tī bô phahsǹg ê tiongkan, I ū kiâⁿ lâi khiā tī hitê "Gîmá" ê téngbīn!

Chi̍tēá ê tiongkan, chitê gíná Iésu lóng bô teh siūⁿ I ê lāubú, pêngiú íki̍p kîtha itchhè ê sū. Chitê siàuliân gíná Iésu khiā tīchia, simsîn putchí chhùita himbō͘ tìhūi, to lóng bô boánchiok Nachalia̍t hiahê bûti ê lāu La̍hbí ê kàsī. Sīmchì tī chitê "Gîmá" téng, koh ū chèng kokbîn ê tōa siansiⁿ, ū chaibat ê lâng chēchē tī·leh, só͘í ū kohkhah seⁿkhí himbō͘ ê sim.


Lán thang siūⁿ, I ū jia̍tsim tī teh thiaⁿ, lâi siū in ê kàsī. Kàu hit àm, ta̍k lâng to lóng sìsòaⁿ liáu, I ko͘putchiong iā tio̍h līkhui in, lâi sìkè se̍h lâi se̍h khì tī Êlúsalem̀ ê kelō͘ · n̍i̍h, iā lóng bētàng tútio̍h siáⁿmi̍h pêngiú, só͘í phahsǹg ū chhinchhiat ê hūjînlâng, hó khoánthāi chitê sitbê ê gíná Iésu, ū chúnpī pângkeng hō͘ I hiohkhùn, chúnpī mīpau hō͘ I chia̍h. Keh chákhí, I khùnchhéⁿ, to̍h kohchài lâi chahng ê só͘chāi, iā thiaⁿ iā siūⁿ in só͘ kóng ê tōlí. Ū sî I mā sòa jia̍tsêng lâi chhéngkàu in. Kàu lō͘bé, hiahê lāu La̍hbí soah putchí ū chùì tio̍h I, sīmchì soah chin chhùbī ài kah I tâmlūn, só͘í āulâi in "Lóng kîkoài I ê chhongbêng kah I ê ìntap."

Tùi tī pa̍t só͘chāi lán só͘ chaiiáⁿ, lūn gíná ê thâunáu ê hoatta̍t, lán tek khak bētàng kàu gōa kîthāi Iûthài ê La̍hbí ê pangchō͘. Hoánchoán chēchē sī koanhē gíná púnsin ê oa̍tle̍k. Liân hiahê bô bī bô sò͘ ê sîn ha̍kchiá, kiámchhái ū sî mā iáu ē kìtit in púnsin bat chò gíná ê khoán, só͘í chhinchhiūⁿ Iésu hitkhoán ū khiáukhùi, jia̍tsêng ê thâunáu ê gíná, úntàng sī putchí ē chhuipek hiahê siansiⁿ ê liôngsim. Tī hiahê Iûthài ê La̍hbí ê tiongkan, ū chēchē chin gâu·ê, m̄ sī kanta miâ kóng sī sîn ha̍kchiá niāniā. Tī in tiongkan ū chēchē chhimtîm ê susióngka, kosiōng ê jînkeh chiá tī·leh. Chhinchhiūⁿ La̍hbí Hiléluh(Hillel), Siámmái(Shammai), íki̍p Páulô ê siansiⁿ Kamália̍t(Gamaliel), chiahê siansiⁿ kàu kináji̍t, tī Iûthài ê le̍ksú tiong sī hō͘ lâng chunkèng chò chongkàu susiúⁿ ê tēit kosiōng ê chítō chiá. Chiahê lâng tōabīn tī hit ji̍t ū chhutse̍k tī hitê "Gîmá" ê téngbīn. Inūi tī Pôaⁿkòecheh ê sî, in tekkhak sī bô khiàmsek chiah tio̍h.

Tī āulâi tāikhài Iésu sī bô kah La̍hbí kauōaⁿ ìkiàn kàu gōa chē. Chóng·sī chit sî tāike bênghián ū saⁿchhùbī tī·leh. Chèng La̍hbí ū chhut būntê hō͘ chitê gíná Iésu lâi siūⁿ. M̄ chai Iésu thiaⁿ in ê kàsī liáu, ū kámsióng siáⁿ khoán?M̄ chai Iésu ū tùi in chhéngkàu siáⁿmi̍h khoán ê būntê bò͘? Phah sǹg ū chēchē būntê, I sī úntàng ài chai, kîtiong chhinchhiūⁿ lūnkhí Siōngtè tùi Isulael lâng ê kèōe, á·sī lūnkhí Mesíiah ê ǹgbāng, íki̍p Pôaⁿkòecheh ê ìsù. Κiámchhái I iā ū siūⁿ kóng, ánchóaⁿ Siōngtè to ū hiánchhut I ê thiàⁿ, thài ē iûgoân tī chit sèkan ū khó͘thàng, ū chōeok tī·leh, chit chióng òbiāu ê būntê, I úntàng ū mn̄g, māū khólêng. Lán kám m̄ sī chin ài thiaⁿ I ánchóaⁿ lâi mn̄g, iā ánchóaⁿ lâi ìn? siatsú chitê kò͘sū nāsī ū ìsù, ài beh àmsī, tī chitê gíná Iésu ê sengoa̍h tiong ê choánki lâi kóng, ísiōng lán só͘ teh siūⁿ ê, si̍tchāi sī chin tiōngiàu ê būntê. Hokimsu ê tùchiá, engkai tio̍h ài siá bêng, putkò Lūka chíū sī chai Mâlíah só͘ chai ê niāniā. M̄koh Mâlíah sī tútú in tâmlūn beh liáu chiah ji̍pkhì. Lūka sī tùi Mâlíah lâi tittio̍h chitê siausit. Só͘í chitê kò͘sū thang kóng sī chin ûihām, chin bô oânchoân ê kò͘sū.

Lán sī tiāⁿtio̍h ǹgbāng hiahê khah láuliān ê La̍hbí tīhia, ū ê beh ū khùila̍t thang ìn I ê jia̍tsêng ê susiúⁿ ê iaukiû. Putkoán siáⁿ khoán, in khòaⁿliáu sī siongtong chheⁿkiaⁿ I ê chhongbêng, to̍h himbō͘ Iésu lâi tiàm tī in ê tiongkan, lâi thiaⁿ lâi mn̄g téngténg ê būntê, tìkàu sòa bē kìtit sîkan ti̍tti̍t teh kòekhì, iā Nachalia̍t ê sûnlé chiá, to lóng tńgkhì à. Kàu saⁿ ji̍t āu, Iôséhuh kah Mâlíah sim putchí jû loān, lâi teh chhōe i, āulâi chhōetio̍h I tī tiān· n̍i̍h,"chē tī hiahê siansiⁿ ê tiongkan, iā teh thiaⁿ, iā teh mn̄g."

Hit sî Mâlíah khòaⁿkìⁿ I to̍h "gōnggia̍h", tōabīn sī inūi ū khòaⁿkìⁿ i hitê kiaⁿ pháiⁿsè ê gíná Iésu, ū kah hiahê tōa La̍hbí chē chòhóe teh tâmlūn. Chóng·sī lán thang phahsǹg, m̄ sī kanta inūi ánne nātiāⁿ. Mâlíah ū khòaⁿtio̍h chitê gíná Iésu chhinchhiūⁿ ū hiánchhut tāmpo̍h kohiūⁿ ê iôngmāu, I ê ba̍kchiu ū hoatchhut sinī ê kongchhái tī·leh. Mâlíah sī teh chheⁿkiaⁿ, Iésu úntàng ū kenggiām tio̍h siáⁿmi̍h kîī ê sū chiah tio̍h!

Sī lah! Iésu ū kenggiām tio̍h Êlúsalem̀, I kakī ê Pôaⁿkòecheh, I ê Pē ê sèngtiān, kángchhengbān lâng phak pài tī Siōngtè ê bīnchêng, íki̍p kah La̍hbí chòhóe tâmlūn ê chêngkéng. Sèngchheh tùi tī lō͘bóe chit chân ū putchí khòaⁿtiōng, só͘í suijiân bô kìchài kàu gōani̍h siôngsè, thang hō͘ lán chai hitê chêngkéng, putkò lán lóng bián giâugî, chitê tāichì sī I ê chin iàukín ê kenggiām. M̄ koán siáⁿ khoán, chitê gíná Iésu tī I ê simsîn ū tittio̍h sinī ê kenggiām chiah tio̍h.

Sèngchheh ū kì Iésu hù chitê thâuchi̍t pái ê Pôaⁿkòecheh ê kò͘sū, lâi phahphòa I ê siàuliân sîtāi, hitê tn̂gtn̂g tiāmchēng ê le̍ksú; khaksi̍t chitê kò͘sū sī ū teh chísī I ê senggâi tiong ê choánki.

Mâlíah khiànchek Iésu, mn̄g kóng,"kiáⁿah, lí siáⁿsū khoánthāi goán kàu ánne?" Chitkù kám m̄ sī tongjiân ê ōe? siatsú lâi kóng, ū siáⁿmi̍h hūjînlâng hoânló kúinā ji̍t kú, lâi chhōe i só͘ sitlo̍h ê sèkiáⁿ, simlāi hoànsióng ta̍k ténghō ê sū, āulâi hutjiânkan chhōetio̍h i, khòaⁿkìⁿ i ê gíná simlāi hoaⁿhoaⁿ híhí, lóng bô siūⁿtio̍h pēbú ê kankhó͘, hit sî chò pēbú ê lâng, kám m̄ sī tiāⁿtio̍h iûgoân beh chiàu ánne lâi mn̄g i ê kiáⁿ? chò lāubú ê lâng sī chin khóliân, sūsū sī chin gâu khòalū. Mâlíah sī kah chēchē hūjînlâng kāngkhoán, sī bōe líkái i ê sèkiáⁿtī simlāi só͘ teh oa̍htāng ê hitkhoán sînpì ê susiúⁿ.

Iésu tùi I ê lāubú só͘ ìn chit kù ōe, sī lán thâuchi̍t pái thiaⁿkìⁿ I só͘ kóng ê ōe, ū kìchài tī sèngchheh lāi·ê. Tùi I só͘ ìn chit kù ōe, hō͘ lán thang chai, Mâlíah só͘ siông ū ánchóaⁿ ēng súisúi ê chengsîn teh kàsī Iésu bat Pē Siōngtè ê sū. Chitkù ū teh àmsī, Mâlíah tōabīn sī íkeng ū tùi Iésu kóngkhí I ê sînpì tek ê chhutsì, íki̍p tùi Siōngtè I só͘ū ê te̍kpia̍t koanhē. I to̍h sī ìn kóng,"siáⁿsū chhōe Góa, kám m̄chai Góa engkai tī Góa ê Pē ê chhù?"

Chóng·sī chit kù ōe, kîsi̍t sī iáu ū teh piáusī kohkhah chhim ê ìsù tī·leh. I ìn ánne, sī piáubêng I íkeng ū siókhóa teh līkhui Mâlíah, sī piáubêng I ū phō hitkhoán liân Mâlíah to iā sī bētàng líkái ê susiúⁿ tī·leh. Lán thang ēng kèngkhiân ê liāmthâu lâi thuisióng, chit sî Iésu sī íkeng ū thoatchhut hitê éngoán ê sèkài ê pòaⁿ ìsek ê chengsîn chōngthāi, tī I ê simlāi íkeng ū kámchhiok tio̍h chi̍tsutá ê kng, lâi bêngpe̍k I púnsin sī ū khah kohiūⁿ tī chiuûi ê lâng, ū khah kohiūⁿ tī hiahê kah I chòhóe teh chhitthô ê gíná, íki̍p pôeióng I tōahàn ê pēbú. Chitê gíná Iésu ê chengsîn ê hoatta̍t, sī chiāmchiām ê sū, lâng só͘ bētàng khòaⁿkìⁿ·ê, sī chhinchhiūⁿ chhunthiⁿ sî ê sèchâng chhiū teh suh i ê chhiūchiap khílâi téngbīn kāngkhoán. Khiok ū sî tī lâng ê chengsîn ê hoatta̍t siōng, iûgoân bat tútio̍h chēchē pái ê choánki. Lán nāsī hôekò͘ lán chò gíná ê chōngthāi, lán iûgoân ē kìtit, kàu tī cha̍pjī hòe ê tiongkan, mā sī ū kenggiām tio̍h chēchē pái hitkhoán giâmsiok ê choánki, to̍h sī tī hitkhoán ê sîchūn, Siōngtè ū tī àmchīⁿ ê tiongkan, lâi hóngbūn lán siàuliân lâng ê simsîn, iā lán ê tōahiaⁿ mā lóng m̄chai pòaⁿhāng. Chāi hitkhoán phó͘thong lâng ê cha̍pjī hòe ê gíná, to ū hitkhoán ê kenggiām, só͘í lán khaksìn, tī hitê ū chònggiâm koh ē kámtōng lâng ê Pôaⁿkòecheh ê chi̍t lépài kan, chitê sîntông Iésu, sī úntàng tittio̍h chhimchhim ê kenggiām chiah tio̍h.

I ê lāubú Mâlíah tekkhak sī ū chi̍tsutá kámchhiok tio̍h chitê sūsi̍t, inūi lán ū tha̍ktio̍h kóng,"In m̄chai I só͘ kā in kóng ê I. I ê lāubú ū kā chiahê ōe lóng kì tī sim·ni̍h. "Chhinchhiūⁿ tī khah āulâi, lán só͘ ēthang khòaⁿkìⁿ ê, lūn I ê lāubú ê bōe liáukái I ê sū, kîsi̍t m̄ sī kanta chitpái niāniā. Tī khah āulâi I putsî tio̍h ko͘li̍p, bô lâng thang líkái I ê simsu, che sī bētàng siámphiah ê sūsi̍t. Chóng·sī liân chit sî, Iésu to sī túchiah cha̍pjī hòe niāniā, to̍h íkeng ū siókhóa kámkak tio̍h I ê ko͘to̍k, bôliâu ê liāmthâu, che sī Iésu ê ko͘to̍k ê sengoa̍h ê khígoân.

Tùi tī ísiōng só͘ kóng chiahê, hō͘ lán kohkhah ài chùì tī chit kù tété ê ōe, to̍h sī kóng, "Iésu to̍h kah in lo̍hkhì kàu Nachalia̍t, lâi sūnchiông in." siatsú, Iésu iā sī chi̍tê phó͘thong ê chūjiân lâng ê gíná lâi kóng, chhinchhiūⁿ I hitkhoán ū chhimtîm kosiōng ê susiúⁿ, íki̍p kenggiām tī·leh, I úntàng sī khah bô ìhiòng tī hitkhoán bô chhùbī ê chngkha ê sengoa̍h chiah tio̍h. I kám m̄ sī ài kah hiahê tōa siansiⁿ chòhóe tiàm tī Êlúsalem̀? I kám m̄ sī ài chū ánne tiàm tī I ê Pē ê chhù, lâi ha̍ksi̍p chò "I ê Pē ê kang" ê tōa ê kàsī? siatsú I kójiân chū ánne tiàm tīhia, bián giâugî, lán mā sī úntàng ē siūⁿchhut chēchē hóthiaⁿ koh kèngkhiân ê líiû, thang lâi piānbêng. Chóng·sī chitê sîntông Iésu chai, iā sòa chísī lán chai, lâng tansûn lâi sūnho̍k pēbú, chiôngsū hitkhoán bô khòaⁿoa̍h ê sūgia̍p, tī pē ê bīnchêng ū sî iáu kohkhah sī kosiōng, sînsèng ê sū. Lán sī putchí bē jímsiū jînseng bô khòaⁿoa̍h ê lō͘chām; só͘í khah hó lán tio̍h chai, hitkhoán ê lō͘chām, sī I só͘ beh tamtng ê thianhūn.

Chit sî chāi Iésu tehkhòaⁿ, I ê tansûn ê ji̍tsiông ê sengoa̍h, sī teh chò "I ê Pē ê kang."inūi I chitchūn, tú chiah sī cha̍pjī hòe, iā I ê tansûn ê katêng sengoa̍h, íki̍p tùi pēbú só͘ tio̍h chīn ê hàusūn, bô giâugî, sī siōng hó ê chúnpī, thang chò I chionglâi ê lō͘ēng. Tī I ê sengoa̍h, bô ū hui chūjiân ê kenggiām, á·sī ū thang hiánchhut I sī ū tōalâng ê khìkhài, lâi hō͘ lâng phō͘tháⁿ, á·sī kiaⁿhiâⁿ ê khoánsit tī·leh.

Chhengliân ê sengoa̍h, I ê hoatta̍t sī tio̍h ū chūjiân, ū kuikí, ū khongkiān, ū oa̍hkhì ê khoánsit. Chitê chò gíná ê Iésu, iûgoân sī tī bô lâng chùì tio̍h ê tiongkan, chiāmchiām lâi tōahàn·ê. Tōabīn chitsî I mā sī m̄chai iáⁿ Siōngtè ê ìsù, sī ài I tī āulâi tio̍h chīn I ê gībū lâi chiàukò͘ I ê chiúkóaⁿ ê lāubú Mâlíah, só͘í chiah lâi ínchhōa I khì tiàm tī hitê phianphiah ê chngkha, lâi hàusūn I ê sītōalâng khah ke cha̍ppeh nî kú. Chhinchhiūⁿ ánne, tī I ê simlāi khǹg sin ê būntê, tī I ê ba̍kchiu khǹg sin ê kîkoài, chitê gíná Iésu ū tòtńg khì in tau Nachalia̍t, tīhia lâi tittio̍h ha̍pgî ê chúnpī, thang oânsêng I lîmkàu sèkan ūitio̍h lán, íki̍p lán ê chínkiù ê sūgia̍p.




第四章 少年Kah成年

聖冊有記載耶穌tī少年時代，十二歲ê時所tú tio̍h ê一个故事，來phah破hitê三十年，長長、恬靜ê歷史。咱teh奇怪m̄知是有啥物原因tīteh？M̄知是有啥物目的chiah來teh講起？Kám是有意思beh暗示，tī伊ê精神生活ê發達上ê一轉機？Kiámchhái是teh暗示，tī hit時耶穌大概chiah初初有意識著伊ê神祕？

偤太人ê gín'á，若到十二歲，照in ê規矩，lóng hō͘ in學習律法ê教示，來成做「律法ê Kiáⁿ」，tútú是親像現今，無論啥物基督教ê團體，有kiâⁿin ê禮式來hō͘ gín'á，有份tī教會lóng總ê責任仝款。親像ánne，伊ê細漢期已經過了。伊tī心內是有感覺宗教上重大ê責任。Chit時伊ē thang kah大人做伙chiūⁿ耶路撒冷赴節。所以咱有讀tio̍h講：「Τa̍k年Pôaⁿ過節ê時，伊ê父母去耶路撒冷，到伊十二歲ê時，照節期ê例，lóng chiūⁿ耶路撒冷。」

聖冊tùi chit層，有看不止重，所以tùi ánne，有giú咱ê心ài來注意chit點。咱thang想像，chitê性情恬靜、深沈ê gín'á耶穌，tī老早ê中間，有gia̍h頭teh thèng候chitê機會，chit時伊ê心內有不止受真大ê感動，來kah眾拿撒勒ê巡禮者做陣出發，tùi hit條拿撒勒ê大道路，ǹg hitê平洋直直落去，也注意teh看hiahê tùi雙叉路來接陣ê chē chē ê新ê團體，大家經過先祖，以及先知人所bat歷過ê有歷史ê所在，然後有行到tī Sūliām，大家to̍h歇睏tīhia來聽見Ílē sa ê事蹟，又koh beh 行過Kîpía ê時，有聽見講，hit所在是掃羅王ê故鄉。In大家ná行ná teh吟歡喜ê進行歌—詩篇—來oló耶路撒冷ê聖城。

咱是真oh得設想，hiahê熱心ê偤太gín'á ê念頭；從中做gín'á ê耶穌，頭起先來看見聖ê耶路撒冷，hit時伊是感想啥款，是hō͘咱kohkhah bē tàng設想得 ê！照伊teh看，耶路撒冷m̄是一个國民ê京城niāniā，mā m̄是一个有受chē chē歷史ê記憶所粧thāⁿê城市niāniā。耶路撒冷是一个聖ê城；有結連tī伊ê宗教，伊ê祈禱，伊ê聖冊；也有結連tī伊ê民族ê歷史中做第一神聖ê時期。眾巡禮者hoa̍h入大馬色(**耶路撒冷)城ê時，是已經入tī上帝ê聖ê城。

確實，在耶穌teh看，伊入城hit日，是伊一生所tio̍h記念ê日。Tī hit一禮拜久ê中間，伊穩當有生起奇異以及敬畏ê念頭。試想，伊入tī伊ê父ê厝，全世界ê以色列人所尊敬敬拜ê中心，hitê壯觀ê殿堂，hit時伊ê心神m̄知嚴肅到án怎！試想，伊看見káng千káng萬ê kui大陣ê熱心，敬虔ê偤太人，tùi天下ta̍k國聚集，來chak tī耶路撒冷ê街市，有ê搭布棚歇睏tī山 裡，也大家聚集做伙用同一樣ê心，beh tī伊ê聖殿來服事父，hit時伊看見hitê光景，伊ê心肝kám無真歡喜快樂！無僥疑，hiahê khah老ê人ê中間，有ê是gâu kengthé人，gâu看輕人ê敬虔，所以無到gōani̍h受感動。總是人若m̄是tùi十二歲起，是bōe生起hit款ê心肝！所以確實hitê景況，耶穌看了是感慨無量！

Tī hitê嚴肅ê暗暝，tī隨人ê家庭，hoānsè有幾nā 个家庭做一个團體，來tī「樓頂」守hitê tùi幾nā世紀以來，所teh指明伊ê Pôaⁿ過節ê禮式，koh再試想，伊看tio̍h chitê情景，hit時ê感想啥款？Hit時Pôaⁿ過節ê羊羔已經thâi，無酵ê餅kah芳草已經排tī桌 裡，有chē chē細細漢ê gín'á，大面耶穌也是有óa來問所排列ê禮式講：「Chitê禮式是啥物意思？」Hit時tī眾大家ê中間，第一老ê人，to̍h真嚴肅來應講：「Chitê to̍h是主ê Pôaⁿ過節ê禮式，來siàu念早主有pôaⁿ過以色列眾kiáⁿ孫ê厝，來拯救咱ê家。」確實親像chit款景況，做gín'á ê耶穌看了，穩當受大感動，來生起奇異ê念頭chiah tio̍h。

Taⁿ來講起chiahê拉比ê事，因為有淡薄理由tī leh，所以咱chiah tio̍h特別來講起伊kah in談論ê故事。

偤太人ê經冊(Talmud)有指示咱知，聖殿ê評議員(Sanhedrim)，是khah常tī ta̍kpái ê節ê時，tio̍h ài來坐tī「吟á」ê頂面來教示人民。In所講 ê是單純、普通ê教示，ta̍k人thang來聽，來問。有一日，chitê gín'á耶穌有看東看西，真稀罕ê款，來四界行tī hitê壯嚴ê廳堂，來得tio̍h chē chē新奇ê印象刻tī心內，也tī無phah算ê中間，伊有行來khiā tī hitê「吟á」ê頂面！

Chi̍tē'á ê中間，chitê gín'á耶穌lóng無teh想伊ê老母、朋友以及其他一切ê事。Chitê少年gín'á耶穌khiā tīchia，心神不止嘴乾欣慕智慧，to lóng無滿足拿撒勒hiahê無知ê老拉比ê教示。甚至tī chitê「吟á」頂，koh有眾國民ê大先生，有知bat ê人chē chē tī leh，所以有kohkhah生起欣慕ê心。


咱thang想，伊有熱心tīteh聽，來受in ê教示。到hit暗，ta̍k人to lóng四散了，伊ko͘不終也tio̍h離開in，來四界se̍h來se̍h去tī耶路撒冷ê街路·裡，也lóng bē tàng tú tio̍h啥物朋友，所以phah算有親切ê婦人人，好款待chitê失迷ê gín'á耶穌，有準備房間hō͘伊歇睏，準備麵包hō͘伊食。隔早起，伊睏醒，to̍h koh再來昨昏ê所在，也聽也想in所講ê道理。有時伊mā續熱誠來請教in。到路尾，hiahê老拉比soah不止有注意tio̍h伊，甚至soah真趣味ài kah伊談論，所以後來in「Lóng奇怪伊ê聰明kah伊ê應答。」

Tùi tī別所在咱所知影，論gín'á ê頭腦ê發達，咱的確bē tàng到gōa期待偤太ê拉比ê幫助。反轉chē chē是關係gín'á本身ê閱歷。連hiahê無味無素ê神學者，kiámchhái有時mā猶ē記得in本身bat做gín'á ê款，所以親像耶穌hit款有巧氣、熱誠ê頭腦ê gín'á，穩當是不止ē催逼hiahê先生ê良心。Tī hiahê偤太ê拉比ê中間，有chē chē真gâu ê，m̄是kanta名講是神學者niāniā。Tī in中間有chē chē深沈ê思想家，高尚ê人格者tī leh。親像拉比Hiléluh(Hillel)、Siámmái(Shammai)，以及保羅ê先生Kamália̍t(Gamaliel)，chiahê先生到今á日，tī偤太ê歷史中是hō͘人尊敬做宗教思想ê第一高尚ê指導者。Chiahê人大面tī hit日有出席tī hitê「吟á」ê頂面。因為tī Pôaⁿ過節ê時，in的確是無欠席chiah tio̍h。

Tī後來大概耶穌是無kah拉比交換意見到gōa chē。總是chit時大家明顯有相趣味tī leh。眾拉比有出問題hō͘ chitê gín'á耶穌來想。M̄知耶穌聽in ê教示了，有感想啥款？?M̄知耶穌有tùi in請教啥物款ê問題bò͘？Phah算有chē chē問題，伊是穩當ài知，其中親像論起上帝tùi以色列人ê計畫，á是論起彌賽亞ê ǹg望，以及Pôaⁿ過節ê意思。Κiámchhái伊也有想講，án怎上帝to有顯出伊ê疼，thài ē猶原tī chit世間有苦痛，有罪惡tī leh，chit種奧妙ê問題，伊穩當有問，māū可能。咱kám m̄是真ài聽伊án怎來問，也án怎來應？設使chitê故事若是有意思，ài beh暗示，tī chitê gín'á耶穌ê生活中ê轉機來講，以上咱所teh想ê，實在是真重要ê問題。福音書ê著者，應該tio̍h ài寫明，不過路加只有是知馬利亞所知ê niāniā。M̄ koh馬利亞是tútú in談論beh了才入去。路加是tùi馬利亞來得tio̍h chitê消息。所以chitê故事thang講是真遺憾，真無完全ê故事。

咱是tiāⁿ tio̍h ǹg望hiahê khah老練ê拉比tīhia，有ê beh有氣力thang應伊ê熱誠ê思想ê要求。不管啥款，in看了是相當生驚伊ê聰明，to̍h欣慕耶穌來tiàm tī in ê中間，來聽來問等等ê問題，致到續bē記得時間直直teh過去，也拿撒勒ê巡禮者，to lóng轉去à。到三日後，約瑟kah馬利亞心不止jû亂，來teh chhōe伊，後來chhōe tio̍h伊tī殿 裡，「坐tī hiahê先生ê中間，也teh聽，也teh問。」

Hit時馬利亞看見伊to̍h「戇gia̍h」，大面是因為有看見伊hitê 驚pháiⁿsè ê gín'á耶穌，有kah hiahê大拉比坐做伙teh談論。總是咱thang phah算，m̄是kanta因為ánne nātiāⁿ。馬利亞有看tio̍h chitê gín'á耶穌親像有顯出淡薄koh樣ê容貌，伊ê目chiu有發出新異ê光彩tī leh。馬利亞是teh生驚，耶穌穩當有經驗tio̍h啥物奇異ê事chiah tio̍h！

是lah!耶穌有經驗tio̍h耶路撒冷，伊kakī ê Pôaⁿ過節，伊ê父ê聖殿，káng千萬人phak拜tī上帝ê面前，以及kah拉比做伙談論ê情景。聖冊tùi tī路尾chit層有不止看重，所以雖然無記載到gōani̍h詳細，thang hō͘咱知hitê情景，不過咱lóng免僥疑，chitê tāichì是伊ê真要緊ê經驗。M̄管啥款，chitê gín'á耶穌tī伊ê心神有得tio̍h新異ê經驗chiah tio̍h。

聖冊有記耶穌赴chitê頭一pái ê Pôaⁿ過節ê故事，來phah破伊ê少年時代，hitê長長恬靜ê歷史；確實chitê故事是有teh指示伊ê生涯中ê轉機。

馬利亞遣責耶穌，問講：「kiáⁿah，你啥事款待阮到ánne ？」Chit句kám m̄是當然ê話？設使來講，有啥物婦人人煩惱幾nā日久，來chhōe伊所失落ê細kiáⁿ，心內幻想ta̍k等號ê事，後來忽然間chhōe tio̍h伊，看見伊ê gín'á心內歡歡喜喜，lóng無想tio̍h父母ê艱苦，hit時做父母ê人，kám m̄是tiāⁿ tio̍h猶原beh照ánne來問伊ê kiáⁿ？做老母ê人是真可憐，事事是真gâu掛慮。馬利亞是kah chē chē婦人人仝款，是bōe理解伊ê細kiáⁿtī心內所teh活動ê hit款神祕ê思想。

耶穌tùi伊ê老母所應chit句話，是咱頭一pái聽見伊所講ê話，有記載tī聖冊內 ê。Tùi伊所應chit句話，hō͘咱thang知，馬利亞所常有án怎用súisúi ê精神teh教示耶穌bat父上帝ê事。Chit句有teh暗示，馬利亞大面是已經有tùi耶穌講起伊ê神祕tek ê出世，以及tùi上帝伊所有ê特別關係。伊to̍h是應講：「啥事chhōe我，kám m̄知我應該tī我ê父ê厝？」

總是chit句話，其實是iáu有teh表示kohkhah深ê意思tī leh。伊應ánne，是表明伊已經有小khóa teh離開馬利亞，是表明伊有抱hit款連馬利亞to也是bē tàng理解ê思想tī leh。咱thang用敬虔ê念頭來推想，chit時耶穌是已經有脫出hitê永遠ê世界ê半意識ê精神狀態，tī伊ê心內已經有感觸tio̍h一屑á ê光，來明白伊本身是有khah koh樣tī周圍ê人，有khah koh樣tī hiahê kah伊做伙teh chhitthô ê gín'á，以及培養伊大漢ê父母。Chitê gín'á耶穌ê精神ê發達，是漸漸ê事，人所bē tàng看見 ê，是親像春天時ê細叢樹teh suh伊ê樹汁起來頂面仝款。卻有時tī人ê精神ê發達上，猶原bat tú tio̍h chē chē pái ê轉機。咱若是回顧咱做gín'á ê狀態，咱猶原ē記得，到tī十二歲ê中間，mā是有經驗tio̍h chē chē pái hit款嚴肅ê轉機，to̍h是tī hit款ê時chūn，上帝有tī暗靜ê中間，來訪問咱少年人ê心神，也咱ê大兄mā lóng m̄知半項。在hit款普通人ê十二歲ê gín'á，to有hit款ê經驗，所以咱確信，tī hitê有壯嚴koh ē感動人ê Pôaⁿ過節ê一週間，chitê神童耶穌，是穩當得tio̍h深深ê經驗chiah tio̍h。

伊ê老母馬利亞tek確是有一屑á感觸tio̍h chitê事實，因為咱有讀tio̍h講：「In m̄知伊所kā in講ê伊。伊ê老母有kā chiahê話lóng記tī心裡。」親像tī khah後來，咱所ē thang看見ê，論伊ê老母ê bōe了解伊ê事，其實m̄是kanta chitpái niāniā。Tī khah後來伊不時tio̍h孤立，無人thang理解伊ê心思，這是bē tàng閃避ê事實。總是連chit時，耶穌to是túchiah十二歲niāniā，to̍h已經有小khóa感覺tio̍h伊ê孤獨、無聊ê念頭，這是耶穌ê孤獨ê生活ê起源。

Tùi tī以上所講chiahê，hō͘咱kohkhah ài注意tī chit句短短ê話，to̍h是講：「耶穌to̍h kah in落去到拿撒勒，來順從in。」設使，耶穌也是一个普通ê自然人ê gín'á來講，親像伊hit款有深沈高尚ê思想，以及經驗tī leh，伊穩當是khah無意向tī hit款無趣味ê庄腳ê生活chiah tio̍h。伊kám m̄是ài kah hiahê大先生做伙 tiàm tī耶路撒冷？伊kám m̄是ài自ánne tiàm tī伊ê父ê厝，來學習做「伊ê父ê工」ê大ê教示？設使伊果然自ánne tiàm tīhia，免僥疑，咱mā是穩當ē想出chē chē好聽koh敬虔ê理由，thang來辯明。總是chitê神童耶穌知，也續指示咱知，人單純來順服父母，從事hit款無khòaⁿ活ê事業，tī父ê面前有時猶kohkhah是高尚、神聖ê事。咱是不止bē忍受人生無khòaⁿ活ê路站；所以khah好咱tio̍h知，hit款ê路站，是伊所beh擔當ê天分。

Chit時在耶穌teh看，伊ê單純ê日常ê生活，是teh做「伊ê父ê工。」因為伊chitchūn，túchiah是十二歲，也伊ê單純ê家庭生活，以及tùi父母所tio̍h盡ê孝順，無僥疑，是上好ê準備，thang做伊將來ê路用。Tī伊ê生活，無有非自然ê經驗，á是有thang顯出伊是有大人ê氣慨，來hō͘人phō͘tháⁿ，á是驚惶ê款式tī leh。青年ê生活，伊ê發達是tio̍h有自然，有規矩，有康健，有活氣ê款式。Chitê做gín'á ê耶穌，猶原是tī無人注意tio̍h ê中間，漸漸來大漢 ê。大面chit時伊mā是m̄知影上帝ê意思，是ài伊tī後來tio̍h盡伊ê義務來照顧伊ê守寡ê老母馬利亞，所以chiah來引chhōa伊去tiàm tī hitê偏僻ê庄腳，來孝順伊ê序大人khah加十八年久。親像ánne，tī伊ê心內khǹg新ê問題，tī伊ê目chiu khǹg新ê奇怪，chitê gín'á耶穌有倒tńg去in tau拿撒勒，tīhia來得tio̍h合宜ê準備，thang完成伊臨到世間為tio̍h咱，以及咱ê拯救ê事業。