《各各他e5目屎--苦難得安慰》

 | | | 轉寄

簡樸ê生活方式

作者 紀福讚 2006.04.16

洛杉磯時報一個外月前報導韓國總統金泳三teh推行簡樸生活ê運動。提倡phah網球代替高爾夫球；食傳統韓國麵代替牛排、中國料理；細台車代替進口ê轎車。這是受韓國祈禱院推行粗菜便飯ê影響。伊講：「奢華是韓國人精神ê癌症。」Ánni政府一年會tàng省幾百億ê預算。生意人哀哀叫，收入減少，顧客消費低。M̄ koh in lóng講：「為tio̍h久長ê韓國將來ê發展，這是正確ê路。」

倒轉來看台灣ê總統，聲聲句句講beh去山頂做牧師，soah結交有錢ê朋友替伊起別莊。想講tòa別莊去山頂講寡仁義道德ê八股就是傳福音。伊kiám無讀tio̍h路加九5758一人對耶穌講：「你無論tálo̍h去，我beh跟tòe你。」耶穌：「狐狸有孔，天頂ê飛鳥有巢，獨獨人子無khòa頭殼ê所在。」若有想beh傳福音，m̄是去山頂表示家己ê清高，這是虛名，侮辱原住民簡樸ê傳統。

Beh傳福音應該是向伊hiahê有錢朋友，加為台灣ê社會做寡公益，省一頓應酬會tàng做gōa濟好代誌。M̄是提倡金錢政治，學日本。伊若是基督徒，tio̍h學耶穌簡樸ê精神；若是真正愛台灣，tio̍h為台灣ê子子孫孫設想，寧苦提倡簡樸ê生活，m̄ thang犧牲台灣ê環境資源，犧牲台灣人ê健康，去設污染ê工業kap核電廠。M̄ thang hō͘台灣成做poa̍hkiáu城，大家來開錢、享受、poa̍hkiáu，五光十色ê街市、酒色賭淫，罪惡貫滿ê島。但是，m̄是永遠khiā起ê所在，無有一個人肯hō͘伊ê子孫tī poa̍hkiáu城受教育、大漢。這kiám m̄是台灣人ê悲哀mah?