《各各他e5目屎--苦難得安慰》

 | | | 轉寄

噁[cho]心ê誇耀

作者 紀福讚 2006.08.13

1994年10月15，tī義大利那不勒卡撒塔教堂ê一個婚禮，新娘是25歲ê瑪麗亞•林波，穿一領新娘衫480磅（會當比憑世界記錄尚長ê新娘衫157公尺）。Tī hit工，會眾注目ê，m̄是新娘，soah是這領超重ê新娘衫。卡撒塔教堂ê主教，叫這是一種「噁心ê誇耀」。

這hō͘人聯想tio̍h，hitê稱做「本世紀上súi ê婚禮」－－英國王子查理斯kap王妃戴安娜ê婚禮。參加ê各國政府要人超過三千人，亦有幾億ê觀眾tī電視ê轉播中觀禮，in ê隆重kap奢華，hō͘所有ê人欣羨。但是，tī最近出版ê查理斯ê傳記，伊竟然坦白講：伊根本m̄ bat愛過戴安娜，是伊ê老父菲立親王強迫伊娶ê。伊ê婚姻實在是包含了希臘悲劇小說ê全部。這個全世界ê人所祝福、所注目ê婚禮，竟然是一款「無真實ê疼」ê禮儀niāniā。有真chhiaⁿiāⁿ ê排場，無婚姻基本ê「疼」。tī「互相無疼」kap「互相無忠實（infidelity）」ê交纏中，hō͘人欣羨ê婚禮，soah變做全世界ê人恥笑ê悲劇。查理斯王子kap伊ê部屬ê某－－雪蜜兒，tī電話錄音裡所流露出來ê曖昧，以及戴安娜ê情夫，為tio̍h beh趁500萬出賣通姦ê內情，hō͘人聽了實在會起雞母皮，koh kaléngsún，想beh吐（噁[cho]心）。

耶穌bat講起假冒偽善ê法利賽人愛誇耀in家己ê虔誠。當in teh施捨ê時，就pûn鼓吹、拍鼓，請人來觀禮，親像今á日真chē人，當in beh做慈善捐獻ê時，就會hip一張大大張ê支票做紀念。另外，法利賽人也會故意tī街頭十字路口á是會堂內，做真súi、真長ê祈禱，來展in ê疼心kap靈性，thang hō͘人oló，會當做眾人ê模範。

耶穌bat講一個譬喻：有一位財主，家產豐富，起大粟倉，thang khǹg所有ê糧食kap財物。起好了，講：「靈魂ah！你有chē chē財物，你thang安逸lim食，快樂！」這是一種cho心ê誇耀，向人，向上帝來誇耀，總是上帝講：「無知ê人ah！你ê靈魂若無去，你所預備ê，beh歸啥人ah？」

當咱有誇耀ê衝動ê時，咱是m̄是會當tùi chiahê譬喻來學習tio̍h謙卑？